Ino ty Raha Hita Amy Adiresinay Amy Internet Ao?

Nivola tamy mpanoridia azy reo Jesosy hoe: ‘Anovo mamirapiratsy aminolo avao ty fahazavanareo, soa ho hitany ty asa soa anovinareo, le hanome voninahitsy ty Babanareo an-danitsy any rozy.’ (Matio 5:16) Mampiasa fitaova vaovao vo niboaky reny zahay amy andro farany henanizao, raiky amy raha zay ty internet. Ty jw.org ro adiresinay amy internet, ao ro ahità ty raha inoanay noho ty asa ataonay Vavolombelo Jehovah. Ino iaby ty raha resahy ao?

Valy ty fanontanea bevata apetra ty olo. Afaky mahita ty valy ty fanontanea bevata mety hapetra ty olo iha. Fa misy amy Internet ao amy safà 600 mahery ohatsy ty taratasy mivalo hoe Mbo ho Tampitsy Avao va ty Fijalea? noho ty hoe Afaky ho Velo Ndraiky Vatany va ty Maty? Ho hitanao ao koa ty Baiboly Fandikan-teny Tontolo Vaovao amy safà 130 mahery. Misy boky noho gazety maro natao hianara Baiboly ty ao manahaky Ino Marina ro Ampianary ty Baiboly? noho Ny Tilikambo Fiambenana noho Mifohaza! niboaky farany. Maro amy boky noho gazety reo ro azo vakia noho janjiny amy Internet ao na alà atao kopia bakao. Azonao aboaky amy taratasy baka amy Internet ao ty lahatsoratsy amy fivolana ze filinao, soa hameanao ze olo hainao fa mampiasa fivolana zay. Ahità video amy safà atao amy tana hanampea olo moa noho mareny koa ty ao. Misy tantara baka amy Baiboly natao ho janjiny noho famakia Baiboly voho moziky soasoa koa ty ao sady azonao alà ho ahinao raha zay.

Manome fanazava marina mikasiky Vavolombelo Jehovah. Hita ao avao koa ty vaovao farany noho video mikasiky ty asanay amy tany toy iaby, ty raha miseho hafa mahavoakasiky ty Vavolombelo Jehovah, noho ty fanampeanay olo lafa misy loza. Ho hitanao ao koa ty daty hanaova fivoriambe manaraky. Atoro ao koa hoe manao akory ty hifandrambesanao amy ty birao ty sampana misy anay.

Midika raha zay fa mandefa hazavà mikasiky ty raha marina amy tany farany ze lavitsy na mitoka any zahay. Afaky mahazo raha io iaby ze kila tany zisiky amy tendrontany antimo marè any. Mivavaky zahay mba ‘hiparitaky malaky amy tany toy avao ty safà Ndranahary’ soa hahazo voninahitsy ie.—2 Tesalonianina 3:1.

• Manao akory ty anampea jw.org io olo maro hianatsy mikasiky ty raha marina amy Baiboly ao?

• Ino ty raha teanao hentea amy adiresinay amy internet ao?