Nifily ani-Josoa Jehovah

Nitariky ani-Israelita reo Mosesy tanatini-tao maro. Nivola ho zao taminy Jehovah, lafa narìny ho maty ie: ‘Tsy iha ro hitariky ani-Israelita reo hilitsy amy Tany Nampitamany ao. Fe hataoko hitanao lavitsy avao tany io.’ Nangataky tamy Jehovah amy zay Mosesy mba hifily mpitariky vaovao, soa hikarakara ani-vahoaky rey. Le hoy Jehovah taminy: ‘Ndany volano Josoa hoe ie ro nifiliko.’

Nivola tamy vahoaky rey Mosesy hoe fa ho maty ie, ka Josoa ro nifilini-Jehovah hitariky an-drozy amy Tany Nampitama- ny any. Nivola tamy Josoa amy zay Mosesy hoe: ‘Ka matahotsy fa hanampy anao Jehovah.’ Niakatsy tamy Vohitsy Nebo eny Mosesy tsy ela tafarani-zay, le natoroni-Jehovah azy ty tany nampitamaniny ani-Abrahama noho Isaka voho Jakoba. Nimaty Mosesy lafa 120 tao.

Hoy Jehovah tamy Josoa: ‘Ndany mitsaky ani-Vavaranoni-Jordana, le milira a Kanana ao. Ao fa hampeako iha, manahaky ty nataoko tamy Mosesy. Vakio sanandro ty Lalànako. Ka matahotsy. Anovo avao ze raha ampanoviko anao.’

Naniraky mpisafo tany roe amy zay Josoa mba hanenty ani-Jeriko. Ho hitantsika amy tantara manaraky ao hoe nanao akory rozy lafa tany. Lafa nimpoly baka any rozy le nivola fa mety soa amy zay ty militsy a Kanana ao. Nampangoronini-Josoa enta vahoaky rey hamarain’iny. Bakeo nalefany aloha tamy Vavaranoni-Jordana teny tse mpisoro rey sady nilanja ani-vata misy ty fifanekea iny. Be rano iny tamy zay. Fe laha vo nikasiky rano iny ty tomboni- mpisoro rey, le tsy nandeha sasy vavarano iny! Nitsanga tanivo teny amy zay mpisoro rey, le nandeha tamy tany maiky Israelita rey zisiky an-tsisiny eny. Mety ho nitiaron-drozy tamy zay hoe fa nanao fahagagà manahaky an’io Jehovah tamy Riaky Mena tany. Sa akory?

Ela ty ela ka niavy amy Tany Nampitamany ao Israelita rey. Afaky namboatsy trano noho tanà ho ahin-drozy rozy. Afaky nana tonda, tanimboaloboky, noho tany fambolea voankazo koa rozy. Tsy mahatseriky laha nikaihy hoe tany tondra-dronono noho tantely tany io.