‘Miezaha Hiharo Raiky Avao’
NAMPIRISIKY ty Kristiana ta Efesosy any apostoly Paoly mba “hifandefitsy satria manam-pitiava, le hiezaky marè mba hiharo raiky avao sady hilongo, satria fa naharon’ny fanahy masy” rozy.—Efes. 4:2, 3.
Miharo raiky tsika satria ampean’ny “fanahy masy”, zany hoe ampean’ny hery ampiasà-Ndranahary iny. Fe niresahin’i Paoly hoe mitaky ezaky raha zay. Ia iaby ty tokony hiezaky hanao ani-zay? Ty Kristiana kiraidraiky mihintsy ro mila ‘miezaky marè mba hiharo raiky avao.’
Ndao atao hoe namean’olo tobily vaovao iha. Ia ty tokony hikarakara soa an’ny tobily iny? Mazava ty valini-zay. Laha simba tobily iny, le tsy hanome tsiny an’olo nanome azy iny iha satria iha ro tsy nikarakara soa azy.
Manahaky ani-zay koa fa ndre fanomeza soa baka amy Ndranahary aza ty fiharoa raiky ananantsika, le andraikitsintsika kiraidraiky ty manao ze hampiharo raiky antsika. Laha misy rahalahy na anabavy tsy mifanaraky zany, le eritsereto zao: ‘Manao ze azoko atao va aho mba hampisy fiharoa raiky avao?’
‘MIEZAHA MARÈ’ MBA HIHARO RAIKY AVAO
Araky ty nivolanin’i Paoly, le mety mila miezaky mafy tsika kindraiky mba hahavy antsika hiharo raiky avao. Mety hiseho raha zay laha misy rahalahy na anabavy nanao raha nampeloky antsika. Tsy maintsy mamonjy an’olo nanao raha nampeloky anao iny va iha, bakeo miresaky ty raha tsapanao satria hoe ta hiharo raiky? Tsy voatery. Eritsereto zao: ‘Hampilamin-draha va ty fanaovako ani-zay sa vomaiky hanimba raha?’ Soa kindraiky laha tsy miasa loha amy raha iny iha na tsy mitanjaky lolompo amin’olo iny.—Ohab. 19:11; Marka 11:25.
Eritsereto zao: ‘Lafa misy olo tsy mifanaraky amiko, hampiharo raiky anay va laha meloky aho na mifamaly aminy?’
Nivola apostoly Paoly hoe ‘tokony hifandefitsy avao tsika satria manam-pitiava.’ (Efes. 4:2) Mivola boky raiky zay fa azo adika hoe “mandramby an-drozy araky ty maha ie an-drozy” ty tean’i Paoly hovolany amy safà io. Dikani-zay zany, ekentsika hoe mpanota manahaky antsika avao ty rahalahy noho anabavintsika. Mazava ho azy fa miezaky misiky ty “toetsy vaovao” tsika. (Efes. 4:23, 24) Fe ndre zay, le tsy misy amintsika hahavita hanao ani-zay tanteraky. (Rom. 3:23) Laha maneky ani-zay tsika, le ho mora amintsika ty hifandefitsy noho hifanenga hadisoa ka ‘hiharo raiky avao tsika.’
Laha manenga hadisoa tsika sady tsy miasa loha marè mikasiky ty raha tsy mety nataon’ny mpiara-manompo amintsika, le ‘hilongo amin-drozy.’ Ty safà Grika nadika hoe “hilongo” amy Efesianina 4:3, le nadika hoe “hozatsy” amy Kolosianina 2:19 ao. Ty hozatsy le nofotsy henja mampitohy taola raiky amy taola hafa. Manahaky ani-zay koa fa laha milongo noho tea an’ny rahalahy noho anabavintsika reo tsika, le hifandramby soa amin-drozy avao ndre manao raha mampeloky antsika aza rozy kindraiky.
Lafa misy mpiara-manompo nanao raha nampeloky anao zany na nampalahelo anao, le miezaha hiferinay azy, zany hoe hahatakatsy ty raha mahazo azy fa tsy hitsaratsara azy. (Kol. 3:12) Tsy lavorary tsika iaby ka mety hanao raha mampalahelo olo. Laha tiarovinao avao raha zay, le hiezaky “hiharo raiky” amy mpiara-manompo aminao reo avao iha.