Fianara 3

Ia moa Jesosy Kristy?

Nanino Jesosy ro kaìhy hoe Anake “talanolo”? (1)

Nanino ie ro kaìhy hoe “ty Safà”? (1)

Ino ty anto’e nahave an’i Jesosy ho olombelo tan-tany etoy? (2-4)

Nanino ie ro nanao fahagagà? (5)

Ino ro hatao’i Jesosy tsy ho ela? (6)

1. Fanahy tan-danitse any Jesosy, taloha’ty niavia’e tan-tany etoy. Ie ro noforoni-Ndranahare voaloha’e. Zay ro ikaìha aze hoe Ana-Ndranahare “talanolo.” (Kolosianina 1:15; Apokalypsy 3:14) Jesosy raiky avao ro Anake noforoni-Ndranahare mivànta. Laha fa nanamboatse ty raha hafa iaby an-danitse ane noho an-tany etoy Jehovah, le nampiasa an’i Jesosy ho “mpità-mariky” ho aze. Mbo tsy olombelo Jesosy tami’zay. (Ohabolana 8:22-31; Kolosianina 1:16, 17) Nampiasà’Andranahare kea ie mba ho mpanday safà’e . Zay ro ikaìha an’i Jesosy hoe “ty Safà.”—Jaona 1:1-3; Apokalypsy 19:13.

2. Nanirake ty Ana’e ho an-tany etoy Andranahare, ka nafàlo’e tan-tròki’i Maria tao ty ai’io Ana’e io. Ka tsy olombelo ty rae’i Jesosy. Zay ty anto’e tsy nandovà’e ota ndreke handra io. Nirahi-Ndranahare ho an-tany etoy Jesosy noho reto anto’e telo reto: 1) Mba hampianatsy antsika ty marina mikasike Andranahare (Jaona 18:37), 2) mba tsy hivalike ami-Ndranahare, ka ho ohatse horihintsika (1 Petera 2:21), voho 3) mba hanao soro ty ai’e, ka hanavotse antsika ami’ty ota noho ty fahafatesa. Manino raha reo ro ilà?—Matio 20:28.

3. Kaìhi’ty Baiboly hoe “ota” ty tsy fanorìha’i Adama ty lalà’Andranahare. Zay ro anto’e nanameloha-Ndranahare aze ho maty io. (Genesisy 3:17-19) Tsy lavorare sasy ie foto’e, tsy nahavita raha nilà’Andranahare tami’e iaby reny. Nihantitse tsikelikele ie, le maty. Namàlo ota tami’ty fokòa’e iaby i Adama. Zay ro mahavy antsika hihantitse noho harare sady ho maty io. Akore ro azo amonjéa ty olombelo?—Romanina 3:23; 5:12.

4. Olombelo lavorare, nindry tami’i Adama, i Jesosy. Fe tsy nanao manahake an’i Adama Jesosy. Nanorike tanterake ty safà’Andranahare ie ndre nisy raha fara’e ze mahery nahavòa aze aza. Noho raha zay, le azo’e natao soro ai’e lavorare iny, mba hanonéra ty fahota’i Adama. Io aze kaìhi’ty Baiboly hoe “vilim-panavòta” iny. Ka le azo afàha ami’ty fanameloha ho faty ty tarana’i Adama. Ze olo iaby mino an’i Jesosy le afake mahazo famelan-keloke, ka hahazo fiaìna tsy misy fahafatesa.—1 Timoty 2:5, 6; Jaona 3:16; Romanina 5:18, 19.

5. Tami’i Jesosy tan-tany etoy, le nitàha ty marare noho nanome hane ty olo mosaré, sady nampijàno tsioke mahere. Namelo ty maty mihitsy aza ie. Nanino ie ro nanao fahagagà ? Foto’e: 1) Ferinesa’e ty olo nijaly sady ta hanampe an-drozy ie. 2) Fahagagà natao’e reo le manaporofo fa Ana-Ndranahare ie. 3) Natoro’e tami’y fahagagà reny fa mbo hanao manahake reo ndraike ie ho ahi’ty olombelo manorike ty safà’e, laha fa ho Mpanjaka’y tany toy.—Matio 14:14; Marka 2:10-12; Jaona 5:28, 29.

6. Maty i Jesosy, bakeo novelòmi-Ndranahare ndraike ho zavaboary ara-panahy, ka nimpòly an-danitse ane. (1 Petera 3:18) Nanòvi-Ndranahare Mpanjaka ie tafara tatoy. Tsy ho ela le halà’i Jesosy ty raha raty, ndreke ty fijalea iaby ami’y tany toy eto.—Salamo 37:9-11; Ohabolana 2:21, 22.

[Sary, pejy 7]

Anati’y fanompoa’i Jesosy ty fampianara, ty fanaòva fahagagà, voho ty nanomeza’e ty ai’e ho antsika mihitsy aza