Manompoa ani-Jehovah Avao Manahaky ani-Petera

1. Nanao akory Petera lafa nanao fahagagà Jesosy mba hahazoany fia maro?

NIHAZA avao Petera tamy haly iny le zisiky vaky andro, fe tsy nisy raha niazony ndre raiky. Tampoky teo, nivola taminy Jesosy hoe: “Mandehana an-daliky eny, le alatsaho ty haratonareo le hahazo fia nareo!” (Lioka 5:4) Nisalasala Petera hoe tsy hahazo fia ie, fe nataony avao raha nampanaovini-Jesosy azy iny. Nahazo fia maro biby Petera noho lahilahy niaraky aminy rey, ka nitataky harato iny. Lafa nihain-drozy fa nanao fahagagà Jesosy, le “nitseriky biby rozy.” Farany, nivola Petera hoe: “Tompo ô, mandehana fa ka mihariny ahy fa mpanota aho.” (Lioka 5:6-9) Atao raha nahatsapa Petera hoe tsy maeva hanori-dia ani-Jesosy ie.

2. Manino ro tena manampy antsika ty mandiniky ty modelini-Petera?

² Marina aloha ty ahini-Petera satria “mpanota” vatany ie. Hita amy Soratsy Masy ao fa nivola na nanao raha nanenenany ie kindraiky. Misy fotoa koa va iha mahatsapa manahaky ani-Petera? Misy toetsy teanao hohasoavy va fe tsy vitanao ty manao ani-zay? Sa misy handranao tsy mety resinao mihintsy? Laha zay ie, le hampahery anao ty mianatsy ty modelini-Petera. Fa manino? Eritsereto zao: Azoni-Jehovah natao ty tsy nampanoratsy ani-hadisoani-Petera rey amy Baiboly ao. Fe nampanoratiny raha rey mba handrambesantsika fianara. (2 Tim. 3:16, 17) Tena nialy mafy tamy ty handrany Petera. Ka lafa mianatsy mikasiky azy tsika, le ho haintsika fa tsy mitamà Jehovah hoe tsy hanao hadisoa mihintsy tsika. Teany tsy ho kivy tsika fa hiezaky avao ndre manan-kandra aza.

3. Manino tsika ro tokony hiezaky avao?

³ Manino tsika ro tokony hiezaky avao? Satria arakaraky ty iezahantsika manao raha raiky, le matetiky tsika mihamahay ani-raha iny. Toy misy ohatsy: Laha ta hahay hititiky gitara ty olo raiky, le mety anatini-tao maromaro ie vo hahay. Anatini-fotoa ianarany io, le mety hanao diso matetitetiky ie. Fe laha tsy kivy ie fa manohy mianatsy avao, le hihamahay. Ndre fa tena mahay aza ie, le misy fotoa ie mety hanao diso avao. Fe tsy kivy ie. Miezaky mianatsy avao ie amy zay tena hahay soa. Manahaky ani-zay koa fa mety mbo hampimpoly hanao hadisoa tsika, ndre mahatsapa aza hoe fa nandresy raha raiky nampalemy antsika. Fe miezaky avao tsika mba ho afaky amy raha iny. Samby mivola na manao raha hanenenantsika tsika. Fe laha tsy kivy tsika, le hampeani-Jehovah ka lasa hahavita hiala tsikelikely ani-raha iny. (1 Pet. 5:10) Ndao hodinihintsika ty ezaky nataoni-Petera mba handresea ty handrany. Niferinesani-Jesosy ie ndre nanao hadisoa aza. Lasa mahavy antsika hanohy hanompo ani-Jehovah avao raha zay satria haintsika hoe hiferinay antsika koa Jesosy.

TY HANDRANI-PETERA NOHO TY FITAHIA NIAZONY

4. Laha hentea ty Lioka 5:5-10, ino ty raha nivolanini-Petera mikasiky azy, fe ino ty nivolanini-Jesosy taminy mba hanomeza toky azy?

⁴ Tsy resahini-Soratsy Masy ty antony nahavy ani-Petera nivola hoe “mpanota” ie. Tsy resahiny koa hoe fahotà ino ro tan-tsainy tao lafa ie nivola an’io. (Vakio Lioka 5:5-10.) Fe mety nanao hadisoa bevata vatany ie. Haini-Jesosy hoe natahotsy Petera, mety hoe satria nahatsapa ie hoe tsy maeva hanori-dia ani-Jesosy. Haini-Jesosy koa fa hahavita tsy hivaliky mihintsy Petera. Farany nivola taminy Jesosy hoe: “Ka matahotsy.” Nisoa fanahy ie lafa nivola ani-zay. Natoky ani-Petera Jesosy, ka tena nanova ty fiainany raha zay. Nijano tsy nihaza Petera noho Andrea rahalahiny tafarani-zay, le niaraky tamy Jesosy hitory noho hampianatsy. Bakeo nahazo fitahia maro baka amy Jehovah rozy.​—Mar. 1:16-18.

5. Ino ty fitahia niazoni-Petera lafa ie nandresy ty tahotsiny ka naneky hanori-dia ani-Jesosy?

⁵ Maro ty raha miavaky nihitani-Petera lafa ie nanori-dia ani-Kristy. Nahita ani-Jesosy nitaha ty marary, ohatsy, ie, nandroaky demonia, noho namelo ty maty mihintsy aza.b (Mat. 8:14-17; Mar. 5:37, 41, 42) Nahita fahità raiky miavaky koa ie satria nihitany ty voninahitsini-Jesosy lafa ie ho lasa Mpanjakani-Fanjakà-Ndranahary. Tena nisy vokany tamy Petera raha niseho io. (Mar. 9:1-8; 2 Pet. 1:16-18) Tsy ho nihitani-Petera mihintsy raha reo laha ie tsy nanori-dia ani-Jesosy. Azo antoky fa tena nifalifaly ie satria tsy naneky ho resini-hakivia ka nahazo ani-fitahia iaby reo!

6. Avy le niresini-Petera va ty handrany? Hazavao.

⁶ Ndre teo ty raha nihitani-Petera noho nireny, le mbo nialy mafy tamy handrany rey avao ie. Diniho moa ohatsy manaraky retoa. Lafa nivola Jesosy hoe hijalijaly noho ho maty ie mba hahatanteraky ty faminaniani-Baiboly, le nandrara azy mafy Petera. (Mar. 8:31-33) Matetiky Petera noho apostoly sisany rey nialy hevitsy avao hoe ia ty ambony amin-drozy. (Mar. 9:33, 34) Tamy haly talohani-nahafatesani-Jesosy iny, le nitapahini-Petera ty sofini-lahilahy raiky zay. (Jaona 18:10) Mbo tamy haly io avao, le natahotsy ty raha hovolanin’olo mikasiky azy Petera ka nandà intelo ie fa nao tsy hainy Jesosy. (Mar. 14:66-72) Nirohaky ty tany amy zay ie tafarani-zay.​—Mat. 26:75.

7. Ino ty tombotsoa niazoni-Petera lafa nivelomy tamy maty Jesosy?

⁷ Nikivy biby Petera sady nalahelo, fe tsy nahafoy azy Jesosy. Lafa nivelomy tamy maty Jesosy, le natorony ani-Petera hoe mbo teany avao ie. Nivolaniny Petera mba hikarakara ty aondriny. (Jaona 21:15-17) Tsy nandà Petera fa parè hanao ze raha nampanaovini-Jesosy azy. Lafa niavy ty Pentekosta, le ta Jerosalema ao ie, ka nahazo fanahy masy. Vo sambany tamy zay nisy olo lasa voahosotsy, le tanisany ie.

8. Ino ty hadisoa bevata nataoni-Petera ta Antiokia any?

⁸ Ndre fa nilasa Kristiana voahosotsy aza Petera, le mbo nialy mafy tamy handrany rey avao. Tamy tao 36 A.K., ohatsy, le nirahi-Ndranahary ho amy Kornelio any Petera. Tsy Jiosy Kornelio io. Lafa tany Petera le nihosora-Ndranahary fanahy masy Kornelio. Hita baka amin’io fa “tsy mitingy volon’olo Ndranahary” sady afaky ho anisani-fiangona kristiana ndre olo tsy Jiosy. (Asa. 10:34, 44, 45) Tafarani-zay, le nanomboky niaraky nihina tamin’olo hafa firenena Petera, kanefa mbo tsy nanao ani-zay mihintsy ie talohani-zay. (Gal. 2:12) Fe nieritseritsy ty Kristiana jiosy sisany hoe tsy tokony hiaraky mihina ty Jiosy noho ty olo hafa firenena. Lafa niavy ta Antiokia any amy zay Kristiana jiosy reo, le tsy niaraky nihina tamy rahalahiny tsy Jiosy rey Petera, satria natahotsy ie tsy no hampeloky an-drozy. Nihitani-Paoly hoe niatsaravelatsihy Petera ka nanariny mafy tamason’olo iaby teo. (Gal. 2:13, 14) Fe ndre teo hadisoa nataoni-Petera io, le tsy nieny ie fa niezaky avao. Ino ty nanampy azy?

INO TY NANAMPY ANI-PETERA HANOMPO ANI-JEHOVAH AVAO?

9. Ino ty raha volanini-​Jaona 6:68, 69 ka mampiseho fa tsy nivaliky Petera?

⁹ Tsy nivaliky Petera. Tsy nisy raha nengany hisaka azy tsy hanori-dia ani-Jesosy sasy. Akory ty nampisehoany hoe tsy nivaliky ie? Nisy fotoa Jesosy nivola raha tsy niazoni-mpianatsiny rey. (Vakio Jaona 6:68, 69.) Tsy nandiny ani-Jesosy hanazava ani-raha iny na nangataky fanazavà ty ankamaroan-drozy fa avy le nijano tsy nanori-dia ani-Jesosy. Fe tsy nanao ani-zay Petera. Tsy nivaliky ie ka nivola fa ‘ty raha volanini-Jesosy avao ro hahazoa fiaina mandrakizay.’

10. Akory ty nampisehoani-Jesosy fa natoky ani-Petera ie? (Henteo koa sary io.)

¹⁰ Tsy nahafoy ani-Petera Jesosy. Tamy haly farany niainani-Jesosy tan-tany etoy, le nihaini-Jesosy fa hanenga azy Petera noho apostoly sisany rey. Fe natoky Jesosy fa hiova Petera sady tsy hivaliky mihintsy. (Lioka 22:31, 32) Haini-Jesosy hoe ‘mazoto ty say, fa ty nofotsy ro malemy.’ (Mar. 14:38) Ka ndre fa nandà azy aza Petera, le mbo tsy nahafoy ani-apostoliny io avao ie. Lafa nivelomy Jesosy, le niseho tamy Petera ie. Mety Petera raiky avao ro teo tamy zay. (Mar. 16:7; Lioka 24:34; 1 Kor. 15:5) Azo antoky fa tena nampahery ani-apostoly kivy io raha zay!

