Mbo ho Tampitsy Avao va ty Fampihorohoroa Afarafara Ao?

Mety hanontany ho zao iha lafa baka nahare na nahita asa fampihorohoroa: ‘Mba midary ani-zao avao va Ndranahary? Manino ro miseho ty raha manahaky ani-zao? Mbo ho tampitsy avao va ty fampihorohoroaa? Ho vitako va ty hiay amy raha mampatahotsy toy? Manome valiny mahafa-po amy fanontanea reo ty Baiboly.

Akory ty fahità-Ndranahary ty fampihorohoroa?

Tsy tea-Ndranahary ty hasatà noho ty fampihorohoroa. (Salamo 11:5; Ohabolana 6:16, 17) Nananatsy ani-mpianatsini-rey Jesosy, azy solontena-Ndranahary iny, lafa nisy amin-drozy nisatà. (Matio 26:50-52) Ndre misy mieritseritsy hoe amy anara-Ndranahary ro anaovany fanafiha amin-kasatà, le tsy nanome alala an-drozy hanao ani-zay mihintsy ie. Vomaiky aza ie tsy hijanjy ty vavaky ataon-drozy.—Isaia 1:15.

Midary ty olo iaby mijaly Ndranahary, anatini-zay ty olo mijaly vokatsini-fanafihani-mpampihorohoro. (Salamo 31:7; 1 Petera 5:7) Mivola koa ty Baiboly fa hanao raha Ndranahary, mba hanampera ty hasatà.—Isaia 60:18.

Ty antony mahavy ty fampihorohoroa

Ambarani-Baiboly ty antony mahavy ty fampihorohoroa. Hoy ty asany: “Nanjakazaka tamy ty namany ty olo, ka nampilitsy loza taminy.” (Mpitoriteny 8:9) Liany bakany zay, le fampihorohoroa avao ro ampiasani-ze olo mana fahefà, mba hampitahora noho hampijalea ty hafa. Mamaly faty amy zay azy nampijalỳ rey, le manao asa fampihorohoroa koa.—Mpitoriteny 7:7.

Ho tampitsy ty fampihorohoroa

Nampitamà-Ndranahary fa ho tamperiny ty tahotsy noho ty hasatà, le hataony milamy soa ty an-tany etoa. (Isaia 32:18; Mika 4:3, 4) Retoa ty raha hataony:

Halàny ty antony mahavy ty fampihorohoroa. Hosoloa-Ndranahary amy ty fanjakàny handay ani-tany toy iaby ty fanjakàn’olombelo. Jesosy Kristy ro ho mpanday ani-fanjakà zay. Hanao ty rariny amin’olo iaby ie, sady hotamperiny ty fampijalea noho hasatà. (Salamo 72:2, 14) Amy fotoa zay, le tsy hisy sasy ty fampihorohoroa satria “ho falifaly amy fiadana be” ty olo.—Salamo 37:10, 11.
Halàny ty voka-dratini-fampihorohoroa. Halà-Ndranahary iaby ty vokatsiny fampihorohoroa, ndre ara-bata zay, ndre ara-tsay. (Isaia 65:17; Apokalypsy 21:3, 4) Nampitamà aza ie fa ndre ty maty hovelominy ndraiky, le hiay amim-pilamina an-tany etoa.—Jaona 5:28, 29.

Misy antony amy Baiboly ao mampiseho hoe kely sisa le hanao raha Ndranahary. Fe mety hieritseritsy iha hoe: ‘Ino ty antony mbo tsy anampera-Ndranahary ty fampihorohoroa?’ Mba hahitanao ty valini-zay, le henteo ty video hoe Manino ro Engà-Ndranahary Hisy ty Fijalea?

a Amy ankapobeny ty hoe “fampihorohoroa” le manondro hasatà na fampitahora ampiasà hasatà. Matetiky atao amin’olo tsotra raha zay, mba hampitahora an-drozy noho mba hampisy fiovà amy resaky politiky, fivavaha, na fiaina andavanandro. Fe tsy mitovy ty hevitsin’olo mikasiky ty hoe fampihorohoroa va ty raha niseho raiky sa tsy fampihorohoroa.

Manampy ty olo hiatriky ty fampihorohoroa ty Baiboly

Afaky manampy antsika torohevitsy roe volanini-Baiboly retoa.

Mivavaha amy Ndranahary.—Filipianina 4:6, 7.
Mifantoha amy ty raha ampitamanini-Baiboly.—Hebreo 6:19.

Laha ta hahita torohevitsy hafa baka amy Baiboly ao iha, le henteo ty lahatsoratsy hoe “Inona no Hanampy Anao Tsy Hanahy Be Loatra?”

Nitratsini-fampihorohoroa ty Vavolombeloni-Jehovah sisany, le nahazo fanampea baka amy ty mpiaraky mivavaky aminy. Henteo moa ohatsy roe retoa:

Tamy lakilasy raiky ta Beslan, a Russie any Natalya noho Aslan, anakilahiny sivy tao, lafa nilitsy forosè tao ty mpampihorohoro maromaro nanday basy. Nangalaky olo 1 000 mahery natao takalon’ay rozy. Nampalahelo fa an-jatony ty maty, le ajà ty hamaroany. Ndre niavotsy soa avao aza Natalya noho Aslan, le mbo navaka marè avao rozy. Henteo hoe ino ty nanampy an-drozy hilamin-tsay.
Maty tamy fanafiha nampipoaky trano etazy hamba ta Etazinỳ tao iny ty anakilahini-Pablo noho Sophie. Henteo video toy, le ho hitanao hoe ino ty nanampy an-drozy noho ty olo hafa niazoni-fampihorohoroa.