Ino ty Hatao Laha ta Hanombo-dresaky amy Taratasy Mivalo?

Nisy hevitsy azo resahy ty amy fononi-Kahiem-pivoria amy Fiaina Noho Fanompoa, nanomboky tamy Zanviè 2018. Nampirisihy tsika mba hifantoky amy fifampiresaha amin’olo itoriantsika rey fa tsy amy fametraha boky na gazety avao. Mba hanampea ty mpitory hanova ty fahazarany, le naseho amy video modely rey hoe akory ty hampiasà Baiboly avao mba hanomboha resaky. Midika va raha zay hoe tsy tokony hampiasa boky na gazety tsika lafa mitory santrano? Tsy zay mihintsy! Soa anomboha resaky, ohatsy, ty taratasy mivalo. Azontsika atao ty mampiasa ani-fomba manaraky retoa lafa tsika mampiasa ani-taratasy mivalo rey:

1. Apetraho fanontanea amy pejy voalohany eo reo.

2. Atorò amy ze andinin-teny amy pejy faharoe anabo eo ty valiny ameani-Baiboly. Laha ampy ty fotoa, le vakio noho iaraho midiniky ty raha resahini-taratasy mivalo iny anatiny ao.

3. Ameo ani-tompon-trano iny taratasy mivalo iny, le ampirisiho ie mba hamaky azy amy fotoa mety aminy.

4. Alohani-handehananao, le atorò azy ty fanontanea amy hoe “Eritsereto Zao” eo, le mifanaova fotoa aminy mba handiniha ty valiny ameani-Baiboly.

Iaraho midiniky aminy ty valiny lafa mimpoly eo iha, le mametraha fanontanea hafa horesahinareo amy manaraky. Afaky mifily fanontanea baka amy tranonkalantsika ao iha, na baka amy boky na bokikely amy pejy farani-taratasy mivalo iny eo. Amy fotoa mety soa, le atorò azy ty bokikely Vaovao Soa Baka amy Ndranahary! na boky na bokikely hafa baka amy Fitaova Fampianara ao.