Asan’ny Apostoly
7 Fe hoy ty asan’ny mpisorobe iny: “Marina va zao?” 2 Le hoy ty navalin’i Stefana: “Nareo rahalahy noho nareo raiamandreny, janjino aho. Niseho tamy Abrahama razambentsika azy Ndranaharin’ny voninahitsy iny, tamy ie ta Mezopotamia any, talohan’ny nipetrahany ta Harana any. 3 Le nivola taminy Ndranahary hoe: ‘Mialà amy taninao noho ty longonao, le mandehana amy tany hatoroko anao zay any.’ 4 Le niala tamy tanin’ny Kaldeanina tao ie, ka nipetraky ta Harana any. Lafa nimaty amy zay babany, le nivolani-Ndranahary ie mba hifindra amy tany ipetrahanareo henanizao toy. 5 Fe tsy nanome lova azy tetoa Ndranahary ndre tany kelikely* aza, fa nampitamà azy hoe hanome an’ny tany toy ho azy noho ho ahi-ty taranakiny, ndre mbo tsy nana anaky aza ie tamy zay. 6 Nivola tamy Abrahama koa Ndranahary hoe ho vahiny an-tanin’olo any ty taranakiny. Le hataon’olo any andevo rozy, ka hampijalin-drozy anatin’ny 400 tao. 7 Le hotsarako firenena hanandevo an-drozy zay, hoy Ndranahary, ka hiala bakany rozy afarani-zay, le hanao fanompoa masy ho ahy amy pilasy toy eto.’
8 “Nanao fifanekea tamy Abrahama mikasiky savatsy koa ie. Le niteraky an’i Isaka, Abrahama, bakeo nanavatsy azy tamy andro fahavalo. Isaka amy zay niteraky an’i* Jakoba, le Jakoba niteraky an-drozy 12 loham-pianakaviantsika. 9 Le nialonan’ny loham-pianakaviantsika rey Josefa ka navilin-drozy, le nandesin’olo ta Ejipta any. Fe nanampy azy Ndranahary, 10 ka nanavotsy azy tamy fijaleany iaby. Le natao-Ndranahary ze hahazoany hatò tamy Farao mpanjakan’i Ejipta, noho ze hananany fahendrea tamy mpanjaka io teo. Le nitendren’i Farao hiandraikitsy an’i Ejipta noho ty raha iaby tan-tranony ao ie. 11 Fe nisy kerè ta Ejipta noho ta Kanana any, ka tena nanjeky ty fijalea nahazo ty olo tany. Le tsy nahita raha hohany mihintsy razambentsika rey. 12 Fe niren’i Jakoba hoe nisy hany* ta Ejipta any, ka naniraky an’ny razambentsika rey ho any ie tamy voalohany. 13 Lafa nandeha tany fanindroeny rozy, le nanambara ty vatany tamy rahalahiny rey Josefa, ka lasa nihain’i Farao ty fianakavian’i Josefa. 14 Le nampangalan’i Josefa baka amy pilasy zay any Jakoba babany noho ty longony iaby, ka 75 ty fitambaran-drozy. 15 Nandeha nijotso nana Ejipta any amy zay Jakoba, le nimaty tany. Nimaty tany koa razambentsika rey. 16 Le nandesy ta Sekema any rozy, ka nalevy tamy lolo nivilin’i Abrahama iny ao. Nivilin’i Abrahama sekely volafoty tamy anakilahin’i Hamora ta Sekema any lolo io.
