Nahazo Fanahy Masy Mpianatsy Rey

Folo andro tafarani-niakarani-Jesosy tan-danitsy any, le nahazo fanahy masy mpianatsiny rey. Pentekosta tao 33 tamy zay. Maro ty olo baka an-tany hafa any niavy ta Jerosalema ao mba hankalaza fety. Nisy mpianatsy 120 eo ho eo nivory tamy efitsy anabo etazy zay tao. Tampoky teo, le nisy raha hafahafa. Nisy feo marè biby manahaky tsioky be io ty tan-trano ao. Bakeo nisy raha manahaky lelan’afo ty tanaboni-lohan-drozy kiraidraiky. Nanjary nahay fivolana maro amy zay rozy.

Naharè ani-feo iny vahiny niavy ta Jerosalema tao rey, ka namonjy teny malaky mba hanenty ty raha niseho. Nitseriky rozy lafa naharè ani-mpianatsy rey nahay ty fivolanan-drozy. Nivola rozy hoe: ‘Ka tsy olo baka a Galilia any moa retia io? Ka akory ty nahaizan-drozy ty fivolanantsika?’

Bakeo nitsanga talohan-drozy teo Petera noho apostoly hafa rey. Niresahini-Petera tamin-drozy hoe akory ty nahafaty ani-Jesosy. Nivolaniny koa hoe fa nivelomini-Jehovah ie. Hoy Petera: ‘Fa an-danitsy any Jesosy henanizao, ankavana-Ndranahary eo, le nandatsaky fanahy masy ie satria fa nampitamà ani-zay. Zay mahavy fahagagà hitanareo noho renareo zao.’

Tena nisy vokatsiny tamin’olo rey ty safàni- Petera, ka nivola rozy hoe: ‘Ka ino zany ty tokony hataonay?’ Le hoy Petera: ‘Mila mibebaky noho atao batisa amy anarani-Jesosy nareo. Hahazo fanahy masy koa nareo amy zay.’ Tamy andro iny avao, le olo 3 000 eo ho eo ty natao batisa. Tsy ela avao le fa nimaro biby ty mpianatsy ta Jerosalema tao. Nanampy ani-apostoly rey ty fanahy masy, ka afaky nananga fiangona maro biby rozy. Nahavita nampianatsy ty raha iaby nandidiani-Jesosy koa rozy.