Ty Taratasy Nisoratin’i Jakoba
2 Nareo rahalahiko, manam-pinoa an’i Jesosy Kristy Tompontsika be voninahitsy nareo, fe manino nareo ro mbo mitingy volon’olo avao? 2 Laha misy olo manao peratsy volamena noho siky soa biby, ohatsy, avy amy fivorianareo ao, fe misy mahantra maloto siky koa militsy ao, 3 le azy manisy siky soa biby iny va ro teanareo marè, ka volaninareo hoe: “Mipetraha amy pilasy soa eto iha”, fa azy mahantra iny volaninareo hoe: “Mitsangàna eo avao iha”, na hoe: “Mipetraha anilan’ny fasiako tomboky ambany etia iha”? 4 Laha zay ie, tsy fa mitingy volon’olo va nareo sady lasa mpitsara miangatsy?
5 Janjinonareo toy rahalahiko teako: Tsy ze olo eritseretini-zao tontolo zao hoe mahantra va ro nifilì-Ndranahary ho panarivo amy finoa, noho ho mpandova an’ny Fanjakà nampitamaniny ani-ze olo tea azy iny? 6 Kanefa tsy hajànareo ty mahantra. Tsy ty panarivo va ro mampijaly anareo noho mitaritariky anareo ho amy tribinaly any? 7 Tsy manivativa an’ny anara soa nikaiha anareo iny va rozy? 8 Fe tena soa ty raha ataonareo laha manoriky an’ny lalànan’ny mpanjaka volanin’ny Soratsy Masy iny nareo, azy manao ho zao iny hoe: “Tiavo ty namanao manahaky itiavanao ty vatanao.” 9 Manota nareo laha mbo mitingy volon’olo avao, sady ambaran’ny* lalàna hoe mpandika lalàna.
10 Ndre ia ndre ia manoriky ty Lalàna iabiaby, kanefa diso amy Lalàna raiky avao, le lasa diso amy Lalàna iabiaby. 11 Fa azy nivola hoe: “Ka mandranto” iny ro nivola koa hoe: “Ka mamono olo.” Laha tsy mandranto iha kanefa mamono olo, le lasa mpandika lalàna. 12 Atorò avao amy ze raha volaninareo noho ataonareo zany, fa hotsaran’ny lalàna orihin’ny olo afaky* iny nareo. 13 Hotsarà tsy an-kitsitsy ty olo tsy mpiferinay olo, fa ze olo miferinay olo ro ho tafaboaky lafa tsarà.*
14 Nareo rahalahiko, ino moa ty raha soa azoni-ze olo mivola hoe manam-pinoa, kanefa tsy mampiseho an’ny raha zay amy ty raha ataony? Hanavotsy azy va finoa zay? 15 Laha misy rahalahy na anabavy tsy mana siky* sady tsy ampy hany sanandro, 16 le misy aminareo mivola aminy hoe: “Soasoava lahy! Hafana noho ho vintsy soa avao lahy nareo!”, kanefa tsy ameanareo an-drozy ze raha ilàn’ny vatan-drozy, le ino moa ty raha soa azo baka amy zay? 17 Manahaky ani-zay koa fa maty ty finoa, laha tsy atoro amy ty raha atao.
18 Fe hisy hivola hoe: “Finoa avao ro anananao, fa ty ahy ty finoako atoroko amy ty raha ataoko. Atorò ahy amy zao avao zany ty finoanao, fa ty finoako hatoroko amy ty raha ataoko.” 19 Mino va iha fa misy Ndranahary raiky avao? Tena soa zay. Fe ndre ty demonia koa mino ka mangitikitiky. 20 Mba hainao moa, iha tsy mandiniky io, fa tsy misy dikany ty finoa laha tsy atoro amy ty raha atao? 21 Tsy nambara ho olo marina va Abrahama babantsika vokatsin’ny raha nataony, lafa baka nanome an’i Isaka anany tanabon’ny alitara teo ie? 22 Hitanao fa natorony tamy ty raha nataony hoe nanam-pinoa ie, ka lasa lavorary ty finoany vokatsin’ny raha nataony. 23 Tanteraky zany raha volanin’ny Soratsy Masy iny hoe: “Nampiseho finoa an’i Jehovah, Abrahama, ka nekè* hoe olo marina.” Le nikaihy hoe naman’i Jehovah ie.
24 Hitanareo zany fa ambara hoe olo marina ty olo vokatsin’ny raha ataony, fa tsy vokatsin’ny finoany avao. 25 Manahaky ani-zay koa Rahaba makorely: Tsy nambara ho olo marina va ie vokatsin’ny raha nataony, lafa baka nandramby soa an’ny iraky niavy taminy ao rey, ka nandefa an-drozy tamy lala hafa any? 26 Eka, zay vatany, maty ty vata laha tsy misy ay,* le maty manahaky ani-zay koa ty finoa laha tsy atoro amy ty raha atao.