Vitsy Henanizao ty Olo Mahalala Fomba noho Manaja ty Hafa​—Ino ty Volanin’ny Baiboly?

Fa mihavitsy henanizao ty olo mahalala fomba noho manaja ty hafa. Anisan’ny raha mpihita matetiky, ohatsy, retoa: marary mitrivotrivotsy ty dokoterany, tompon’ny hotely tsy manaja ty mpiasany, pasazy tsy manaja ty sofera noho ty mpanampy azy, mpianatsy mikizakizaky, mangorohoro, noho mamango ty mpampianatsy azy. Misy mpanao politiky koa tratsy manao raha raty. Ty mpanao politiky sisany koa manao ty vatany hoe tena soa fandaisam-bata.

Manoro antsika ty fomba soa tokony handaisantsika ty vatantsika ty Baiboly. Hazavaniny avao koa hoe manino ro vitsy ty olo mahalala fomba henanizao.

Fa manino ty olo ro lasa tsy mahalala fomba noho tsy manaja ty hafa?

Hita amy tany toy iaby fa lasa vitsy ty olo manao ty soa, manaja ty hafa, noho mana fandaisam-bata maeva.

• Nisy famorian-kevitsy nataon’ny Gallup zay vo tsiela, le hita tamy valin’ny raha iny fa tsy de misy lanjany amy ty olo a Etazinỳ any sasy ty resaky fahalalam-pomba noho fanajà ty hafa henanizao. Nihanihena raha zay tanatin’ny 22 tao lasa.

• Nisy fanadihadia koa natao tamy tany 28, le nisy 32 000 eo ho eo ty olo nandramby anjara. Ty 65 sanjato amin’olo nandramby anjara reo ro samby nivola hoe tena vitsy ty olo mahalala fomba henanizao.

Fa niresaky mialoha mikasiky ani-raha miseho henanizao io ty Baiboly.

• “Any am-parany any dia hisy andro mahory. Fa ny olona ho tia tena, ho tia vola, ho mpandoka tena, mpiavonavona, miteny ratsy, tsy manoa ray sy reny, tsy misaotra, . . . tsy manam-pitiavana, [ary] lozabe.”​—2 Timoty 3:1-3, Baiboly Protestanta

Laha ta hahita fanazavà fanampiny mikasiky ty fahatanterahan’ny faminania io iha, le vakio ty lahatsoratsy hoe “Efa Voalazan’ny Baiboly Mialoha ve ny Toe-tsain’ny Olona Amin’izao Andro Izao sy ny Zavatra Ataony?”

Torolala azo antoky hanampy anao hana fandaisam-bata soa

Ndre mihavitsy aza ty olo mahalala fomba noho manaja ty hafa henanizao, le an-tapitrisany ty olo nahita hoe afaky manampy antsika hana toetsy soa ty Baiboly. Maharitsy “zisiky farany” ty torohevitsiny sady “azo iantehera avao.” (Salamo 111:8) Retoa zao misy torohevitsy vitsivitsy bakao:

• Ty raha volanin’ny Baiboly: “Ze raha iaby teanareo hataon’olo aminareo, le mba ataovo aminy koa.”​—Matio 7:12.

  Ty teany hovolany: Laha teantsika hanaja antsika noho ho soa fanahy amintsika ty hafa, le mila manao hozay aminy tsika.

• Ty raha volanin’ny Baiboly: “Fa narianareo ty vandy, ka samby ie mivola ty marina amy ty namany iaby nareo kiraidraiky.”​—Efesianina 4:25.

  Ty teany hovolany: Tokony hanao ty marina avao tsika amy ze raha volanintsika noho amy ze raha ataontsika.

Laha ta hahita fanazavà fanampiny mikasiky an’ny foto-kevitsy io iha, le vakio azafady retoa:

• Lahatsoratsy hoe “Ny Mety sy ny Tsy Mety​—Tari-dalana Azonao Itokisana”, amy Tilikambo Fiambena ao

• Lahatsoratsy hoe “Afaka Manampy Antsika Hahay Handefitra ny Baiboly.”