Ia ty “Mpanjakani-Avaratsy” amy Fotoani-Farany?

1. Ino ty raha haintsika baka amy faminaniani-Baiboly?

HANAO akory ty vahoakini-Jehovah lafa afarafara ao? Tsy voatery haminavina tsika. Fa nambara amintsika amy faminaniani-Baiboly ao ty raha bevata hiseho mahavoakasiky antsika iaby. Misy faminania raiky zay manampy antsika hahay ty raha hataoni-firenena sisany farani-ze matanjaky an-tany etoy. Amy Daniela toko faha-11 ty misy azy. Tantaraniny ao ty mikasiky ani-mpanjaka roe mifanohitsy rey, tsy ia zay fa ty mpanjakani-avaratsy noho ty mpanjakani-antimo. Fa nitanteraky ty tampany bevata amy faminania io, ka matoky tsika fa mbo ho tanteraky koa ty ambiny.

2. Laha hentea ty Genesisy 3:15 noho Apokalypsy 11:7 noho 12:17, ino ty soa hotiarovintsika lafa mianatsy ani-faminaniani-Daniela iny?

² Mba hahatakarantsika ani-faminania amy Daniela toko faha-11 ao iny, le soa hotiarovintsika fa ze mpanjaka noho fanjakà nampiova ty fiainani-vahoakini-Jehovah avao ro resahiny ao. Ndre vitsivitsy amin’olo an-tany etoy avao aza ro manompo ani-Jehovah, le mahakasiky an-drozy matetiky ty raha bevata miseho an-tany etoy. Ino ty mahavy ani-zay? Satria ty raha farani-ze bevata kendreni-Satana noho ty tontolony, le ty handripaky ani-ze olo manompo ani-Jehovah noho Jesosy. (Vakio Genesisy 3:15 noho Apokalypsy 11:7; 12:17.) Soa hotiarovy koa fa tokony hifanaraky amy faminania hafa amy Safà-Ndranahary ao ty faminaniani-Daniela. Tsy ho marina mihintsy aza ty fahatakarantsika ty faminaniani-Daniela laha tsy ampitovizintsika amy andinin-teny hafa amy Baiboly ao.

3. Ino ty horesahintsika amy lahatsoratsy toy noho amy lahatsoratsy manaraky ao?

³ Hotiarovintsika avao hevitsy reo lafa handiniky ty Daniela 11:25-39 tsika henanizao. Hohenteantsika tse hoe ia ty nimpanjakani-avaratsy noho mpanjakani-antimo tamy 1870 zisiky amy 1991, le ho hitantsika hoe manino ro mila areny ty fahatakarantsika ty tampany amy faminania io. Handiniky ty Daniela 11:40–12:1 tsika amy lahatsoratsy manaraky. Vomaiky hazava amintsika amy zay hoe ino ty ambarani-faminania io mikasiky ty raha niseho nanomboky tamy 1991 zisiky amy Hara-magedona. Lafa mandiniky ani-lahatsoratsy reo iha, le soa laha henteanao ty sarisary hoe “Mpanjaka Roe Mpifahavalo amy Fotoani-Farany.” Ndao tse hohenteantsika hoe ino ty hanampy antsika hahay ani-mpanjaka roe amy faminania io.

AKORY TY HAHAIZANTSIKA TY MPANJAKANI-AVARATSY NOHO TY MPANJAKANI-ANTIMO?

4. Ino ty raha telo mila henteantsika mba hahaiza ty mpanjakani-avaratsy noho ty mpanjakani-antimo?

⁴ Anara nikaiha ty fahefà ara-politiky tavaratsin’Israely noho tantimony any ty hoe “mpanjakani-avaratsy” noho “mpanjakani-antimo” tamy voalohany. Manino tsika ro mivola ani-zay? Ho zao ty hafatsy nambarani-anjely niresaky tamy Daniela iny: “Avy aho hanambara aminao ze raha hahazo ty firenenanao amy andro farany.” (Dan. 10:14) Zisiky tamy Pentekosta tao 33, le ty firenenan’Israely ara-bakiteny ro nivahoaki-Ndranahary. Fe nanomboky teo, le natoroni-Jehovah mazava soa fa ze mpianatsini-Jesosy tsy mivaliky avao ro vahoakiny. Midika raha zay fa tsy miresaky mikasiky ty firenenan’Israely ara-bakiteny ty tampany maro amy Daniela toko faha-11, fa mikasiky ty mpanori-dia ani-Kristy. (Asa. 2:1-4; Rom. 9:6-8; Gal. 6:15, 16) Miova koa ty mpanjakani-avaratsy noho ty mpanjakani-antimo lafa mandeha ty fotoa. Fe misy raha bevata itovizan-drozy iaby. Voalohany, samby nisy vokany bevata tamy vahoaki-Ndranahary ty fandaisani-mpanjaka reo. Faharoe, hita amy ty raha nataon-drozy amy vahoaki-Ndranahary reo hoe malay ani-Jehovah, azy Ndranahary marina iny, rozy. Fahatelo, nialy fahefà mpanjaka roe reo.

