Manao Akory Marina Kristiana Zao?​—Ino ty Volanin’ny Baiboly?

Maro ty olo manao ty vatany ho Kristiana, kanefa raty ty raha ataony amin’olo. Ao ty tea tena, mamitapitaky olo na raty fanahy. Ty ilany aza mandranto mihintsy. Farany misy mivola hoe: ‘Manao akory marina zany Kristiana zao?’

Ino ty dikan’ny hoe Kristiana?

Mora aloha ty mivola hoe: “Zaho Kristiana.” Fe tsy vitan’ny resaky avao raha zay, fa maro ty raha tafilitsy aminy. Laha hentea ty Baiboly, le ty mpianatsin’i Jesosy Kristy ro kaihy hoe Kristiana. (Asan’ny Apostoly 11:26) Ty vatatenan’i Jesosy mihintsy ro nivola hoe: “Laha manaraky ty safàko avao nareo, le mpianatsiko vatany.” (Jaona 8:31) Tsy midika aloha raha zay hoe mahavita manaraky ty safàn’i Jesosy tsy misy pitotsy ty Kristiana. Tsy misy olo mahavita ani-zay. Fe manao ze farany vitany ty Kristiana mba hanaraky ty fampianaran’i Jesosy sady hampiseho an’ny raha zay amy ty raha ataony sanandro. Retoa misy ohatsy.

Kristiana zao: Tea olo

Ino ty nivolanin’i Jesosy? “Zao ty didy vaovao ameako anareo: Mifankatiava nareo, le manahaky ty nitiavako anareo ro tokony hifankatiavanareo koa. Laha mifankatea nareo, le zay ro hahaizan’olo iaby fa mpianatsiko nareo.”​—Jaona 13:34, 35.

Ino ty nataon’i Jesosy? Tena nitea olo Jesosy. Tsy nanavaky ie, ndre mpanarivo io ndre mahantra, ndre bakaia ndre bakaia. Nitahàny ty marary, nameany hany ty mosarè. Ndre ty ainy aza nifoiny ho ahi-ty hafa.​—Matio 14:14-21; 20:28.

Ino ty ataon’ny Kristiana? Tea olo ty Kristiana ka le matariky, tsy manavakavaky noho manenga hadisoa. Ampeany ze mila fanampea, le foiny hamea olo ty raha ananany.​—1 Jaona 3:16.

Kristiana zao: Tsy mavandivandy

Ino ty nivolanin’i Jesosy? “Zaho ro . . . fahamarina.”​—Jaona 14:6.

Ino ty nataon’i Jesosy? Nivola ty marina Jesosy sady nanao raha mahity avao. Tsy namerivery olo ie na nanao safà mamitaky. Nalaza ho nivola ty marina Jesosy, ndre nahavy olo halay azy aza raha zay.​—Matio 22:16; 26:63-67.

Ino ty ataon’ny Kristiana? Tsy mavandy ty Kristiana. Mandoa hetra ie, tsy mangalatsy, sady manaja soa ty asany. (Romanina 13:5-7; Efesianina 4:28) Tsy mamitaky olo ie, tsy mangala an-tahaky, sady tsy mavandy lafa mila asa noho mameno taratasy mikasiky ty vatany.​—Hebreo 13:18.

Kristiana zao: Soa fanahy

Ino ty nivolanin’i Jesosy? “Miavia bakao iaby nareo ze miasa mafy noho manday enta mavesatsy, fa hamelombelo anareo aho. Andeso ty baoko le engao aho hampianatsy anareo, satria soa fanahy noho miambany aho, ka ho velombelo nareo. Mora andesy ty baoko, sady maiva ty entako.”​—Matio 11:28-30.

Ino ty nataon’i Jesosy? Olo tsy manahy Jesosy, ka nimora amin’olo ty namonjy azy. Nirambesiny soa ty ajà, nampahereziny ty kivy, sady nanaja olo ie.​—Marka 10:13-15; Lioka 9:11.

Ino ty ataon’ny Kristiana? Soa fanahy ty Kristiana, fa tsy masiaky na boka vola. (Efesianina 4:29, 31, 32) Midary olo rozy ka mila fomba hanampea ty hafa.​—Galatianina 6:10.

Kristiana zao: Tsy mivaliky amy valiny

Ino ty nivolanin’i Jesosy? “Ao tsy hosarahin’olo zany ze naharo-Ndranahary bao.”​—Marka 10:9.

Ino ty nataon’i Jesosy? Tsy nanambaly Jesosy, fe nampirisiky ty olo manambaly ie mba tsy hivaliky amy ty valiny. (Matio 19:9) Nanafatsafatsy ie hoe tsy mety ty manao raha manimba tokantrano.​—Matio 5:28.

Ino ty ataon’ny Kristiana? Manaja tokantrano ty Kristiana. (Hebreo 13:4) Mifankatea noho mifanaja ty mpivaly Kristiana.​—Efesianina 5:28, 33.