Manaly fa Tsy Matokitoky ty Mpanao Politiky ty Olo​—Ino ty Volanin’ny Baiboly?

Hisy fifidiana maro ty amy tany toy iaby amy 2024 toy. Fe manaly fa tsy de matoky ty mpanao politiky sasy ty ankamaroan’olo.

• Nivola ty ankamaroan’ny Amerikein lafa nihadihadỳ, fa “fitiavan-tena ro tena manosiky ty ankamaroan’ny mpanao politiky” fa tsy hoe ta hanao raha soa ho ahi-ty vahoaky.a​—Pew Research Center, 19 Septambra 2023.

Maro koa ty tanora fa tsy matoky loatsy ty mpanao politiky.

• “Ty hahità hevitsy mba hamahà ty problemo bevata miseho ro tena manahira ty tanora. Fe araky ty resahin’ny fanadihadia, le tsy mba mila hevitsy hamahà ani-problemo reo ty mpanao politiky.”​—The New York Times, 29 Zanviè 2024.

• “Nisy famoria hevitsy zay natao, le nihita fa ty mpanao video amy YouTube ao koa ro atokisan’ny tanora marè tany ty mpanao politiky.”​—The Korea Times, 22 Zanviè 2024.

Azo atokisa va fa hampisy hoavy soasoa an-tany etoy ty mpanao politiky? Ia ty azontsika atokisa?

Filio soa ty olo hatokisanao

Marina avao laha mifily soa ty olo hatokisany ty olo. Satria ndre ty Baiboly aza mivola hoe “mino ty safà iaby reny ty olo mora vereverè, fa ty olo mahihitsy mieritseritsy soa lafa hanao raha.”​—Ohabolana 14:15.

• Laha teanao ho hay ty raha tokony hataonao mba hanamarìna soa ze vaovao azonao, le vakio ty lahatsoratsy hoe “Miambena Soa amy Vaovao tsy Marina.”

Fanampini-zay koa, ndre atao hoe maniry ta hanao raha soa aza ty mpanao politiky raiky, le voafetra avao ty raha mety ho vitany. Zay mahavy ty Baiboly mampitao hozao io:

• “Ka matoky ty olo ambony, na ty olombelo tsy afaky manavotsy.”​—Salamo 146:3, Fandikan-tenin’ny Tontolo Vaovao.

Mpitariky raiky azo atokisa

Mivola ty Baiboly fa nanendry mpitariky mahavita raha sady azo atokisa Ndranahary. Tsy ia io fa Jesosy Kristy. (Lioka 1:32, 33) Jesosy ro Mpanjakan’ny Fanjakà-Ndranahary, zany hoe fanjakà an-danitsy any iny.​—Matio 6:10.

• Manino tsika ro afaky matoky an’i Jesosy? Le ino ty raha hataony mba hamahà ty raha manahira antsika? Laha ta hahay misimisy mikasiky ani-reo, le vakio ty lahatsoratsy hoe “Iza no Mpanjakan’ny Fanjakan’Andriamanitra?” noho ty hoe “Inona no Hataon’ny Fanjakan’Andriamanitra?”