Mpanjaka Roe Mpifahavalo amy Fotoani-Farany
Mifanindry ty fotoa nisehoani-raha sisany amy faminania voaresaky atoa reo. Manaporofo raha reo fa miay amy “fotoani-farany” tsika.—Dan. 12:4.
Andinin-teny Apok. 11:7; 12:13, 17; 13:1-8, 12
Faminania Nanjaka amin’olo an-tany etoy tan’arivony tao “bibinala iny.” Haratsy ty lohany fahafito amy fotoani-farany. Ho janga lohany iny afarani-zay, bakeo hanaraky ani-bibinala iny “ty tany iaby.” Hampiasa ani-bibinala io Satana mba ‘hialy amy sisa tavela’ amy voahosotsy reo.
Fahatanterahany Tafarani-Ranobe iny le nisy fanjakàn’olombelo maromaro nanohitsy ani-Jehovah. An’arivony tao tafara tatoy, tamy Aly Bevata Voalohany, le tena nihareraky ty fahefàni-Fanjakà Britaniky. Natanjaky ndraiky ie lafa niaraky aminy Etazinỳ. Amy fotoani-farany Satana ro tena mampiasa ty fahefà politiky iaby an-tany etoy, mba hanenjeha ty vahoaki-Ndranahary.
Andinin-teny Dan. 11:25-45
Faminania Ho mpifahavalo ty mpanjakani-avaratsy noho ty mpanjakani-antimo amy fotoani-farany.
Fahatanterahany Nifanao kirebaky ty firenena matanjaky Aleman noho Anglè-Amerikein. Tamy 1945, le nanjary mpanjakani-avaratsy ty Fikambana Sovietiky noho ty namany. Nirava ty Fikambana Sovietiky tamy 1991, ka lafa nandeha ty fotoa le Russie noho ty namany ro nanjary mpanjakani-avaratsy.
Andinin-teny Isa. 61:1; Mal. 3:1; Lioka 4:18
Faminania Handefa ty ‘irakiny’ Jehovah mba “hikarakara ty lala” talohani-nitsanganani-Fanjakàni-Mesia. Nanomboky niasa rozy mba “hanambara vaovao soa amy ty mpandefitsy.”
Fahatanterahany Nanomboky tamy 1870 manatoy, le niasa mafy Russell noho ty namany mba ho hay ndraiky ty marina amy Baiboly ao. Tamy 1881, le nitsapan-drozy fa tena mila mitory ty mpanompo-Ndranahary. Naboakin-drozy ty lahatsoratsy sisany manahaky hoe “Mila Mpitory 1 000” noho “Voahosotsy mba Hitory.”
Andinin-teny Mat. 13:24-30, 36-43
Faminania Hisy fahavalo hamafy tsimparifary amy tanimbary eny. Hengà hitiry noho hanakotako ani-vary rey ty tsimparifary zisiky amy fotoam-pijinjà, le amy fotoa zay rozy vo hosarahy.
Fahatanterahany Tamy 1870 tany, le nanjary nihanazava soa ty fiavahani-Kristiana sandoky noho ty Kristiana marina. Amy fotoani-farany, le navory ty Kristiana marina, le nisarahy tamy Kristiana sandoky.
Andinin-teny Dan. 2:31-33, 41-43
Faminania Vy noho tanimanga ty tombokini-sary olo namboary tamy metaly samby hafa iny.
Fahatanterahany Mampiseho ty antokon’olo mpanohitsy amy fanjakà andesini-Firenena Matanjaky Anglè-Amerikein ty tanimanga. Tsy hatanjaky manahaky vy io firenena matanjaky io vokatsini-raha ataon’olo reo.
Andinin-teny Mat. 13:30; 24:14, 45; 28:19, 20
Faminania Havory ho amy “trano fanajaria vokatsy” any “ty vary” le hotendrè hikarakara ani-“mpanompo” rey ty “mpanompo azo atokisa.” Hiparitaky amy “tany toy iaby” ty fitoria ty “vaovao soani-Fanjakà iny.”
Fahatanterahany Voatendry hikarakara ty vahoaki-Ndranahary ty mpanompo azo atokisa noho mahihitsy tamy 1919. Nanomboky tamy zay, le vomaiky nampitombo ty asa fitoria nataon-drozy ty Mpianatsy Baiboly. Mitory amy tany mandilatsini-200 henanizao ty Vavolombeloni-Jehovah sady mampiboaky boky amy safà mandilatsini-1 000.
