Novà ty Vavolombelo Jehovah va ty Baiboly mba Hifanaraky amy ty Raha Inoany?

Aha, tsy nanao any zay zahay. Mifanohitsy amy zay aza, fa ty raha inoanay ro novànay lafa nihitanay hoe tsy mifanaraky soa amy ty Baiboly.

Fa nianatsy soa ty Baiboly zahay, fa ela taloha ty nanombohanay nampiboaky ty Baiboly Fandikan-teny Tontolo Vaovao tamy 1950. Nampiasanay iaby ze fandikan-teny nisy tamy zay, le nampifanarahinay amy zay ty raha inoanay. Retoa, ohatsy, misy raha fa ninoa ty Vavolombelo Jehovah fa ela. Ho hitanao amy zay laha mifanaraky soa amy ty raha ampianary ty Baiboly raha reo.

1. Mino zahay hoe: Tsy Tirinitè Ndranahary. Hoy ty Tilikambo Fiambena Ziona tamy Jolay 1882: “Hay ty olo mpamaky gazetinay retoa fa mino any Jehovah noho Jesosy voho ty fanahy masy zahay. Fe hain-drozy koa fa halanay ty fampianara mifanohitsy amy Baiboly hoe misy Ndranahay telo anatinolo raiky, na volany ty ilany hoe Ndranahary raiky anatinolo telo.”

   Mivola ty Baiboly hoe: “Jehovah Ndranaharintsika le Ndranahary raiky avao.” (Deoteronomia 6:4, Baiboly Masy, nadikany Robert Young) “Fe Ndranahary raiky avao amintsika, le ty Baba, niavia ty raha iaby, sady ho azy tsika, le raiky avao ty Tompo, le Jesosy Kristy, tamy alalany ro namorona ty raha iaby noho namorona antsika koa.” (1 Korintianina 8:6, Dikan-teny Iharoany Amerika) Jesosy mihintsy nivola hoe: “Ty Baba le bevata mandilatsy Ahy.”​—Jaona 14:28, Fandikan-teny Douay-Rheim.

2. Mino zahay hoe: Tsy misy ty fampijalijalea zisiky farany amy afobe. Nangalaky ty safà amy Romanina 6:​23, Dikan-teny Mpanjaka Jacques ty gazety Tilikambo Fiambena Ziona, Jona 1882 amy ty lohateniny hoe “Fahafatesa ro Karama azo Baka amy Ota”. Nivola gazety io hoe: “Tsotra noho mazava raha zay. Fe mahatseriky fa ty olo maro manao mino ty Baiboly hoe Safà Ndranahary ro misisiky hanohitsy raha io. Mivola rozy fa fampijalijalea zisiky farany ro karama azo baka amy ota.”

   Mivola ty Baiboly hoe: “Ty fanahy ze manota ro ho maty.” (Ezekiela 18:​4, 20, Dikan-teny Mpanjaka Jacques, anglisy) Tsy fampijalijalea zisiky farany ro sazy mandiny ty olo manohitsy Ndranahary, fa “hatroboa [na fandripaha] zisiky farany.”​—2 Tesalonianina 1:9, Dikan-teny Mpanjaka Jacques.

3. Mino zahay hoe: Fandaisa misy vatany ty Fanjakà Ndranahary fa tsy raha am-po ao avao. Ho zao ty niresahy amy Tilikambo Fiambena Ziona (Desambra 1881) mikasiky ty Fanjakà Ndranahary: “Mazava ho azy fa handay fandripaha ho ahy ty fanjakà hafa an-tany etoy ty fitsangana fanjakà io.”

   Mivola ty Baiboly hoe: “Amy ty andro mpanjaka reo Ndranahary ty lanitsy le hanory fanjakà tsy ho rava zisiky farany, sady fanjakà zay tsy hengà ho ahinolo hafa, fa mpanjaka iaby reo hotorotoroeny noho holevoniny, fa ie hijano eo zisiky farany.”​—Daniela 2:​44, Dikan-teny Mpanjaka Jacques.

Ty Fandikan-teny Tontolo Vaovao va ro tamàny ty Vavolombelo Jehovah hiaro ty raha inoany?

Tsy zay, satria mbo mampiasa fandikan-teny sankarazany avao zahay lafa mitory. Marina fa manome Baiboly Fandikan-teny Tontolo Vaovao zahay lafa mampianatsy Baboly tsy andoavan-drala, fe teanay avao koa ty miaraky mianatsy aminolo ta hampiasa fandikan-teny hafa.