TY FIAINANTSIKA KRISTIANA
Oriho Avao ty Fitsipikini-Jehovah Mikasiky Fandaisam-bata
Mametraky fitsipiky mikasiky fandaisam-bata Jehovah Ndranahary. Mandidy, ohatsy, ie fa lahilahy raiky noho ampela raiky ro natao ho mpivaly, sady natao hiaraky zisiky farany rozy. (Mt 19:4-6, 9) Raràny lafa atao fandaisam-bata maloto. (1Ko 6:9, 10) Manome torolala mikasiky fisikina noho fihamina mihintsy aza ie, ka manjary miavaky ty vahoakiny.—De 22:5; 1Ti 2:9, 10.
Maro henanizao ty olo tsy midary ty fitsipikini-Jehovah. (Ro 1:18-32) Ze fisikina noho fihamina, na fandaisam-bata maro mpitea avao ro orihin-drozy. Maro koa ty mirengirengy amy raha raty ataony sady manaraty ani-ze tsy manaraky ty fomba fiainany.—1Pe 4:3, 4.
Vavolombeloni-Jehovah tsika, ka tokony hahasaky hampiseho hoe manaraky ty fitsipiki-Ndranahary. (Ro 12:9) Manao akory ty hanaova ani-zay? Mila ambarantsika ze raha ekeny, fe mahay mandanjalanja avao tsika. Tokony ho hita amy fiainantsika koa hoe anabo ty fitsipiky orihintsika. Afaky mieritseritsy ho zao, ohatsy, tsika lafa mifily pozin’akanjo: ‘Hevitsin’ia ro orihiko lafa hentea ty raha filiko? Ani-Jehovah sa ani-tontolo toy? Hita amy ty poziko noho ty fisikinako va hoe mpanompo-Ndranahary aho?’ Na eritsereto zao, lafa mifily fandahara na filma: ‘Ekeni-Jehovah va fandahara toy? Fandaisam-bata manao akory ro ampirisihiny? Mahavy ahy tsy ho tena tapa- kevitsy halio fandaisam-bata va ty fialam-boly filiko? (Sl 101:3) Mety haminga ty fianakaviako na ty olo hafa va raha io?’—1Ko 10:31-33.
Manino tsika ro mila manoriky ty fitsipiky mikasiky fandaisam-bata baka amy Jehovah? Fa haripakini-Jehovah ty firenena noho ty raha raty iaby. (Ezk 9:4-7) Ze manao ty sitraponi-Jehovah avao ro ho sisa tavela. (1Jn 2:15-17) Ndao ho tohanantsika ty fitsipikini-Jehovah, amy zay hanome voninahitsy a Ndranahary ze mahita ty fandaisam-bata soa ananantsika.—1Pe 2:11, 12.
Hita amy ty fisikinako noho ty fihaminako va ty fitsipiky teako horihy?
HENTEO TY VIDEO HOE MINAMÀ AMY JEHOVAH: LAHILAHY RAIKY, AMPELA RAIKY, BAKEO DINIHO FANONTANEA RETOA:
Manino ro hendry tsika laha manoriky ty fitsipikini-Jehovah?
Manino ty baba noho reny ro mila mampianatsy ty anakiny mbo kelikely mikasiky ty fitsipikini-Jehovah?
Manao akory ty ahafahantsika manampy ty hafa handramby soa baka amy hasoan-toetsi-Ndranahary, ndre mbo kelikely tsika ndre fa be?