Mampiasà Video Lafa Mampianatsy

Mahakinto ty raha hita maso sady manampy olo hahay noho hahatiaro ty raha ianarany. Nampiasa raha hita maso Jehovah, azy Mpampianatsy Be Voninahitsy iny mba hampità hevitsy bevata. (Ge 15:5; Je 18:1-6) Ho zay koa ty nataoni-Jesosy, azy Mpampianatsy Bevata iny. (Mt 18:2-6; 22:19-21) Laha amy resaky raha hita maso zay le ty video zao ro tena mandaitsy tato ho ato. Mampiasa video va iha lafa mampianatsy Baiboly?

Misy video folo natao hanampy antsika lafa mampianatsy amy bokikely Vaovao Soa Baka amy Ndranahary! Mifanaraky amy raiky amy fanontanea natao soratsy matevy rey matetiky ty lohatenini-video reo kiraidraiky. Mampahatiaro antsika bokikely amy jw.org ao iny hoe aia iaby ro tokony hampisehoantsika ani-video reo. Ankoatsini-reo, le mbo misy video maro hafa koa manampy antsika hampianatsy amy boky fampianarantsika rey.

Misy foto-kevitsy mety tsy hazava amy mpianatsinao va? Sa misy raha manahira azy manoka? Milà video hahasoa azy amy jw.org® na amy Tele JW® ao. Vasa hohenteanao miaraky amy mpianatsy iny ty raiky amy video rey le hiarahanareo midiniky.

Misy video miboaky avao sambola. Saky manenty ani-rey iha, le eritsereto hoe akory ty azonao ampiasà azy lafa mampianatsy.