Ampiasao Soa Boky Noho Gazetintsika Rey

Hoy Jesosy: “Fa nahazo tsy nisy takalony nareo, ka manomeza tsy misy takalony.” (Mt 10:8) Manaraky torolala mazava soa io tsika ka tsy mamarotsy Baiboly na boky noho gazety. (2Ko 2:17) Fe misy fahamarina lafovily baka amy Safà-Ndranahary ao boky noho gazety rey. Anaova ezaky mafy noho andania drala be ty fanaova pirinty ani-raha rey noho ty fandefasa azy amy fiangona amy tany toy iaby, ka tokony ho ze tena ilantsika avao ro halàntsika.

Miezaha hahay handiniky lafa manome boky na gazety, ndre lafa mitory amy pilasy maro olo aza. (Mt 7:6) Ka ameamea boky avao ze olo hitanao fa mba miezaha hiresaky aminy soa ho hitanao hoe kinto ie sa tsy kinto. Manao akory, ohatsy, ty hamaleanao fanontanea amy efajoro eo reo? Misy eka raiky va farafahakeliny ty valin-teninao? Soa laha ameanao taratasy mivalo ie laha misalasala iha. Fe laha ie mihintsy ro mangataky gazety na boky, le ho falifaly tsika hanome azy.—Oh 3:27, 28.