5. Nisy mpanjakani-avaratsy noho mpanjakani-antimo va tanelanelani-tao 100 zisiky amy faramparani-taonjato faha-19? Hazavao.

⁵ Tafarani-tao 100 le nanomboky nimaro Kristiana sandoky ty tamy fiangona kristiana. Narahin-drozy ty fampianarani-mpanompo sampy reo, sady navonin-drozy ty fahamarina amy Safà-Ndranahary ao. Nanomboky tamy zay zisiky tamy faramparani-taonjato faha-19, zany hoe tamy 1870, le tsy nisy mpanompo-Ndranahary voalamy anatini-fandamina raiky tan-tany etoa. Nihamaro ty tsimparifary, zany hoe ty Kristiana sandoky, ka nanjary tsy hita ty tena Kristiana. (Mat. 13:36-43) Manino tsika ro mila mahay ani-zay? Satria midika raha zay fa tanelanelani-tao 100 zisiky amy 1870, le tsy nisy fanjakà na mpanjaka azo kaihy hoe mpanjakani-avaratsy na mpanjakani-antimo. Tsy nisy vahoaki-Ndranahary azon-drozy nitafihy tamy zay.b Fe afaky mitamà tsika hoe hisy mpanjakani-avaratsy noho mpanjakani-antimo ndraiky afarafarani-1870. Akory ty ahaizantsika ani-zay?

6. Nanomboky nombia ro voalamy anatini-fandamina raiky ndraiky ty vahoaki-Ndranahary? Hazavao.

⁶ Voalamy anatini-fandamina raiky ndraiky ty vahoaki-Ndranahary nanomboky tamy 1870. Tamy fotoa zay Charles Russell noho ty namany ro nanomboky nianatsy Baiboly niaraky. Rozy ro mpanday hafatsy ‘nikarakara ty lala’ talohani-nitsanganani-Fanjakàni-Mesia. (Mal. 3:1) Voalamy anatini-fandamina raiky ndraiky ty vahoaki-Ndranahary! Nisy fanjakà nampisy fiovà bevata tamy mpanompo-Ndranahary va tamy zay? Ndao hohenteantsika ty mikasiky ani-zay.

IA TY MPANJAKANI-ANTIMO?

7. Ia ty nimpanjakani-antimo zisiky tamy Aly Bevata Voalohany?

⁷ Tamy 1870 tany, le Grande-Bretagne ro nana fahefà amy faritsy bevata marè an-tany etoy, sady nana maramila farani-ze natanjaky. Nampitovizy amy tsifa kelikely ty fanjakàni-Grande-Bretagne. Nandresy tsifa telo hafa ie, tsy ia zay fa Fransy, Espaigny, noho Pays-Bas. (Dan. 7:7, 8) Grande-Bretagne ro nimpanjakani-antimo zisiky tamy Aly Bevata Voalohany. Tanatini-fotoa zay, le Etazinỳ ro nanjary firenena farani-ze nanan-kanana an-tany etoy. Niaraky niasa marìny tamy Grande-Bretagne koa ie.

8. Ia ty nimpanjakani-antimo tanatini-andro farany?

⁸ Nifanampy Etazinỳ noho Grande-Bretagne tamy Aly Bevata Voalohany ka nanjary tafiky matanjaky. Lafa niaraky amy zay Etazinỳ noho Grande-Bretagne, le nanjary Firenena Matanjaky Anglè-Amerikein. Nahavory “tafiky bevata sady mahery” mpanjaka io, araky ty fa nivolanini-Daniela. (Dan. 11:25) Anatini-andro farany, le Grande-Bretagne miaraky amy Etazinỳ avao ro mpanjakani-antimo.c Ka ia ty nimpanjakani-avaratsy?

IA TY MPANJAKANI-AVARATSY?

9. Nombia ro nisy mpanjakani-avaratsy ndraiky, le akory ty nahatanteraky ani-Daniela 11:25 iny?

⁹ Nisy mpanjakani-avaratsy ndraiky tamy 1871, zany hoe tamy tao nanarakaraky ty fotoa nanombohani-Russell noho ty namany niaraky nianatsy Baiboly. Tamy tao io ro nanjary niharo raiky ty faritsy maromaro tan’Eropa tao, ka nanjary Firenena Matanjaky Aleman. Tanatini-tao maro tafarani-zay, le nana zanatany maro Alemaigny. Nifehy firenena maro an’Afriky noho amy Riaky Pasifiky any ie, ka niezaky handrebaky ty tanjakini-Grande-Bretagne. (Vakio Daniela 11:25.) Namory tafiky matanjaky Aleman reo, le kely sisa tsy hitovy amy Grande-Bretagne. Nalefani-Alemaigny hanafiky ani-fahavalony reo tafikiny io tamy Aly Bevata Voalohany.

