Protestanta va ty Vavolombelo Jehovah?
Aha. Kristiana ty Vavolombelo Jehovah, fe tsy protestanta zahay. Ino ty antony?
Misy mivola hoe protestanta ty fivavaha raiky laha manao “fihetsiketseha ara-pivavaha manohitsy ty Fivavaha Katolika.” Marina fa tsy maneky ty fampianara ty Eglizy Katolika ty Vavolombelo Jehovah, fe tsy protestanta zahay. Retoa ty antony tsy maha protestanta anay:
Misy raha maromaro mifanohitsy amy Baiboly fe inoa ty Protestanta. Mivola, ohatsy, ty Baiboly fa “raiky Ndranahary” fa tsy telo fe raiky na trinitè. (1 Timoty 2:5; Jaona 14:28) Ampianary ty Baiboly mazava soa hoe hanasazy ty olo mpanao raty Ndranahary, ka haripany tsy hisy sasy rozy, fa tsy hoe hataony amy afobe any.—Salamo 37:9; 2 Tesalonianina 1:9.
Tsy manohitsy na miezaky hanova ty Eglizy Katolika na ty fivavaha hafa zahay. Mitory ty vaovao soa mikasiky ty Fanjakà Ndranahary avao zahay sady manampy olo hino raha zay. (Matio 24:14; 28:19, 20) Tsy miezaky hanova ty fivavaha hafa zahay, fa miezaky mampianatsy ty olo ty marina mikasiky Ndranahary noho ty Safàny na ty Baiboly.—Kolosianina 1:9, 10; 2 Timoty 2:24, 25.