Tantara 115

Paradisa Vaovao An-Tany Etoy

MBA henteo moa hazo lava, noho folera soasoa, voho vohitse abo biby reo. Tsy soa va ty fahitanao sary io? Mba henteo moa biby atao ho aosy mihinan-kany amy tanan’ajà lahilahy io. Henteo kea liona noho sôvaly mitsanga anaty akata maitso eroy reo. Tsy ho teanao va ty hipetrake amy toera soasoa manahake an’io?

Tea-Ndranahare ho velo mandrakizay amy paradisa an-tany eto iha. Sady tsy teane hahazo anao kea fijalea, noho ty arete mampijaly ty olo henany zao. Toy ty safà ampitamàni’ty Baiboly, ho ahin’olo hiay amy paradisa vaovao io ao: ‘Ho amin-droze eo Andranahare. Tsy hisy sasy ty fahafatesa ndra ty ranomaso ndra ty raha mahararirare. Tsy ho eo sasy ty raha niseho taloha.’

Hotanterahin’i Jesosy soa iaby raha mahatserike reo. Hainao va hoe ombia? Eka, hataone raha rezay laha fa malio soa ty tany, ka tsy hisy faharatia noho olo raty fanahy sasy ty etoy. Tiaròvo soa, fa tamin’i Jesosy tan-tany etoy, le nahajanga karazan’arete maro, noho namelo ty olo fa nimaty mihitsy aza. Nataon’i Jesosy raha zay mba hahitàn’olo ty raha hataony an-tany etoy, laha fa ie ro ho Mpanjaka’ty fanjakà-Ndranahare.

Mba somary eritsereto moa ty hasoa paradisa vaovao an-tany etoy io! Hiarake hanjaka amin’i Jesosy an-danitse ane ty olo sasane nofilìne. Hikarakara ty olo kiraidraike an-tany etoy noho hanao ze hahasambatsy an-droze, olo voafìly ho mpanapake reo. Ndao ho henteantsika ty raha tokone hataontsika mba hahazoa antoke fa hamea-Ndranahare antsika fiaìna mandrakizay amy paradisa vaovao ao io.

Apokalypsy 21:3, 4; 5:9, 10; 14:1-3.