10. Akory ty nahatanteraky ani-Daniela 11:25b, 26?

¹⁰ Niresahini-Daniela amy zay hoe ino ty hiseho amy Fanjakà Matanjaky Aleman io noho ty maramila mahery natsangany. Nivola faminania iny hoe “tsy hahavita hanohitsy” ty mpanjakani-avaratsy. Fa manino? “Satria hanao tetiky mba hahavoa azy rozy. Ka azy mihina hany mafiro aminy eo rey avao ro handavo azy.” (Dan. 11:25b, 26a) Ty manam-pahefà ‘nanompo anatrehani-mpanjaka’ eo ro nihina ty “hany mafiro fihanini-mpanjaka” tamy androni-Daniela. (Dan. 1:5) Manondro an’ia zany faminania io? Manondro ani-manam-pahefà anabo aleman azy niaraky niasa marìny tamy mpanjaka reo raha io, anatini-zay ty zeneraly noho maramila. Ty raha nataon-drozy ro naharava ty fandaisani-mpanjaka tan’Alemaigny tao.d Fe tsy nivola ty haharava ani-fanjakà matanjaky io avao faminania iny, fa nanambara ty hiafarani-aly nataony tamy mpanjakani-antimo koa. Ho zao ty niresahiny mikasiky ty mpanjakani-avaratsy: “Le hiparitaky manahaky ranobe io ty tafikiny, sady maro ty ho ripaky.” (Dan. 11:26b) Araky ty nivolanini-faminania io, le ‘niparitaky’ ty maramila aleman tamy Aly Bevata Voalohany, le nimaro vatany ty ‘niripaky.’ Tsy nisy aly nahafaty olo maro mandilatsy an’io talohani-zay.

11. Ino ty nataoni-mpanjakani-avaratsy noho mpanjakani-antimo?

¹¹ Lafa nanambara ty raha hiseho alohani-Aly Bevata Voalohany iny ty Daniela 11:27, 28, le nivola fa “hiaraky latabo” ty mpanjakani-avaratsy noho ty mpanjakani-antimo “le hifampivola vandy.” Nivola koa ie fa hamory “hananam-be” ty mpanjakani-avaratsy. Nitanteraky koa raha zay. Nifampiresaky Alemaigny noho Grande-Bretagne fa ta hampisy filamina rozy, fe hita hoe vandy raha zay lafa nipoaky ty aly tamy 1914. Tanatini-tao maro talohani-1914 koa, le nihamaro ty hananani-Alemaigny, ka ie ro nanjary firenena faharoe nanan-kanana tan-tany etoy. Bakeo nitanteraky amy zay ty Daniela 11:29 noho ty tampany voalohany amy andininy faha-30, satria nialy amy mpanjakani-antimo iny Alemaigny, fe niresy.

NIALY AMY VAHOAKI-NDRANAHARY MPANJAKA REY

12. Ino ty nataoni-mpanjakani-avaratsy noho mpanjakani-antimo tamy Aly Bevata Voalohany?

¹² Nanomboky tamy 1914, le nihananjeky ty aly nifanaovani-mpanjaka roe rey, noho ty aly nataon-drozy amy vahoaki-Ndranahary. Samby nanenjiky ani-ze mpanompo-Ndranahary tsy naneky handeha hialy, ohatsy, ndre ty fanjakà aleman ndre ty fanjakà anglè. Nigadràni-Etazinỳ koa azy rahalahy nitariky ani-asa fitoria rey. Nanatanteraky ty faminania niresahini-Apokalypsy 11:7-10 fanenjeha io.

13. Ino ty nataoni-mpanjakani-avaratsy tafarani-1930 noho tamy Aly Bevata Faharoe?

¹³ Tafarani-1930 amy zay, sirtò tamy Aly Bevata Faharoe, le nanjeky faratampony ty fanafihani-mpanjakani-avaratsy ty vahoaki-Ndranahary. Lafa nifehy ani-Alemaigny ty antoko Nazỳ, le niraràni-Hitler noho ty mpanori-dia azy ty asa nataoni-vahoaki-Ndranahary. An-jatony ty vahoaki-Ndranahary nivonoani-mpanohitsy reo, le an’arivony ty nalefany amy toby figadrà any. Fa nivolanini-Daniela sandrany raha rezay. Nahavita ‘nanivativa ty pilasy masy’ noho ‘nangalaky ty fanatitsy amea tsy tampaky’ ty mpanjakani-avaratsy, satria tsy nameany fahafaha hidera ty anarani-Jehovah anivon’olo maro ty mpanompo-Ndranahary. (Dan. 11:30b, 31a) Nifanta mihintsy aza Hitler mpanday ani-Alemaigny fa hofoanany tsy hisy sasy ty vahoaki-Ndranahary an’Alemaigny ao.

