FIANARA 11
Nanoratsy Mikasiky Jesosy Rozy
Hainao va lahilahy amy sary eo reo?... Matio, Marka, Lioka, Jaona, Petera, Jakoba, Joda, noho Paoly. Nivelo niaraky tamy Jesosy lahilahy reo. Nanoratsy mikasiky Jesosy rozy. Ndao hianarantsika ty mikasiky an-drozy.
Ino ty hainao mikasiky lahilahy reo?
Apostoly niaraky nitory tamy Jesosy ty telo amy lahilahy reo. Ia rozy telo reo laha hainao?... Matio noho Jaona voho Petera. Nihay Matio noho Jaona soa Jesosy, ka samby nanoratsy mikasiky azy rozy. Nanoratsy boky raiky kaihy hoe Apokalypsy noho taratasy telo kaihy hoe Jaona Voalohany, Jaona Faharoe, noho Jaona Fahatelo apostoly Jaona. Nanoratsy taratasy roe amy Baiboly ao apostoly Petera. Kaihy hoe Petera Voalohany noho Petera Faharoe taratasy reo. Nitantarany Petera tamy taratasiny faharoe tao, ty raha niseho lafa niresaky baka an-danitsy any mikasiky Jesosy, Jehovah. Nivola Jehovah tamy zay hoe: ‘Io ro anakilahiko, teako sady reharehako.’
Ahaizantsika mikasiky Jesosy koa ty raha nisoraty lahilahy sisany amy sary eo reo. Marka ty raiky amin-drozy. Azo antoky fa teo ie, lafa nisambory Jesosy sady nihitany iaby ty raha niseho teo. Lioka koa ty raiky. Dokotera ie sady azo antoky koa fa nanjary Kristiana tafara ty nahafaty Jesosy.
Rahalahy Jesosy ty roe amy lahilahy mpanoratsy Baiboly hitanao amy sary eo io. Ia ty anaran-drozy laha hainao?... Jakoba noho Joda. Tsy nino Jesosy tse rozy tamy voalohany. Nisy fotoa aza nataon-drozy hoe voavoa ie. Fe nino Jesosy avao rozy tafara atoy, le nanjary Kristiana.
Paoly azy hitanao farany amy sary eo io. Mpanoratsy Baiboly koa ie. Saoly ty anarany taloha ty naha Kristiana azy. Tsy teany sady nampijalijalìny ty Kristiana. Hainao va hoe nanao akory ty nahavy azy ho Kristiana?... Ndraiky andro, lafa nandeha tan-dala teny Paoly, le nahare feo niresaky taminy baka an-danitsy any. Jesosy niresaky taminy io! Hoy ty asany tamy Paoly: ‘Manino iha ro mampijalijaly ty olo mino ahy?’ Tafarany zay, le nanjary Kristiana Paoly. Nisoraty Paoly ty boky 14 amy Baiboly ao, manomboky amy Romanina zisiky amy Hebreo.
Mamaky Baiboly tsika sanandro, sa tsy zay?... Mahay raha maro mikasiky Jesosy tsika, lafa mamaky Baiboly. Mbo ta hianatsy mikasiky Jesosy va iha?...