FIANARA 49
Akory ty Hahasambatsy ty Fianakavianao? Fizarà 1
Nainani-mpivaly vao rey hitohy zisiky farany ty hasambaran-drozy tamy androni-mariazy iny. Azo atao va zay? Eka. Maro amy mpivaly kristiana fa nifanambaly tanatini-tao maro noho miezaky manoriky ty torohevitsini-Baiboly ro mahatsapa ani-zay.
1. Ino ty torohevitsy ameani-Baiboly ty lahilahy manambaly?
Nataoni-Jehovah ho loham-pianakavia ty lahilahy. (Vakio Efesianina 5:23.) Mitamà zany Jehovah hoe hahasoa ty fianakaviany ty fanapahan-kevitsy ataony. Manoro hevitsy ty lahilahy manambaly ty Baiboly hoe: “Tiavo avao ty valinareo.” (Efesianina 5:25) Midika raha zay fa mila soa fanahy amy valiny ie, ndre an-trano ao zay, ndre amason’olo eny. Arovany noho karakaràny soa koa ty valiny sady ampiadaniny. (1 Timoty 5:8) Fa ty tena vatan-draha le hoe ampeany hifandramby soa amy Jehovah avao ty valiny. (Matio 4:4) Azony atao, ohatsy, ty mivavaky noho mamaky Baiboly miaraky amy valiny. Laha be fitiava noho mikarakara soa ani-valiny ty lahilahy raiky, le ho namani-Jehovah avao ie.—Vakio 1 Petera 3:7.
2. Ino ty torohevitsy ameani-Baiboly ty ampela manambaly?
Mivola ty Safà-Ndranahary hoe: “Tokony hanaja soa ty valiny” ty ampela. (Efesianina 5:33) Ino ty azony atao? Azony atao zao ty mieritseritsy ty toetsy soani-valiny noho ty ezaky ataony mba hikarakarà an-drozy trano raiky. Manaja ty valiny koa ty ampela lafa manoha ty fanapahan-kevitsiny. Soa fanahy ie lafa miresaky aminy sady tsy manaratiraty azy amin’olo hafa any. Manao ani-reo avao ty ampela manaja valy, ndre tsy mpanomponi-Jehovah aza ty valiny.
3. Ino ty azoni-mpivaly atao mba hifankatea avao rozy?
Mivola ty Baiboly hoe: “Ho nofotsy raiky avao” ty mpivaly. (Matio 19:5) Midika raha zay fa tsy tokony hisy raha hengan-drozy hampihena ty fifankatiavan-drozy. Miaraky manao raha matetiky rozy, mifampiresaky soa sady tsy misalasala mivola ty fihetseham-pon-drozy noho ty raha eritseretin-drozy. Samby miezaky ho soa fanahy rozy lafa miresaky. Tsy misy raha na olo hafa ataoni-mpivaly vatan-draha mandilatsy ty valiny, laha tsy Jehovah avao. Mitandrina soa zany rozy tsy no lasa hifandramby marè amin’olo hafa.
DINIHO LALIKY
Hohenteantsika hoe ino iaby ty torolalani-Baiboly hanampy ty mpivaly hifankatea avao.
4. Tokony ho tea noho hikarakara soa ani-valiny ty lahilahy
Mivola ty Baiboly fa “tokony ho tea ty valiny ty lahilahy, manahaky ty itiavany ty vatany.” (Efesianina 5:28, 29) Ino ty dikani-zay? Alefaso VIDEO toy, bakeo iaraho midiniky fanontanea io.
Ino iaby ty azoni-lahilahy atao mba hampisehoany hoe tea noho mikarakara ani-valiny ie?
Vakio Kolosianina 3:12, bakeo iaraho midiniky fanontanea toy:
Akory ty azoni-lahilahy ampisehoa ani-toetsy reo amy valiny?
