Fanontanean’ny Mpamaky
Ino “hevitsy” hataon’i Jehovah am-pony mpanday fanjakà rey ao tsy ho ela io?
Zao ty volanin’ny Apokalypsy 17:16, 17 mikasiky ty fanombohan’ny fijalea bevata: “Ty tsifa folo nihitanao noho bibinala iny, le halay an’ny makorely iny ka handrava ze raha iaby ananany noho hampihalo azy. Le ho hanin-drozy ty nofotsiny noho horoan-drozy tanteraky amy afo ie satria fa natao-Ndranahary tam-pon-drozy ao ty hanantateraky ty hevitsiny.” Taloha, nivola ty boky noho gazetintsika hoe fandravà ty fivavahan-diso “hevitsy” hataon’i Jehovah am-pony mpanday fanjakà rey ao io.
Fe mila ahity raha zay. Ino zany “hevitsy” hataon’i Jehovah am-pony mpanday fanjakà rey ao io? Ty ‘fanomezan-drozy ty fanjakàn-drozy ho an’ny bibinala iny.’ Mba hahaizantsika ty fomba hahatanteraky ani-zay, le hodinihintsika fanontanea retoa.
Ia iaby ro tena resahy amy faminania io, le manondro an’ia? Kaihy hoe “Babylona Bevata” koa “makorely” io. Manondro ty fivavahan-diso iabiaby maneran-tany makorely io. “Bibinala mena malangy” iny, le manondro ty Firenena Mikambana. Naory tamy 1919 fikambana io mba hampisy filamina amy tany toy iaby, le nikaihy hoe Fikambanam-pirenena ie tamy zay. (Apok. 17:3-5) “Tsifa folo” iny, le manondro ty fanjakà iaby manoha an’ny bibinala iny.
Manao akory ty fifandrambesan’ny makorely iny noho bibinala mena malangy iny? Mitikitsy amy bibinala iny makorely iny, zany hoe manoha azy sady miezaky mikomandy azy.
Ino ty raha hahazo an’ny makorely iny? ‘Halay an’ny makorely’ iny bibinala noho tsifa folo manoha azy iny. Halay azy rozy, ka handrava ze raha iaby ananany noho hampihalo azy, zany hoe hampiseho ty raha raty ataony. Hotanterahin-drozy koa ty didim-pitsaran’i Jehovah mikasiky azy, ka haripakin-drozy tanteraky ie. (Apok. 17:1; 18:8) Zay ty raha hahazo ty fivavahan-diso. Fe alohan’ny hisehoan’ny raha zay, le hampanaovin’i Jehovah raha mbo tsy nisy tetoy ndraiky ty mpanday fanjakà.
Ino ty raha hampanaovin’i Jehovah ty mpanday fanjakà? Hataony ze hahavy an’ny tsifa folo iny hanatanteraky ty hevitsiny, zany hoe hamean-drozy an’ny “bibinala mena malangy iny” na ty firenena mikambana ty herin-drozy noho ty fahefàn-drozy. (Apok. 17:13) Midika raha zay fa tsy hevitsy baka amy mpanday fanjakà ty hoe hanome ty herin-drozy noho ty fahefàn-drozy ho an’ny bibinala iny. Asehon’ny faminania iny hoe Ndranahary mihintsy ro hanao raha mba hanatanterahan-drozy an’ny hevitsy zay. (Ohab. 21:1; ampitovizo amy Isaia 44:28.) Hiseho tsikelikely va raha zay? Aha! Hiseho tampoky raha zay. Lafa nahazo hery noho fahefà bibinala iny, le hampihatra ty didim-pitsaran’i Jehovah ka handrava tanteraky ty fivavahan-diso iabiaby.
Ino ty raha ampoizintsika fa hiseho amy hoavy? Tsy tokony hitamà tsika fa hahita vaovao miresaky hoe lasa manoha tsikelikely ty Firenena Mikambana ty mpanday fanjakà. Zao ty raha ampoizintsika fa hiseho: Hataon’i Jehovah am-pon’ny mpanday fanjakà rey ao tampoky ty hanome ty herin-drozy an’ny bibinala iny. Lafa miseho raha zay le hohaintsika hoe fa hanomboky ty fijalea bevata. Fe zisiky hiaviani-zay, “le ndao tsika hiamby avao noho handiniky soa avao” satria hoavy tsy ho ela fiovà tampoky io!—1 Tes. 5:6.