17 “Lafa nihanarìny ty fotoa hahatanterahan’ny fampitamana nivolani-Ndranahary tamy Abrahama iny, le nitombo noho nihamaro ty olo ta Ejipta any. 18 Nisy mpanjaka hafa nanday an’i Ejipta tafara atoy, sady tsy nahay an’i Josefa. 19 Nampiasa tetiky mpanjaka io mba hahavoan-draha an’ny razambentsika rey, ka niforosevany hanary ty anan-drozy vo nateraky rozy, amy zay tsy ho velo ajà rey. 20 Tamy fotoa zay Mosesy ro nateraky. Nisoasoa biby* ie, sady nitezà* tan-tranon’ny babany ao tanatin’ny telo vola. 21 Fe lafa naria ie, le nalan’ny anakampelan’i Farao iny sady nitezàny manahaky ty anany naterany. 22 Le nampianary ty fahendrea iaby nananan’ny Ejipsianina Mosesy. Tena niavaky koa ty raha nivolaniny noho ty raha nataony.*
23 “Lafa nifeno 40 tao ie, le nanapa-kevitsy* hitsidiky* an’ny rahalahiny rey, zany hoe ty anan’Israely. 24 Ka laha vo nihitany hoe nitratsin’ny tsy rariny ty raiky tamin-drozy, le niaro ani-azy nampijalỳ iny ie, ka namaly faty le namono an’ny Ejipsianina iny. 25 Nieritseritsy ie fa ho hain’ny rahalahiny rey hoe ie ro nampiasà-Ndranahary hanavotsy* an-drozy, kanefa tsy nihain’ny rahalahiny rey raha zay. 26 Le nandeha tamin-drozy any ie hamarain’iny, ka nahita lahilahy roe nialy. Le niezaky nampilongo an-drozy ie ka nivola hoe: ‘Zalahy e, mpirahalahy any koahy nareo! Ka manino nareo mialy io?’ 27 Fe natosikini-azy namango ty namany iny Mosesy, sady nivolaniny hoe: ‘Ia va ty nanendry anao ho mpitariky noho mpitsara anay? 28 Sa teanao hovonoa manahaky namonoanao an’ny Ejipsianina nomaly iny koa va zaho io?’ 29 Nilay Mosesy lafa naharè ani-zay, ka lasa vahiny nipetraky ta Midianina any. Le niteraky anakilahy roe ie tany.
30 “Lafa niafaky 40 tao tafara atoy, le nisy anjely niseho taminy tanaty lelan’afo tamy hazo nirehitsy* zay teo. Tamy dezera* anilan’ny Vohitsy Sinay any ty nisehoan’ny raha zay. 31 Nitseriky Mosesy lafa nahita an’ny raha zay. Fe lafa ho namonjy eny ie mba handiniky soa an’ny raha iny, le naharè ty feon’i Jehovah nivola hoe: 32 ‘Zaho ro Ndranaharin’ny razambenao, azy Ndranaharin’i Abrahama noho Isaka noho Jakoba iny.’ Le nangitikitiky Mosesy, ka tsy nahasaky nandiniky soa an’ny raha iny marìny eny. 33 Le hoy Jehovah taminy: ‘Alao kapanao iny, satria tany masy itsangananao io. 34 Tena fa hitako ty fampijalea an’ny vahoakiko a Ejipta any rey, sady fa reko ty fitarainan-drozy, ka nijotso hanavotsy an-drozy aho. Ka zao zany: Hirahiko ho a Ejipta any iha.’ 35 Mosesy io avao azy tsy neken-drozy sady nivolanin-drozy iny hoe: ‘Ia va ty nanendry anao ho mpitariky noho mpitsara anay?’ Fe mbo ie avao koa ro nirahi-Ndranahary ho mpitariky noho mpanavotsy, sady tamy alalan’ny anjely niseho taminy tamy hazo nirehitsy ao iny ro nanaovany ani-zay. 36 Lahilahy io ro nanday an-drozy niala baka a Ejipta any, sady nanao fahagagà* noho famantara maro tany, noho tamy riaky mena teo, noho tamy dezera* tany tanatin’ny 40 tao.