Andinin-teny Dan. 12:11; Apok. 13:11, 14, 15
Faminania Hisy bibinala raiky mana tsifa roe hampirisiky ty olo an-tany etoy mba hanamboatsy ty “sarini-bibinala iny”, bakeo ie ‘hanome fofonay ani-sary iny.’
Fahatanterahany Nananga ty Fikambanam-pirenena ty Firenena Matanjaky Anglè-Amerikein. Nisy firenena maro hafa nanoha ani-fikambana io. Nilitsy ho anatini-Fikambana io koa ty mpanjakani-avaratsy tafara tatoa, fe tamy 1926 zisiky amy 1933 avao. Lafa nandimby ani-Fikambanam-pirenena io ty Firenena Mikambana, le nahazo ty fiderà tokony hamea ani-Fanjakà-Ndranahary koa.
Andinin-teny Dan. 8:23, 24
Faminania Hisy mpanjaka raiky masiaky “hahavy faharavà tanteraky.”
Fahatanterahany Nandravarava ty Firenena Matanjaky Anglè-Amerikein. Nanimba raha maro noho namono olo maro, ohatsy, Etazinỳ tamy Aly Bevata Faharoe lafa nandatsaky bomba atomiky indroe tamy tany raiky fahavaloni-Firenena Matanjaky Anglè-Amerikein.
Andinin-teny Dan. 11:31; Apok. 17:3, 7-11
Faminania Hiboaky baka amy lavaky mangoakoaky ao bibinala “mena malangy” iny, sady ie ro mpanjaka lahara fahavalo. “Raha mampangaroharo mahavy faharavà” ty nikaihani-Daniela ani-mpanjaka io.
Fahatanterahany Nirava ty Fikamba-nam-pirenena tanatini-Aly Bevata Faharoe. Lafa nivita aly iny, le ‘natsanga’ ty Firenena Mikambana. Namea voninahitsy tokony hamea ani-Fanjakà-Ndranahary ty Firenena Mikambana, manahaky ani-Fikambanam-pirenena talohany teo iny. Hotafihini-Firenena Mikambana ty fivavaha.
Andinin-teny 1 Tes. 5:3; Apok. 17:16
Faminania Hikoiky “fiadana noho filamina” firenena reo, le hanafiky ani-“makorely iny” “tsifa folo” rey miaraky “bibinala iny.” Bakeo, ho ripaky firenena reo.
Fahatanterahany Mety hivola firenena reo hoe nivitan-drozy ty nampisy fiadana noho filamina. Bakeo horavani-firenena manoha ty Firenena Mikambana reo ty fitambarani-fivavahan-diso iaby. Zay ro ho fanombohani-fijalea bevata. Ho tampitsy fijalea bevata io lafa haripaky ty tontoloni-Satana amy Hara-magedona.
Andinin-teny Ezek. 38:11, 14-17; Mat. 24:31
Faminania Hanafiky amy tanini-vahoaki-Ndranahary any Goga. Bakeo havorini-anjely reo “azy voafily rey.”
Fahatanterahany Hanafiky ty vahoaki-Ndranahary ty mpanjakani-avaratsy miaraky amy ty manam-pahefà hafa. Laha vo manomboky fanafiha io, le havory ho an-danitsy any ty sisa tavela amy voahosotsy reo.
Andinin-teny Ezek. 38:18-23; Dan. 2:34, 35, 44, 45; Apok. 6:2; 16:14, 16; 17:14; 19:20
Faminania Hamita “ty fandreseany” ‘azy nitikitsy sôvaly foty iny’ lafa handripaky ani-Goga noho ty maramilany. ‘Hatoraky amy ranovory afo mirehitsy’ “bibinala iny”, le ho torotoro sary olo bevata iny.
Fahatanterahany Hanavotsy ty vahoaki-Ndranahary Jesosy, azy Mpanjakani-Fanjakà-Ndranahary iny. Hiaraky amy azy 144 000 mpiaraky manday aminy reo noho tafiky anjeliny reo ie, lafa handripaky ani-firenena maromaro nitambatsy nanafiky ty vahoaki-Ndranahary rey. Ho rava amy zay ty tontoloni-Satana.