Asan’ny Apostoly
3 Niakatsy nana amy tempoly ao Petera noho Jaona tamy lera fivavaha, zany hoe tamy lera fahasivy.* 2 Le nisy lahilahy nalemy tomboky baka an-tron-dreniny* any nandesin’olo tam-bavahadin’ny tempoly eo. Kaihy hoe Vavahady Kanto vavahady io. Napetrakin-drozy teo ie sanandro amy zay hangataky tamy ze olo nilitsy tamy tempoly ao. 3 Lafa nahita an’i Petera noho Jaona hilitsy tamy tempoly ao ie, le nangataky drala tamin-drozy. 4 Fe nanenty azy soa Petera noho Jaona, le hoy ty asan’i Petera: “Henteo zahay.” 5 Le nanenty soa an-drozy roe lahy ie, satria nitamà hahazo raha baka amin-drozy. 6 Fe hoy ty asan’i Petera: “Tsy mana volafoty na volamena aho, fa ze raha ananako ro ameako anao. Amy anaran’i Jesosy Kristy baka a Nazareta, mandehana!” 7 Le nirambesiny tamy tanany ankavana ie, bakeo natsangany. Avy le natanjaky ty tombon’ny lahilahy iny noho ty ranjony, 8 ka nitsamboko ie sady nanomboky nandeha. Nilitsy tamy tempoly ao niaraky tamin-drozy roe lahy ie, ka nandeha sady nitsambotsamboko noho nidera a-Ndranahary. 9 Le nahita azy nandeha noho nidera a-Ndranahary ty olo iaby. 10 Le nihain-drozy amy zay hoe ie lahilahy nipetraky nangataky tamy Vavahady Kanto tamy tempoly eo iny. Le nitseriky biby rozy, sady tsy nampino an-drozy ty raha niseho tamy lahilahy iny.
11 Tamy lahilahy iny mbo nitanjaky marè an’i Petera noho Jaona iny, le niavy bakany vahoaky rey nirodo tamin-drozy telo lahy eo, tamy pilasy kaihy hoe Lala mitafon’i Solomona iny eo. Le nitseriky biby rozy. 12 Lafa nihitan’i Petera raha zay, le nivola tamy vahoaky rey ie hoe: “Nareo Israelita, ino mahatseriky anareo io? Manino nareo mandiniky marè anay io? Ataonareo fa ty herinay va na hoe zahay nahafoy ty vatanay ho ahi-Ndranahary ro nahavitanay nampandeha azy io? 13 Nanome voninahitsy an’i Jesosy Mpanompony ty Ndranaharin’i Abrahama noho Isaka noho Jakoba, zany hoe Ndranaharin’ny razambentsika iny, kanefa nameanareo hovonoa Jesosy ka nandà azy tamy Pilato teo nareo, ndre fa nitapa-kevitsy hampibototsy azy aza Pilato. 14 Nandà ani-azy masy noho marina iny vatany nareo. Mpamono olo ro nangatahinareo habototsy ho anareo, 15 fa nivonoanareo Mpitariky Farany Anabo manome fiaina iny. Fe nivelomi-Ndranahary ie, le vavolombelon’ny raha zay zahay. 16 Tamy anarany noho ty finoanay ty anarany ro nampatanjaky an’ny lahilahy hitanareo noho hainareo io. Ty finoa an’ i Jesosy ro nanafaky tanteraky ty aretin’ny lahilahy io tamasonareo iaby eto. 17 Ka zao zany rahalahy, haiko fa ty tsy fahaizanareo ro nanaovanareo an’ny raha rey, le manahaky ani-zay koa mpitariky anareo rey. 18 Fe ho zay ty nanatanteraha-Ndranahary ty raha fa nampivolaniny an’ny mpaminany iaby rey, tsy ino zay fa ty hoe tsy maintsy hijaly Kristy azy nitendreny iny.
19 “Ka le mibebaha, le mimpolia amy Ndranahary* mba ho voafafa ty fahotanareo. Amy zay hisy fotoa mamelombelo baka amy Jehovah,* 20 le hirahiny Kristy, azy nitendrè ho anareo iny, tsy ia zay fa Jesosy. 21 Tsy maintsy mandiny an-danitsy any ie, zisiky iavian’ny fotoa hampimpolia ty raha iaby amy pilasiny, zany hoe ty raha nampivolani-Ndranahary an’ny mpaminaniny masy taloha rey. 22 Tsy zay fa nivola vatany Mosesy hoe: ‘Hanendry mpaminany ho anareo Jehovah Ndranaharinareo, zany hoe mpaminany manahaky ahy, baka amy rahalahinareo eo. Janjino ze raha iaby volaniny aminareo. 23 Ka ze olo iaby tsy mijanjy an’ny Mpaminany zay, le haripaky tanteraky tsy ho amy vahoaky eo.’ 24 Le nanambara mazava mikasiky an’ny fotoa henanizao ty mpaminany iaby, zany hoe ze mpaminany iaby naminany nanomboky tamy Samoela noho azy nandimby azy rey. 25 Nareo ro anan’ny mpaminany noho anan’ny fifanekea natao-Ndranahary tamy razambenareo, tamy ie nivola tamy Abrahama hoe: ‘Hahazo fitahia amy alalan’ny taranakinao ty firenena iaby ambony tany eny.’ 26 Lafa baka nanendry an’ny Mpanompony iny Ndranahary, le taminareo any tse ty nanirahany azy mba hahazoanareo fitahia, ka hanampy anareo kiraidraiky hiala amy raha raty nataonareo.”