Sakafo Harivani-Tompo

Nankalaza Paska ty Jiosy santao, saky faha-14 amy vola Nisana. Lafa nanao Paska rozy le nahatiaro fa nanafaky an-drozy tsy ho andevo ta Ejipta any Jehovah, le nanday an-drozy ho amy Tany Nampitamany ao. Tamy tao 33, le nankalaza Paska ta Jerosalema tao Jesosy noho apostoliny rey, tamy efitsy raiky anabo etazy zay ao. Lafa baka nihina rozy, le nivola Jesosy hoe: ‘Hamadiky ahy ty raiky aminareo.’ Taitsy biby apostoly rey ka nanontany ani-Jesosy hoe: ‘Ia zao?’ Nivola Jesosy hoe: ‘Ze ameako ani-mofo toy.’ Bakeo nameani- Jesosy ani-Jodasy Iskariota mofo iny. Tonga de nitsanga Jodasy, le niboaky amonto any.

Nivavaky amy zay Jesosy, le nitampatampahiny mofo rey, bakeo nameany ani-apostoliny sisa teo rey. Hoy ty asany: ‘Hano mofo toy. Toy ro mifanandrify amy ty vatako, azy hameako anareo iny.’ Bakeo nanaovany vavaky divay teo rey, le nameany ani-apostoliny rey. Le hoy ty asany: ‘Inomo divay toy. Toy ro mifanandrify amy ty lioko, azy hameako iny, mba hanengà ty hadisoani-ze nanota. Mampitamà anareo aho fa ho mpanjaka miaraky amiko an-danitsy any nareo. Manaova manahaky ani-zao nareo santao mba hahatiarova ahy.’ Santao, le mbo miaraky mivory avao ty mpanori-dia ani-Jesosy amy hariva io. Sakafo Harivani-Tompo ty ikaiha ani-fivoria io henanizao.

Lafa baka nihina rozy, le nialy hevitsy apostoly rey hoe ia ty anabo marè amin-drozy. Fe nivolanini-Jesosy rozy hoe: ‘Ze mieritseritsy ty vatany ho kelikely marè noho farany ambany, le ie ro farany anabo.

‘Namako nareo. Ambarako anareo iaby ze raha nampivolanini- Babako ahy. Sisa kely le handeha ho amy Babako an-danitsy any aho, fa nareo mbo hijano afara. Ho hain’olo hoe mpianatsiko nareo satria mifankatea. Tokony hifankatea nareo, manahaky ty nitiavako anareo.’

Tamy farany, le nivavaky ho ani-mpianatsiny rey Jesosy. Nangataky tamy Jehovah ie mba hiaro an-drozy iaby noho hanampy an-drozy hahay hiaraky miasa. Nivavaky koa ie mba hohamasiny ty anarani- Jehovah. Tafarani-zay, le nihira fiderà ho ani-Jehovah Jesosy noho apostoliny rey bakeo nandeha niboaky. Fa ho avy ty fotoa hanambora ani-Jesosy.