1921 Zato Tao Lasa zay

MPITORY BE HERIM-PO

Mila be herim-po Mpianatsy Baiboly rey laha tean-drozy ty hamita ty asa fitoria. Mila manambara “ty vaovao soa” amy ty mpandefitsy avao rozy sady manambara “ty andro famalea-Ndranahary” amy ty raty fanahy.

Nipetraky ta Kanadà any Rahalahy John Hoskin. Be herim-po ie ka nitory avao ie ndre nisy fanenjeha. