Mpisafo Tany Folo Roe Amby Rey

Niala tamy Vohitsy Sinay teo Israelita rey, le nandeha an-diomonto a Parana any, farany niavy ta Kadesy ao. Le hoy Jehovah tamy Mosesy: ‘Maniraha lahilahy raiky saky foko, zany hoe lahilahy 12. Iraho hanenty ani-Kanana rozy satria hameako an-drozy tany io.’ Mpisafo tany ty ikaiha ty olo manao ani-asa io. Nifily lahilahy 12 amy zay Mosesy. Nivolaniny rozy hoe: ‘Mandehana a Kanana any, le henteo vasa mamokatsy soa tany io. Henteo koa ty olo ao hoe matanjaky sa malemilemy, le henteo koa ty ipetrahan-drozy hoe tranolay sa tanà.’ Nandeha a Kanana any amy zay mpisafo tany 12 rey, anatini-zay Josoa noho Kaleba.

Nimpoly mpisafo tany rey lafa afaky 40 andro, le nanday aviavy, ampongabendanitsy, noho voaloboky. Nivola ty sisany hoe: ‘Soa aloha tany io, fe matanjaky biby ty olo ao sady misy lakorobe ty tanàn- drozy.’ Fe natoky ani-Jehovah Kaleba noho Josoa, ka nivola Kaleba hoe: ‘Ndao malaky fa ho resintsika rey!’ Le nivola mpisafo tany folo rey hoe: ‘Vandiny! Be noho abo biby ty olo ao! Kelikely ataho valala io zahay tanilan-drozy teo.’

Tena nikivy Israelita rey. Nimenimeny rozy sady nifampiresaky hoe: ‘Ndao tsika hifily mpitariky hafa, le ndao himpoly a Ejipta any. Ino ilantsika faty atoy io?’ Le hoy Josoa noho Kaleba: ‘Oriho avao ty safàni-Jehovah, le ka matahotsy fa hiaro antsika ie.’ Fe tsy nety nijanjy Israelita rey. Fa ho nivonoan-drozy mihintsy aza Josoa noho Kaleba!

Ino hoasanao ty nataoni-Jehovah? Nivola tamy Mosesy ie hoe: ‘Le mbo tsy manoriky ty safàko avao Israelita reto, hamaroani-raha nataoko ho an-drozy zay. Hijano an-diomonto atoy avao rozy anatini- 40 tao, le engao ho maty atoy. Anakin-drozy reo miaraky amy Josoa noho Kaleba avao ro hilitsy amy tany fa nampitamaniko an-drozy iny ao.’