Ampeo Hana Fahaiza ty Anakinao

Mivalintoa tontolo toy ka ataony ze hahavy antsika hieritseritsy ty raha soa ho raty noho ty raha raty ho soa. (Is 5:20) Mampalahelo fa manao raha halani-Jehovah ty olo sisany. Ohatsy hoe lahilahy mandry amy lahilahy na ampela mandry amin’ampela. Mety hitao ty anakintsika hanaraky an-drozy koa ty mpiaraky mianatsy aminy na ty olo hafa. Mila ampiomaninao zany rozy mba ho afaky hiatriky ani-zay noho handresy fitsapà hafa. Ino ty azonao atao?

Ampianaro fitsipikini-Jehovah ty anakinao. (Le 18:3) Ampianaro an-drozy tsikelikely koa ty raha volanini-Baiboly mikasiky firaisa, fe ampifanaraho amy ty taon-drozy raha zay. (De 6:7) Eritsereto zao: ‘Fa nampianariko ty anako va hoe ino ty fihetsiky tsy azon’olo hafa atao aminy, ndre mampiseho fitiava azy olo iny? Ampianariko azy koa va hoe manino ie ro tokony hanao siky maotina? Le manino ty olo hafa ro tokony hanaja azy, zany hoe ty vatany? Fa hay ty anako va ze tokony hatao laha misy olo ta hampanenty azy sary tiva, na mampirisiky azy hanao raha tsy teani-Jehovah?’ Ho voaaro ty anakinao laha ampianarinao sandrany. (Oh 27:12; Mpto 7:12) Laha manao ani-zay iha, le atoronao hoe teanao fanomeza lafovily baka amy Jehovah io.—Sl 127:3.

HENTEO TY VIDEO HOE “MANORENA TRANO HAHARITSY: AROVO TSY HO AZONI-RAHA RATY TY ANAKINAO”, BAKEO VALEO FANONTANEA RETOA:

• 

  Manino ty olo sisany ro misalasala hampianatsy ty anakiny mikasiky firaisa?

• 

  Manino ty baba noho reny ro tsy maintsy mampianatsy ty anakin-drozy hifanaraky amy “ty fananara noho ty fomba fisainani-Jehovah”?—Ef 6:4

• 

  Ino ty nataoni-fandaminani-Jehovah mba hanampea ty baba noho reny hampianatsy ty anakin-drozy mikasiky firaisa?—w19.05 12, efajoro

• Manino nareo ro tokony hifampiresaky matetiky amy ty anakinareo tany mbo tsy misy problemo?