Teani-Josia ty Lalànani-Jehovah

Nanjary mpanjakani-Joda Josia lafa nifeno valo tao. Nanao mazỳ ty olo tamy zay sady nanompo sampy iaby. Fe lafa nifeno 16 tao Josia, le niezaky mba hahay hoe ino ty tokony hataon’olo mivavaky amy Jehovah. Naravany iaby amy zay sampy noho alitarani-fivavaha diso rey, tamin’ie 20 tao. Nampamboariny koa ze nisimba tamy tempolini-Jehovah tamin’ie 26 tao.

Nihitani-Hilkia Mpisorobe tamy tempoly tao ty boky mihoro misy ty lalànani-Jehovah. Mety azy nisoratini-Mosesy iny mihintsy vasa io. Nandesini-Safana, azy sekreterani-mpanjaka iny tamy Josia any boky mihoro iny, le nivakiny marè biby taminy. Nijanjy soa Josia, ka hitany hoe fa ela mihintsy ty mpanomponi-Jehovah ro tsy nanoriky ty safàny. Bakeo ie nivola tamy Hilkia hoe: ‘Meloky amintsika henanizao Jehovah. Ndany anontaneo ie hoe ino ty tokony hataontsika.’ Nampiasa ani-Holda mpaminanivavy Jehovah mba hamalea azy hoe: ‘Tsy midary ahy mihintsy ty vahoakini-Joda. Hosaziko rozy. Fe niambany Josia, ka mbo tsy hosaziko tse rozy laha mbo velo ie.’

Lafa naharè ani-zay Josia le nandeha amy tempoly any, bakeo nikaihiny iaby ty olo. Nivakiny marè biby amy zay Lalànani-Jehovah iny. Nampitamà Josia noho vahoaky rey hoe hanoriky ty safàni- Jehovah amy ty fon-drozy iaby rozy.

Fa ela biby zay ty vahoakini-Joda ro tsy nankalaza Paska. Fe nihitani-Josia tamy Lalàna tao hoe tokony hankalazà santao ty Paska, ka hoy ty asany: ‘Ndao tsika hankalaza Paska.’ Bakeo Josia nanoma biby maro mba hatao fanatitsy, le bakeo nasiany mpihira tamy tempoly tao. Farany nankalaza Paska vahoaky rey. Laha vo nivita zay, le nankalaza ty Fetini-Mofo Tsy Misy Levira tanatini-fito andro koa rozy. Tamy Samoela mbo nivelo ro nisy Paska manahaky ani-zay farany. Teani-Josia vatany ty Lalànani-Jehovah. Iha koa va mba tea mianatsy mikasiky ani-Jehovah?