FIANARA 07

Manao Akory Jehovah Zao?

Poziny vita printy

Ino ty avy an-tsainao ao laha vo mieritseritsy mikasiky ani-Jehovah Ndranahary iha? Mety hivola iha hoe mana pilasy ambony ie ka maeva hajà, fe sarotsy ty mifandramby aminy. Mety hieritseritsy koa iha hoe farani-ze mahery ie, fe tsy misy fihetseham-po. Manao akory marina Jehovah zao? Volaniny amy Baiboly ao ty toetsiny, sady hita ao koa hoe tea anao ie.

1. Manino tsika ro tsy afaky mahita a-Ndranahary?

‘Fanahy Ndranahary.’ (Jaona 4:24) Tsy nofotsy manahaky antsika olombelo ty vatany. Fanahy ie, le mipetraky an-danitsy any, ka tsy afaky mahita azy tsika.

2. Ino ty sisany amy ty toetsini-Jehovah?

Tsy afaky mahita ani-Jehovah tsika. Fe lafa mahay azy tsika, le manjary tea azy satria tena misy ie sady mana toetsy soa maro sankarazany. Hoy ty Baiboly: “Tea rariny Jehovah, ka tsy hanary ani-ze tsy mivaliky aminy.” (Salamo 37:28) “Be fitiava” koa ie “sady mamindra fo”, sirtò amy ze olo mijaly. (Jakoba 5:11) “Marìny ani-ze torotoro fo Jehovah, sady mamonjy ani-ze kivy.” (Salamo 34:18) Hainao koa va fa mety hahafalifaly ani-Jehovah ty raha ataontsika na hampalahelo azy? Diso fanantenà noho malahelo ie lafa mifily hanao raha raty ty olo raiky. (Salamo 78:40, 41) Fe falifaly koa ie lafa misy olo raiky manao raha soa.—Vakio Ohabolana 27:11.

3. Akory ty ampisehoani-Jehovah hoe tea antsika ie?

Ty fitiava ro toetsy mampiavaky ani-Jehovah. Mivola ty Baiboly hoe “fitiava Ndranahary.” (1 Jaona 4:8) Tsy lafa mamaky Baiboly avao tsika vo mahita hoe be fitiava Jehovah, fa lafa mandiniky ty raha niforoniny koa. (Vakio Asan’ny Apostoly 14:17.) Diniho avao, ohatsy, ty nanamboarany antsika. Afaky mahita loko sankarazany tsika, maharè moziky soasoa, noho mihina sakafo matsiro. Teany ho azontsika tavy ty fiaina.

DINIHO LALIKY

Diniho hoe ino ty ampiasani-Jehovah mba hahavità raha miavaky, le henteo koa hoe manao akory ty fomba ampisehoany ani-toetsiny rey.

4. Hery ampiasà-Ndranahary ty fanahy masy

Sary maromaro: Raha sisany nivita tamy alalani-fanahy masy. 1. Planety vitsivitsy noho vahindanitra. 2. Mpanoratsy Baiboly manoratsy ty hevitsi-Ndranahary amy boky mihoro.

Mampiasa ty tanantsika tsika mba hanaova raha. Ho zay koa Jehovah. Mampiasa ty fanahy masy ie. Mivola ty Baiboly hoe tsy olo ty fanahy masy, fa hery ampiasà-Ndranahary. Vakio Lioka 11:13 noho Asan’ny Apostoly 2:17, bakeo iaraho midiniky fanontanea retoa:

Laha mangataky fanahy masy tsika, le hameani-Jehovah. Ka akory ty hevitsinao, olo va zany ty fanahy masy sa hery ampiasà-Ndranahary? Manino iha ro mivola ani-zay?

Mampiasa ty fanahy masy Jehovah mba hanaova raha miavaky. Vakio Salamo 33:6 noho 2 Petera 1:20, 21, le iaraho midiniky fanontanea toy:

Ino ty raha sisany ampiasani-Jehovah ty fanahy masy?

Sary maromaro: Raha sisany nivita tamy alalani-fanahy masy. 1. Planety sankarazany noho raha iaby zao. 2. Mpanoratsy Baiboly mandika ty hevitsi-Ndranahary amy boky mihoro.

5. Mana toetsy soa Jehovah

Fa ela ty nanompoani-Mosesy ani-Jehovah, fe mbo ta hahay soa ani-Mpamoro io ie. Farany nivola taminy Mosesy hoe: ‘Ambarao ahy ty lalanao, amy zay aho hahay anao.’ (Eksodosy 33:13) Nambarani-Jehovah ani-Mosesy amy zay ty sisany amy ty toetsiny. Vakio Eksodosy 34:4-6, le iaraho midiniky fanontanea retoa:

Ino ty toetsini-Jehovah nambarany ani-Mosesy?
Aia amy toetsini-Jehovah reo ro teanao marè?

6. Midary antsika olombelo Jehovah

Vahoakini-Jehovah, Hebreo reo taloha, le niandevo ta Ejipta any rozy. Ino ty tsapani-Jehovah lafa nahita ty fijalean-drozy? Alefaso RAKI-PEO toy le araho amy Baibolinao ao, na vakio Eksodosy 3:1-10. Bakeo iaraho midiniky fanontanea retoa:

RAKI-PEO: Hitan’i Jehovah ny Fijalian’izy Ireo (2:33)

Laha hentea tantara io, ino ty tsapani-Jehovah lafa mahita olo mijaly?—Henteo andininy 7 noho 8.
Akory ty hevitsinao, tena ta hanampy ty olombelo va Jehovah? Vitany va raha zay? Ino ty antony?