11. Ino ty nataoni-Jesosy mba hanomeza toky ani-Petera hoe hikarakara azy Jehovah?

¹¹ Nameani-Jesosy toky Petera hoe hikarakara azy Jehovah. Lafa nivelomy Jesosy, le nanao fahagagà ie mba hanomeza fia ani-Petera noho apostoly namany rey. (Jaona 21:4-6) Azo antoky fa nanome toky ani-Petera fahagagà io hoe hanome ze raha ilàny Jehovah. Mety nitiaroni-apostoly io vasa raha nivolanini-Jesosy iny hoe hameani-Jehovah ze raha ilàny ze manao voaloha lista ty Fanjakàny. (Mat. 6:33) Nanoriky ani-raha io Petera ka ty asa fitoria ro nataony voaloha lista tamy ty fiainany, fa tsy fihazà fia. Tsy natahotsy mihintsy ie tamy Pentekosta tao 33 lafa nitory, ka lasa nisy olo an’arivony naneky ty vaovao soa. (Asa. 2:14, 37-41) Tafarani-zay ie, nanampy ty Samaritanina noho ty olo tsy Jiosy hianatsy mikasiky ani-Kristy noho hanori-dia azy. (Asa. 8:14-17; 10:44-48) Azo antoky fa tena nampiasa ani-Petera tamy fomba miavaky Jehovah mba hanampy olo sankarazany ho anisani-fiangona.

INO TY FIANARA HO ANTSIKA?

12. Manino ty tantarani-Petera ro afaky manampy antsika laha mbo mialy mafy amy ty handrantsika avao tsika ndre fa miezaky aza?

¹² Afaky manampy antsika Jehovah le ho vitantsika ty hanompo azy avao. Mety tsy ho mora raha zay, sirtò moa laha nisy handrantsika tsy mety resintsika ndre fa niezaky mafy aza tsika. Kindraiky aza, mety ho sarotsy mandilatsy nahazo ani-Petera rey ty raha mahazo antsika. Fe afaky manome hery antsika Jehovah mba hahavy antsika tsy ho kivy. (Sal. 94:17-19) Eritsereto, ohatsy, ty raha nahazo ani-rahalahy raiky zay. Nanao firaisa tamy lahilahy manahaky azy avao ie tanatini-tao maro, taloha ty nianarany fahamarina. Tena nanova tanteraky ty fiainany ie, le nanoriky ty fitsipikini-Baiboly. Fe mbo mialy mafy avao ie kindraiky mba tsy hieritseri-draty. Ino ty nanampy azy tsy ho kivy? Hoy ty asany: “Manome hery ahy Jehovah.” Mbo nivola koa ie hoe: “Nianarako hoe ho vitako ty miay mifanaraky amy fahamarina avao satria eo ty fanahini-Jehovah. Afaky nampiasa ahy Jehovah, sady ndre eo aza ty handrako, le tsy mieny ie fa manome hery avao.”

13. Akory ty azontsika anahafa ty modelini-Petera, voaresaky amy Asan’ny Apostoly 4:13, 29, 31? (Henteo koa sary io.)

¹³ Hitantsika fa nanao hadisoa bevata Petera satria natahotsy olo. Fe lasa tsy navaka olo ie satria nivavaky mba hana herim-po. (Vakio Asan’ny Apostoly 4:13, 29, 31.) Afaky mandresy ty tahotsintsika koa tsika. Diniho ty raha nahazo ani-Horst, rahalahy tanora nipetraky tan’Alemaigny any tamy Aly Bevata II iny. Tamy fotoa io, le niforoseva ty olo mba hanao fiarahabà manoka raiky zay. Ho zao dikani-raha io: “Hanavotsy antsika Hitler.” Haini-rahalahy Horst hoe tsy mety ty manao ani-fiarahabà io. Fe nanao ie kindraiky satria navaka ani-mpampianatsy an-drozy noho mpiaraky mianatsy aminy rey. Tsy neloky azy babany noho reniny fa vomaiky niaraky nivavaky taminy, le nangataky ani-Jehovah mba hanome herim-po azy. Nampeani-ray aman-dreniny Horst sady niantehitsy tamy Jehovah. Vokany lasa nihanahazo hery ie ka nahavita tsy nivaliky. Ho zao ty nivolaniny tafara atoy: “Tsy nahafoy ahy mihintsy Jehovah.”c

