FIANARA 58
Ka Mivaliky amy Jehovah Mihintsy
Tapa-kevitsy ty tena Kristiana fa tsy hanakalo ty fanompoany ani-Jehovah amy raha hafa mihintsy. Azo antoky fa tapa-kevitsy ho zay koa iha. Lafovily amy Jehovah ty tsy fivalihanao aminy. (Vakio 1 Tantara 28:9.) Amy raha manao akory ro mety ho sarotsy amintsika ty tsy hivaliky? Le ino ty hanampy antsika tsy hivaliky mihintsy?
1. Manino ty olo hafa ro mety hahavy antsika hivaliky amy Jehovah?
Hiezaky ty olo sisany mba hanaka antsika tsy hanompo ani-Jehovah. Anatini-zay ty olo sisany niala tamy fahamarina. Mivola raha tsy marina mikasiky ty fandaminani-Jehovah rozy, mba hahavy antsika hisalasala noho halemy finoa. Kaihy hoe mpivadi-pinoa olo rey. Manaparitaky vandy mikasiky antsika koa ty mpanday fivavaha sisany. Laha tsy miamby soa ty mpanomponi-Jehovah, le hiala amy fahamarina koa. Mikai-doza ty mialy hevitsy amin’olo mpanohitsy rey, na mamaky ty bokin-drozy, na manenty ty videon-drozy, na militsy amy tranonkalan-drozy amy Internet ao. Niresaky mikasiky olo manaka ty hafa tsy hanompo ani-Jehovah rey Jesosy hoe: “Engaho ie fa mpitariky jiky. Ka laha jiky ro mitariky jiky, le samby ho lavo an-davaky any rozy.”—Matio 15:14.
2. Hita amy fanapahan-kevitsy ataonao va fa tsy mivaliky amy Jehovah iha?
Laha tea ani-Jehovah iha, le tsy hanao raha misy ifandrambesany amy fivavaha diso mihintsy. Tsy tokony misy ifandrambesany amy fivavaha diso ty asantsika, na ty fikambana misy antsika, na ty raha hafa ataontsika. Mampitandrina antsika Jehovah hoe: “Miboaha baka [amy Babylona Bevata] ao nareo oloko.”—Apokalypsy 18:2, 4.
DINIHO LALIKY
Hodinihintsika retoa: Ino ty azonao atao mba tsy ho voataon’olo hivaliky amy Jehovah iha? Akory ty ampisehoanao hoe tsy mifandramby amy Babylona Bevata mihintsy iha?
3. Mitandrema amy mpampianatsy sandoky
Ino ty tokony hataontsika laha maharè olo mandratiraty ty fandaminani-Jehovah tsika? Vakio Ohabolana 14:15, bakeo iaraho midiniky fanontanea toy:
Manino tsika ro tokony hitandrina mba tsy hino ze raha iaby rentsika?
Vakio 2 Jaona 9-11, bakeo iaraho midiniky fanontanea retoa:
Akory ty tokony hataontsika amy mpivadi-pinoa rey?
Mety tsy hiresaky mivanta amy mpivadi-pinoa tsika. Fe akory ty mety hahavy antsika hijanjy ty fampianarany?
Akory ty hevitsinao, ino ty mety ho tsapani-Jehovah laha mijanjy olo mandratiraty ty fandaminany tsika?
4. Ka mivaliky amy Jehovah ndre misy mpiara-manompo manao fahotà bevata
Ino ty raha mila ataontsika laha misy rahalahy na ranabavy manao fahotà bevata amy fiangona eo? Ndao tsika handiniky torolala raiky baka amy Lalàna-Ndranahary ho an’Israelita reo. Vakio Levitikosy 5:1.
Hita baka amy andinin-teny io fa mila mivola amy anti-panahy tsika laha haintsika hoe nanao fahotà bevata ty olo raiky. Fe alohani-hanaovantsika ani-zay, le soa laha olo nanao fahotà iny mihintsy ro volanintsika mba hiresaky amy anti-panahy. Laha tsy mety ie, le asehontsika hoe tea ani-Jehovah tsika ka tsika mihintsy ro hivola amy anti-panahy ty raha iaby haintsika mikasiky ani-fahotà iny. Manino ty fanaovantsika ani-zay ro mampiseho hoe tsy mivaliky...
amy Jehovah tsika?
amin’olo nanao fahotà iny tsika?
amy mpiara-manompo amy fiangona eo tsika?
Ampeo ty mpiara-manompo aminao laha hitanao hoe sahira!
5. Ka mifandramby amy Babylona Bevata mihintsy
Vakio Lioka 4:8 noho Apokalypsy 18:4, 5, bakeo valeo fanontanea retoa:
Mbo misy anarako va voasoratsy amy fivavaha diso any?
Mbo miharo amy fikambana misy ifandrambesany amy fivavaha diso va aho?
Manoha ty fivavaha diso va ty asa fivelomako?
Mbo misy ifandrambesany amy fivavaha diso va ty raha sisany ataoko?
Ino ty fiovà tokony hataoko laha misy eka ty valini-fanontanea reo?
Ndre ino ino ty fanapahan-kevitsy horambesinao, le ataovo azo antoky hoe hampilamy ty sainao raha zay sady hampiseho hoe tsy mivaliky amy Jehovah iha.
Ino ty hataonao laha ampandoavy drala iha mba hanohana ty asa soa ataoni-fivavaha?
MIERITSERITSY TY OLO SISANY HOE: “Tokony ho haiko tse ty vandy volanini-mpivadi-pinoa reo mikasiky antsika Vavolombeloni-Jehovah, amy zay aho ho afaky hiaro ty fahamarina.”
Fahendrea va ty hanaova ani-zay? Ino ty antony?
FAMINTINA
Laha tsy ta hivaliky amy Jehovah tsika, le tsy tokony hifandramby amin’olo fa nivaliky aminy. Tsy tokony hifandramby mihintsy amy fivavaha diso koa tsika.
Famerena
Manino tsika ro tsy tokony hijanjy ty fampianarani-mpivadi-pinoa?
Ino ty tokony hataontsika laha haintsika hoe nanao fahotà bevata ty rahalahy na ty anabavy raiky?
Akory ty ampisehoantsika hoe miala amy fivavaha diso tsika?
DINIHO KOA RETOA
Ino ty tokony hataonao lafa misy olo manaparitaky vandy mikasiky ty Vavolombeloni-Jehovah?
“Mba Manadihady Tsara ve Ianao?” (Ny Tilikambo Fiambenana Aogositra 2018)
Akory ty ahaizanao hoe misy ifandrambesany amy Babylona Bevata ty fikambana na ty asa raiky?
Ino ty nataoni-mpanohitsy sisany mba hampalemy ty finoantsika?
Ho hitanao ato ty tantarani-pretra shintoista raiky niala tamy fivavaha diso.
“Manova Olona ny Baiboly” (Ny Tilikambo Fiambenana 1 Jolay 2011)