37 “Mosesy io azy nivola tamy anan’Israely iny hoe: ‘Hanendry mpaminany ho anareo Ndranahary, zany hoe mpaminany manahaky ahy, baka amy rahalahinareo eo.’ 38 Ie azy tamy fiangona eo tamy dezera* any iny niaraky tamy anjely niresaky taminy tamy Vohitsy Sinay any iny, noho niaraky tamy razambentsika rey. Mbo ie koa ro nandramby ty safà masy sady velo, mba hamea antsika. 39 Fe tsy nahoan’ny razambentsika rey ie, sady tsy nety nanoriky ty safàny rozy. Le nita himpoly ta Ejipta any tam-pon-drozy ao rozy, 40 ka nivola tamy Arona hoe: ‘Manamboara ndranahary ho antsika mba hitariky antsika, fa tsy hay ty raha nahazo an’i Mosesy, azy nanday antsika niala baka a Ejipta any iny.’ 41 Namboatsy anak’aomby amy zay rozy tamy fotoa zay, ka nanao soro ho an’ny sampy io sady nifalifaly nankalaza ty asan’ny tanan-drozy. 42 Le niala tamin-drozy Ndranahary, ka nanenga an-drozy hanao fanompoa masy ho an’ny raha amy lanitsy eny, araky ty voasoratsy amy bokin’ny mpaminany ao hoe: ‘Nareo taranak’Israely, ataonareo fa zaho va nameanareo fanatitsy noho soro tanatin’ny 40 tao tamy dezera* any zay? 43 Tsy zaho mihintsy fa ty tranolain’i Moloka noho azy basia ndranahary kaihy hoe Refana nandesinareo iny, zany hoe sary vonga nataonareo hivavaha rey. Le hataoko sesitany lavitsy an’i Babylona nareo.’
44 “Nana ty tranolain’ny vavolombelo ty razambentsika tamy dezera* any, satria nampanovi-Ndranahary an’ny raha io Mosesy, araky ty modely natorony azy. 45 Le nilovàn’ny razambentsika rey tranolay iny, ka nampiliriny tamy tanin’ny firenena rey ao, zany hoe firenena niroasi-Ndranahary hiala tamy razambentsika eo rey. Nampilitsy an’ny tranolay io tany rozy, niaraky tamy Josoa, ka tao avao raha io zisiky tamy andron’i Davida. 46 Le nahazo hatò tamy Ndranahary Davida, ka nangataky mba hamea tombontsoa hamboatsy trano ho an’ny Ndranaharin’i Jakoba iny, 47 kanefa Solomona ro namboatsy trano ho Azy. 48 Fe tsy mipetraky amy trano namboary tana azy Farany Anabo iny, satria ho zao ty nivolanin’ny mpaminany: 49 ‘Ty lanitsy ro sezim-panjakàko, le ty tany ro fasiako tomboky. Ka trano manao akory hamboarinareo ho ahy io?, hoy Jehovah. Le pilasy manao akory ro azoko itofà? 50 Tsy ty tanako va ro namboatsy an’ny raha iaby rey?’
51 “Olo maheriloha nareo, sady tsy misavatsy fo noho sofy! Manohitsy ty fanahy masy avao nareo, le manahaky ty nataon’ny razambenareo avao ty ataonareo. 52 Ia moa ty mpaminany tsy nenjehin’ny razambenareo rey? Nivonoan-drozy mihintsy aza ze olo nanambara mialoha hoe ho avy azy marina iny. Le nareo koa henanizao ro lasa mpamadiky noho mpamono an-drozy. 53 Nareo amin’io mba fa nandramby ty Lalàna nambaran’ny anjely, fe tsy norihinareo raha zay.”
54 Le niromotsy* rozy lafa naharè an’ny raha zay, ka nangìtsy taminy. 55 Fe nifeno fanahy masy Stefana, ka nanenty soa an’ny lanitsy iny le nahita ty voninahitsi-Ndranahary sady nahita an’i Jesosy nitsanga ta ankavana-Ndranahary eo. 56 Le hoy ty asany: “Io fa hitako mivoha ty lanitsy, le ty Anak’olo mitsanga ankavana-Ndranahary eo.” 57 Le nikorakoraky marè biby ty olo sady nanampin-tsofy, ka niaraky nirodo taminy eo. 58 Le niroasin-drozy ivelan’ny tanà iny any ie, bakeo nitorahin-drozy vato. Le nametraky ty sikin-drozy* tan-tombon’ny pamaraky raiky kaihy hoe Saoly zay eo vavolombelo nanasara raha azy rey. 59 Lafa nitoraky vato an’i Stefana rozy, le nisoloho Stefana hoe: “Nao lahy Jesosy Tompo, rambeso ty aiko.” 60 Le nandohaliky ie, ka nivola marè hoe: “Jehovah, ka rambesy ho fahotan-drozy raha ataon-drozy io!” Lafa baka nivola ani-zay ie, le nimaty.*