MPANJAKANI-AVARATSY VAOVAO

14. Ia ty nimpanjakani-avaratsy tafarani-Aly Bevata Faharoe? Hazavao.

¹⁴ Tafarani-Aly Bevata Faharoe, le nifehy faritsy bevata niazony tamy Alemaigny ty fanjakà kominista nandesini-Fikambana Sovietiky, ka nanjary mpanjakani-avaratsy. Tsy refesi-mandidy manahaky ani-Nazỳ reo koa ty fandaisani-Fikambana Sovietiky, ka nihalany ze olo nanao ty fanompoa a Ndranahary alohani-raha iaby.

15. Ino ty nataoni-mpanjakani-avaratsy lafa nitampitsy ty Aly Bevata Faharoe?

¹⁵ Lafa nitampitsy kelikely ty Aly Bevata Faharoe, le nanafiky ty vahoaki-Ndranahary koa azy mpanjakani-avaratsy vaovao iny, zany hoe ty Fikambana Sovietiky noho ty mpiara-dia aminy. Araky ty fa nivolanini-Apokalypsy 12:15-17, le niraràni-mpanjaka io ty asa fitoria sady nalefany sesitany ty vahoakini-Jehovah an’arivony. Vo nanomboky mihintsy ty andro farany, le fa nandefa fanenjeha manahaky “vavarano” io ty mpanjakani-avaratsy, fe tsy nivitany ty nampijano ty asa ataoni-vahoaki-Ndranahary zisiky henanizao.e

16. Akory ty nanatanterahani-Fikambana Sovietiky ty Daniela 11:37-39?

¹⁶ Vakio Daniela 11:37-39. Mba hahatanteraky ani-faminania io, le ‘tsy nidareani-mpanjakani-avaratsy azy Ndranaharini-razany iny.’ Tamy fomba akory? Teani-Fikambana Sovietiky horavà ty fivavaha, ka nataony ze tsy hananani-raha rey fahefà. Mbo tamy 1918 tany, ohatsy, le fa namoaky didy ie, ka nanjary nampianary tan-dakilasy any hoe tsy misy Ndranahary. Akory ty fomba ‘nanomezani-mpanjakani-avaratsy voninahitsy ty ndranaharini-fiarova bevata’? Nandany drala be ty Fikambana Sovietiky mba hanangana tafiky noho hanamboara fitaovam-pialia nikleera an’arivony mba hiarovany ty fahefàny. Lafa nandeha ty fotoa, le samby nahavory fitaovam-pialia farani-ze matanjaky mahafaty olo an’arivony tapitrisa, ndre ty mpanjakani-avaratsy ndre ty mpanjakani-antimo!

MPIFAHAVALO FE MIARAKY MIASA

17. Ino “raha mampangaroharo mahavy faharavà” io?

¹⁷ Nitohanani-mpanjakani-avaratsy ty mpanjakani-antimo mba hahafahan-drozy “hananga raha mampangaroharo mahavy faharavà.” (Dan. 11:31) Tsy ino “raha mampangaroharo” io fa ty Firenena Mikambana.

18. Manino ty Firenena Mikambana ro sahala amy “raha mampangaroharo”?

¹⁸ Sahala amy “raha mampangaroharo” ty Firenena Mikambana satria mivola fa mahavita mampilamy ani-tany toy, kanefa ty Fanjakà-Ndranahary raiky avao ro mahavita ani-zay. Nivola koa ty faminania fa “mahavy faharavà” raha mampangaroharo io, satria ty Firenena Mikambana ro tena handramby anjara amy fandravà ty fivavahan-diso iaby.—Henteo ty sarisary hoe “Mpanjaka Roe Mpifahavalo amy Fotoani-Farany.”

MANINO TSIKA RO MILA MAHAY ANI-ZAY?

19-20. a) Manino ro mila haintsika tantara io? b) Ino ty fanontanea hovaleantsika amy lahatsoratsy manaraky?

¹⁹ Mila mahay ani-tantara io tsika satria manaporofo raha io fa nanomboky tamy 1870 zisiky amy 1991, le nitanteraky ty faminaniani-Daniela mikasiky ty mpanjakani-avaratsy noho mpanjakani-antimo. Ka zay ro mahavy antsika hatòky hoe ho tanteraky koa ty tohini-faminania io.

²⁰ Nirava ty Fikambana Sovietiky tamy 1991. Ka ia ty mpanjakani-avaratsy amy fotoa henanizao? Hamaly ani-fanontanea zay ty lahatsoratsy manaraky.