TY FIAINANTSIKA KRISTIANA
‘Nisaotsy a Ndranahary Paoly, le Nahazo Hery’
Lafa nireni-fiangona ta Roma tao hoe niavy Paoly, le nisy rahalahy solontena maromaro nandeha 64 km mba hitsena azy. Ino ty vokatsini-fitiava feno fahafoizam-batan-drozy zay tamy Paoly? “Lafa nahita an-drozy Paoly, le nisaotsy a Ndranahary, le nahazo hery.” (As 28:15) Malaza ho mpampahery ty fiangona tsidihiny Paoly. Fe nigadra ie tamy fotoa io, ka ie ro nandramby fampahereza.—2Ko 13:10.
Mifindrafindra amy fiangona maromaro koa henanizao ty mpiandraikitsini-faritsy mba hampahery ty rahalahy noho anabavy. Manahaky ty vahoaki-Ndranahary iaby avao rozy, ka mety ho vozaky, hiasa loha, na ho kivy kindraiky. Lafa mitsidiky ty fiangonanareo ty mpiandraikitsini-faritsy miaraky amy valiny amy manaraky, ino ty azonao atao mba hampahereza an-drozy, amy zay mba hisy “fifampahereza”?—Ro 1:11, 12.
Tohano ty fivoria alohani-fanompoa. Mahazo fampahereza ty mpiandraikitsini-faritsy lafa manao ezaky ty mpitory mba hahazoa tombony baka amy herinandro manoka iny. (1Te 1:2, 3; 2:20) Afaky mieritseritsy hanao mpisava lala mpanampy iha amy vola itsidihany iny. Teanao va ty hiaraky manompo aminy noho ty valiny na hiaraky mampianatsy amy ty raiky amin-drozy? Tean-drozy ty miaraky miasa amy mpitory sankarazany, anatini-zay ty vaovao na tsy ampy fahaiza loatsy amy fanompoa.
Mazotoa mandramby vahiny. Afaky manome trano hiroroa va iha na miaraky misakafo amin-drozy? Asehonao amy mpiandrakitsini-faritsy iny noho ty valiny amy zay fa teanao rozy. Tsy mitamà raha tena miavaky marè rozy.—Lk 10:38-42.
Janjino noho oriho ty tari-dala noho torohevitsy ameany. Tena tea antsika ty mpiandraikitsini-faritsy ka manampy antsika hahita ty fomba azontsika anasoava ty fanompoantsika ani-Jehovah. Voatery manome torohevitsy henjakenja ie kindraiky. (1Ko 5:1-5) Fa tena mahafaly azy laha manoriky safà noho maneky tsika.—He 13:17.
Mahaiza misaotsy. Resaho amy mpiandraikitsini-faritsy noho ty valiny hoe ino ty raha soa niazonao baka amy ty ezaky nataon-drozy. Azonao resahy mivanta raha zay, na soratinao amy taratasy na karta kelikely.—Kl 3:15.