14. Akory ty ataoni-mpiaraky aondry be fitiava mba hanomeza toky ani-ze kivy?

¹⁴ Tsy hanary antsika Jehovah noho Jesosy. Tsy maintsy nandramby fanapahan-kevitsy bevata Petera lafa baka nandà ani-Jesosy. Hieny va ie sa hiezaky ho mpianatsini-Kristy avao? Fa nisoloho tamy Jehovah Jesosy mba tsy ho rava ty finoani-Petera. Nambarani-Jesosy tamy Petera vavaky io. Natorony azy koa hoe atokisany ie fa ho afaky hampahery ani-rahalahiny rey afarafara ao. (Lioka 22:31, 32) Mba eritsereto hoe nanao akory Petera lafa nahatiaro ani-raha nivolanini-Jesosy reo! Azo antoky fa nampahery azy raha reo. Lafa tsika handramby fanapahan-kevitsy, le mety hampiasa ani-mpiaraky aondry be fitiava reo Jehovah mba hanampea antsika, amy zay tsika tsy hivaliky mihintsy. (Efes. 4:8, 11) Fa anti-panahy tanatini-tao maro Paul sady miezaky ie mba hanampy ani-ze mila fanampea. Lafa misy kivy rey le ampirisihiny rozy mba handiniky ty raha nataoni-Jehovah tamy voalohany mba hitaoma an-drozy ho amy fahamarina ao. Bakeo ameany toky rozy hoe be fitiava Jehovah sady tsy mivaliky, ka tsy hanary an-drozy. Ho zao ty amaranany azy: “Fa maro avao olo kivy nihitako zay. Fe nahavita nandresy ani-zay rozy satria nampeani-Jehovah.”

15. Manino ty ohatsini-Petera noho Horst ro manaporofo fa marina ty Matio 6:33?

¹⁵ Nanome ze raha nilàni-Petera noho apostoly sisany rey Jehovah. Hanome ze raha ilàntsika koa ie laha ataontsika voaloha lista ty fanompoa azy. (Mat. 6:33) Nieritseritsy hanao mpisava lala Horst, azy niresahintsika taloha eroy iny, tafarani-Aly Bevata II iny. Tena nahantra ie ka nisalasala hoe hahavita hanompo manontolo andro avao va ie kanefa tsy nanan-drala. Ino ty nataony? Nitsapa toetsy ani-Jehovah ie mba hahitany laha tena hanome ze raha ilàny vatany ie. Fitsidihani-mpiandraikitsini-faritsy rozy tamy zay, le nanapa-kevitsy ie hoe hanompo avao amy herinandro iny. Lafa nitampitsy herinandro iny, le nitseriky biby ie lafa nameani-mpiandraikitsini-faritsy iny anvelopy misy drala. Fe tsy nivolaniny tamy Horst hoe baka amin’ia drala iny. Somary maromaro avao raha iny, ka azony nampiasà tanatini-vola maromaro. Hitani-Horst baka amy fanomeza iny fa nanome toky azy Jehovah hoe hanoha azy ie. Nampiasa ty fiainany ie ka nanao voaloha lista ani-Fanjakà iny avao.​—Mal. 3:10.

16. Manino ro mahasoa antsika ty mianatsy mikasiky ani-Petera noho ty raha nisoratiny tamy taratasiny rey ao?

¹⁶ Azo antoky fa tena nifalifaly Petera satria tsy nialàni-Jesosy ie, ndre zay aza ty nangatahiny taloha tany iny! Niezaky nampiofana azy avao Kristy mba ho lasa apostoly tsy mivaliky ie sady ho modely ho ani-Kristiana. Maro biby ty raha azontsika ianara baka amy fampiofana io sady tena mahasoa antsika. Niresaky ty sisany amy raha reo Petera tamy taratasy roe nisoratiny ho ani-fiangona tamy taonjato voalohany rey. Lasa anisani-Baiboly moa taratasy reo henanizao. Hiresaky fampitiarova vitsivitsy baka amy taratasy reo ty lahatsoratsy manaraky, le hatorony antsika koa hoe akory ty azontsika anoriha ani-raha rezay henanizao.