Hanomboky an’Israely any va ty Aramagedona?​—Ino ty Volanin’ny Baiboly?

Ampianarin’ny Baiboly fa tsy hoe aly amy faritsy raiky avao ty atao hoe Aramagedona, fa aly ifanaovan’ny fanjakan’olombelo noho Ndranahary.

• “Fe fanambarà baka amy demonia raha zay laha ty marina . . . mandeha amy ze mpanjaka amy tany iaby misy olo, mba hamoria an-drozy ho amy alini-andro bevata-Ndranahary, azy Farani-Ze Mahery iny. . . . Navorin’ny fanambarà zay ho amy pilasy kaihy amy safà hebreo hoe Aramagedona mpanjaka rey.”​—Apokalypsy 16:14, 16.

Baka amy safà Hebreo hoe Har Meghid·dohnʹ ty safà hoe “Aramagedona”, le midika hoe “Vohitsy Megido.” Tanà raiky tamy faritsin’Israely taloha Megido io, le mety zay mahavy ty olo mieritseritsy hoe an’Israely any ty hisehoan’ny Aramagedona io. Fe tsy misy pilasy ho tendriky ty “mpanjaka amy tany toy iaby” noho ty maramilany ty any, na ty amy faritsy hafa Antinanan’ny Mediterane iny.

Nisoraty ho “famantara” na fanoharan-draha ty bokin’ny Apokalypsy. (Apokalypsy 1:1) Tsy manondro pilasy raiky ara-bakiteny zany Aramagedona io, fa ty raha hiseho amy tany toy iaby lafa hivory hialy farany amy Ndranahary ty fanjakàn’olombelo.​—Apokalypsy 19:11-16, 19-21.