5. Tokony ho tea noho hanaja soa ani-valiny ty ampela
Ampirisihini-Baiboly ty ampela mba hanaja ty valiny, ndre mpanomponi-Jehovah ty valiny ndre tsy manompo azy. Vakio 1 Petera 3:1, 2, bakeo iaraho midiniky fanontanea retoa:
Laha tsy Vavolombelo ty valinao, le azo antoky hoe teanao mba hanjary mpanomponi-Jehovah koa ie. Ino ty hitanao hoe mety handaitsy: Ty mitory aminy matetiky va? Sa ty miezaky ho soa fanahy noho manaja azy? Ino ty antony?
Soasoa lafa mitovy hevitsy ty mpivaly amy fanapahan-kevitsy ataon-drozy. Fe akory laha tsy mitovy hevitsy amy valiny ty ampela? Afaky mivola ty hevitsiny avao ie, fe tokony hanaja soa ani-valiny sady hiezaky ho kalma. Fe ndre zay, tokony hotiaroviny avao hoe ty lahilahy ro nataoni-Jehovah ho mpanapa-kevitsy ho ani-fianakavia. Tokony hiezaky hanoha ze hevitsy tampakini-valiny ie. Handay hasambara amy fianakavia eo ty fanaovany ani-zay. Vakio 1 Petera 3:3-5, bakeo iaraho midiniky fanontanea toy:
Ino ty tsapani-Jehovah lafa manaja soa ani-valiny ty ampela?
6. Azo resè ty problemo amy fanambalea
Tsy misy fanambalea lavorary. Midika zay fa tsy maintsy miaraky miasa ty mpivaly mba handresea raha sarotsy. Alefaso VIDEO toy, bakeo iaraho midiniky fanontanea reo.
Ino ty ahità hoe fa tsy nifandramby soa mpivaly tamy video tao iny?
Ino iaby ty raha nataon-drozy morovaly mba hifankatea avao rozy?
Vakio 1 Korintianina 10:24 noho Kolosianina 3:13. Saky vita vaky ty andinin-teny raiky, le iaraho midiniky fanontanea toy:
Manino torohevitsy io ro afaky manampy ty mpivaly hifankatea avao?
Mivola ty Baiboly fa tokony hifanome voninahitsy tsika. Manao ani-zay tsika lafa soa fanahy noho manaja ty hafa. Vakio Romanina 12:10, bakeo iaraho midiniky fanontanea retoa:
Tokony handiny ty valiny hanome voninahitsy azy tse va ty lahilahy na ty ampela zay vo hanao ani-zay aminy koa? Ino ty antony?
MIERITSERITSY TY OLO SISANY HOE: “Fa tsy mifankatea manahaky ty taloha sasy zahay morovaly.”
Akory ty anazavanao amin’olo io hoe afaky manampy an-drozy ty Baiboly?
FAMINTINA
Ho sambatsy ty mpivaly laha mifankatea noho mifanaja sady manoriky ty torolalani-Baiboly.
Famerena
Ino ty azoni-lahilahy atao mba ho sambatsy ty tokantranon-drozy?
Ino ty azoni-ampela atao mba ho sambatsy ty tokantranon-drozy?
Laha manambaly iha, aia amy torolalani-Baiboly rey ro afaky manampy anareo morovaly hifankatea avao?
DINIHO KOA RETOA
Misy torohevitsy hanampy ty fianakavianao ho sambatsy ty ato.
Ho hitanao amy hira toy ato ty fitahia ho azoni-mpivaly lafa manaraky ty torohevitsi-Ndranahary rozy.
Ino ty dikani-hoe maneky ty fahefàni-loham-pianakavia?
“Ry Vehivavy, Ekeo ny Fahefan’ny Vadinareo” (Ny Tilikambo Fiambenana 15 Mey 2010)
Resin’ny mpivaly retoa ty raha manahira an-drozy ndre fa nisaraky mihintsy aza rozy. Ino ty nanampy an-drozy?
Nampean’i Jehovah Zahay ka Niavotsy Avao ty Fanambaleanay (5:14)