Ty Taratasy Faharoe ho ahi-ty Tesalonianina
2 Fa laha mikasiky ty fanatrehan’i Jesosy Kristy Tompontsika noho ty famoria antsika ho aminy any ro resahy, le zao ty angatahinay aminareo, rahalahy: 2 Ka malaky miasa loha na taitaitsy, lafa misy safà atao raha baka amy Ndranahary,* na safàn’olo, na taratasy atao raha baka aminay mivola hoe fa avy ty andron’i Jehovah.
3 Ka engà hisy olo hamitaky anareo* mihintsy, satria tsy ho avy andro zay laha tsy fa misy fivadiham-pinoa* tse sady fa aseho mazava lahilahy mpandika lalàna iny, zany hoe anan’ny fandripaha iny. 4 Mpanohitsy ie sady manondrotsy ty vatany ho anabo mandilatsy ani-ze raha iaby kaihy hoe ndranahary na ze raha iaby ivavaha.* Ka le mipetraky amy tempoli-Ndranahary ao ie, sady manao ty vatany ho ndranahary amin’olo maro eo. 5 Tsy tiaronareo va fa fa nivolaniko taminareo matetiky raha zay, tamy zaho mbo taminareo eo?
6 Hainareo henanizay hoe ino ty raha mbo misaka an’ny lahilahy io, ka mahavy azy tsy hatao hita soa laha tsy amy fotoany. 7 Marina hoe fa miasa ty sekirè mikasiky an’ny fandikàn-dalàna io, fe zisiky hangalà an’ny raha misaka azy henanizao iny avao. 8 Le hatao hita soa vatany mpandika lalàna iny. Haripakin’i Jesosy Tompo amy fofonain’ny vavany ie sady horavàny lafa hita mazava ty fanatrehany. 9 Fe ty herin’i Satana ro mahavy an’ny lahilahy mpandika lalàna io ho eo, noho hanao raha miavaky maro, sady hanao famantara mamitaky noho fahagagà,* 10 le hanao raha tsy marina sankarazany mba hamitaha ani-ze olo haripaky. Zay ty sazin’olo rey satria tsy naneky sady tsy nitea fahamarina rozy ka tsy ho avotsy. 11 Le engà-Ndranahary ho voafitakin’ny fampianaran-diso rozy, mba hinoan-drozy vandy. 12 Amy zay hambara hoe diso rozy iaby satria tsy nino ty fahamarina, fa nifalifaly tamy raha tsy marina.
13 Rahalahy, tean’i Jehovah nareo! Tsy maintsy misaotsy a-Ndranahary ho anareo avao zahay. Fa fa baka am-boalohany ie ro nifily anareo mba havota, ka nihamasininy tamy alalan’ny fanahiny nareo satria nino ty fahamarina. 14 Ho amy raha zay ty nikaihany anareo tamy alalan’ny vaovao soa torinay, mba hahazoanareo ty voninahitsin’i Jesosy Kristy Tompontsika. 15 Ka le miezaha hivahatsy soa, rahalahy, sady ka miala amy ze raha nampianary anareo, ndre tamy raha nivolany zay ndre tamy taratasy baka aminay. 16 Ankoatsini-zay, tea antsika Ndranahary Babantsika sady mampionona antsika mandrakizay noho manome raha tamany soasoa, satria eo hasoam-panahiny miavaky iny. Enganè rozy amy Jesosy Kristy Tompontsika 17 mba hampionona ty fonareo noho hampahery* anareo, amy zay nareo hanao raha soa noho hivola raha soa avao!