Fanontanean’ny Mpamaky

Lafa Jesosy nankalaza ty Sakafo Harivan’ny Tompo, taia mpianatsy 70 nirahiny hitory taloha tany rey? Niala azy va rozy?

Marina fa tsy teo mpianatsy 70 rey lafa Jesosy nankalaza ty Sakafo Harivan’ny Tompo, fe tsy tokony hieritseritsy tsika hoe tsy nahazo hatò aminy rozy na niala azy. Mba ta hiaraky amy apostoliny rey avao Jesosy tamy fotoa io.

Samby mpianatsin’i Jesosy ndre apostoly 12 rey ndre mpianatsy 70 rey sady nankasitrahany. Nifily lahilahy 12 tamy mpianatsiny maro rey tse Jesosy tamy voalohany, le nikaihiny hoe apostoly. (Lioka 6:12-16) Ta Galilia any ie tamy zay. Tamin’io ie ro ‘nikaiky an-drozy 12 Lahy’, le bakeo “nirahiny hitory ty Fanjakà-Ndranahary noho hitaha olo rozy.” (Lioka 9:1-6) Tafara atoy Jesosy nandeha nana a Jodia any, le bakeo ‘nanendry mpianatsy 70, ka naniraky an-drozy tsiroeroe.’ (Lioka 9:51; 10:1) Nana mpianatsy maromaro nitory mikasiky azy zany Jesosy, sady tamy faritsy samby hafa.

Jiosy mpianatsin’i Jesosy rey ka mbo nila nankalaza ty Paska rozy santao. Mety niaraky tamy fianakavian-drozy zany rozy. (Eks. 12:6-11, 17-20) Lafa nihanariny ty fotoa hahafaty an’i Jesosy, le nandeha ta Jerosalema any ie noho apostoliny rey. Fe tsy nitaominy iaby lafa kila mpianatsiny ta Jodia, Galilia, noho Pere tany, mba hankalaza ty Paska miaraky aminy. Mba ta hiaraky amy apostoliny rey avao ie tamy fotoa io. Hoy ty asany tamin-drozy: “Tena fa niriko ty hiaraky mihina an’ny Paska toy aminareo, alohan’ny hijaleako.”​—Lioka 22:15.

Nisy antony nahavy an’i Jesosy nanao ani-zay. Fa nariny ho maty Jesosy, azy “Anak’aondri-Ndranahary, azy mangalaky ty fahotani-zao tontolo zao iny.” (Jaona 1:29) Ho maty a Jerosalema any ie, satria tany avao ty nanaova soro ho ahi-Ndranahary bakany zay. Nihina anak’aondry ty Israelita lafa nankalaza ty Paska. Nampitiaro an-drozy raha zay hoe nanafaky an-drozy tsy ho andevo baka a Ejipta any Jehovah. Fe mbo soa mandilatsy ani-zay ty soro nataon’i Jesosy satria hanafaky ty olombelo iaby amy ota noho fahafatesa. (1 Kor. 5:7, 8) Lasa anisan’ny fototsy iorenan’ny fiangona kristiana apostoly 12 rey, vokatsin’ny soron’i Jesosy iny. (Efes. 2:20-22) Mivola ty bokin’ny Apokalypsy fa “nisy vato fototsy 12” tanà masy iny, zany hoe Jerosalema Vaovao, le nivoasoratsy tamy vato rey teo “ty anara folo roe ambin’ny apostoly 12 rey, zany hoe ty apostolin’ny Anak’aondry.” (Apok. 21:10-14) Hana anjara asa bevata amy fanatanteraha ty fikasà-Ndranahary zany apostoly tsy nivaliky rey. Zay zany ty antony nahavy an’i Jesosy nifily an-drozy hiaraky aminy hankalaza ty Paska farany noho ty Sakafo Harivan’ny Tompo.

Tsy niaraky tamy Jesosy nankalaza an’ny Sakafo Harivan’ny Tompo io ty mpianatsy 70 noho ty mpianatsy hafa. Fe ndre zay, le samby handramby soa baka amy Sakafo Harivan’ny Tompo io iaby lafa atao mpianatsy tsy mivaliky. Samby lasa Kristiana voahosotsy rozy iaby. Nanao fifanekea tamy apostoly rey Jesosy tamy haly nanaova an’ny fankalazà iny hoe ho mpanjaka an-danitsy any rozy. Fe tsy rozy avao ro tafilitsy amy raha io, fa anisani-zay koa mpianatsy sisany rey.​—Lioka 22:29, 30.