Asehò fa Teanao ty Fianakavianao

Sahala koly io ty fitiava, ka mampiharo raiky ty fianakavia. Laha tsy mifankatea rozy, le tsy afaky hiharo raiky noho hiaraky hiasa. Akory ty azoni-lahilahy manambaly, ty ampela manambaly voho ty baba noho reny ampisehoa fitiava amy fianakaviany eo?

Ty lahilahy be fitiava le mandiniky ty raha ilàni-valiny, ty hevitsiny, noho ty raha tsapany. (Ef 5:28, 29) Manome ze raha ilàny amy lafiny ara-bata noho amy lafiny ara-panahy ie, anatini-zay ty fanaova Fotoam-pivavahani-fianakavia tsy tampaky. (1Ti 5:8) Ty ampela be fitiava koa maneky ty valiny sady mampiseho “fanajà laliky” azy. (Ef 5:22, 33; 1Pe 3:1-6) Samby tokony ho parè hifanenga hadisoa rozy morovaly. (Ef 4:32) Laha be fitiava koa ty baba noho reny, le hidary ty anany kiraidraiky sady hampianatsy an-drozy ho tea ani-Jehovah. (De 6:6, 7; Ef 6:4) Eritseretin-drozy hoe ino ty raha sarotsy mahazo ty anan-drozy an-dakilasy any? Ino ty ataon-drozy lafa misy mitao an-drozy hanao raha raty? Hahatsapa ho voaro noho hilamin-tsay ty kiraidraiky anivoni-fianakavia eo laha mifankatea.

HENTEO TY VIDEO HOE ATORÒ AMY FIANAKAVIANAO FA TSY MIOVAOVA TY FITIAVANAO, BAKEO VALEO FANONTANEA RETOA:

• 

  Akory ty ampisehoa ty lahilahy fa tea noho mikarakara ani-valiny ie?

• 

  Akory ty ampisehoa ty ampela fa manaja laliky ani-valiny ie?

• 

  Akory ty ataoni-baba noho reny be fitiava mba hampianara ty anany ty Safà-Ndranahary?