Fianara 4
Ia moa ty Devoly?
Satana Devoly, baka aìa? (1, 2)
Akore ro amitaha’i Satana ty olo? (3-7)
Nanino iha ro toko’e hanohitse ty Devoly? (7)
1. Ty dika’y hoe “devoly” zao mpavande noho mpanaraty ty hafa. Ty hoe “Satana” kea le fahavàlo na mpanohitse. Reo ty safà ikaìha aze fahavàlo-Ndranahare bevata bibike iny. Anjele lavorare niarake tami-Ndranahare tan-danitse ane ie’io, tami’y voaloha’e. Fe nisengy ty vata’e ho anabo biby ie tafara atoy, ka tea’e ho ie ndraike ro hivavàha, fa tsy Andranahare mana io fahefà io.—Matio 4:8-10.
2. Nampiasa bibilava mba hiresàha tami’i Eva anjele kaìhy hoe Satana io. Navandea’e Eva, ka tsy nanorike ty safà’Andranahare. Tami’zay le namea’i Satana tsiny maré ty “Fahefà’Andranahare handay”, na ty toera maha Anabo Bibike aze. Nanòvi’i Satana ze tsy hatokìsa, fa mahay mitarike noho mila ze hahasoa ty olo’e Andranahare. Nanòvi’i Satana kea ze tsy hatokìsa fa hisy olo tsy hivalike ami-Ndranahare mihitsy. Nanjary fahavàlo-Ndranahare Satana laha fa nanao raha reo. Zay ro anto’e nikaìha aze hoe Satana Devoly.—Genesisy 3:1-5; Joba 1:8-11; Apokalypsy 12:9.
3. Ilà’i Satana hofitàhy ty olo mba hivavake ami’e. (2 Korintianina 11:3, 14) Fomba raike amitaha’e ty olo ty fivavàha diso. Manao ze tea’i Satana vata’e ty fivavàha raike laha mampianatsy vande mikasike an’Andranahare. (Jaona 8:44) Mety hino maré ty mpivavake ami’y fivavàha diso ao fa mivavake ami-Ndranahare vata’e tò iny roze. Fe Satana ro tompoen-droze. Ie ro “andranahari’y toy tontolo toy.”—2 Korintianina 4:4.
4. Fomba hafa ifeheza’i Satana ty olo ty fisà aòly. Mety hiresake amin’angatse ty olo, soa hiaro aze, ndra mba hamonòa olo hafa; mba hivolàna mialoha ty hoave, ndra mba hanaòva fahagagà. Satana ro hery raty ambalike raha atao iaby reo. Laha ta hampifale an’Andranahare tsika, le tsy toko’e hifampikasoke ami’ty fanahy raty mihitsy.—Deoteronomia 18:10-12; Asan’ny Apostoly 19:18, 19.
5. Verevere’i Satana kea ty olo laha fa misengisengy loatse mikasike ty firazàna’e noho laha fa manondrotse fikambàna ara-politiky. Misy mihevitse fa ty tani’e na ty raza’e ro soa maré. Fe tsy tò zay. (Asan’ny Apostoly 10:34, 35) Misy mianke ami’ty fikambàna ara-politiky, soa hamahà ty raha manahìra mahazo ty olombelo. Laha manao zay roze, le mandà ty Fanjakà’Andranahare. Fanjakà’Andranahare io avao ro aòli’ty raha manahìra antsika.—Daniela 2:44.
6. Fomba hafa amitaha’i Satana ty olo kea ty fakam-panahy ami’ty faniria hanao raty. Mitao antsika hanalavitse ty fomba raty Jehovah, foto’e hai’e fa hahavoa mafy antsika raha zay. (Galatianina 6:7, 8) Mety ho tea’ty olo hanao raty manahake aze kea iha. Fe tiaròvo, fa Satana mihitsy ro ta hampanao anao raha raty reny.—1 Korintianina 6:9, 10; 15:33.
7. Mety hampiasa fanenjeha ndra fanohera Satana mora hampiala anao ami’i Jehovah. Mety ho meloke maré ty longo’ao sisa’e, ami’iha mianatsy Baiboly io. Mety hiheheza’ty hafa iha. Fe, ia ty nanome ay anao? Tea’i Satana hampitahòry iha, ami’zay le hajàno’ao ty fianara’ao mikasike an’i Jehovah. Ka engà handresy i Satana! (Matio 10:34-39; 1 Petera 5:8, 9) Laha fa toheri’ao ty Devoly, le afake mampifale an’i Jehovah iha, sady atoro’ao fa maneke ty fahefà’i Jehovah handay iha.—Ohabolana 27:11.
[Sary, pejy 9]
Mamitake ty olo ty fivavàha diso, noho ty fisà aòly, voho ty fisengea ty tani’e
[Sary, pejy 9]
Tohero Satana ka tohìzo ty fianara’ao mikasike an’i Jehovah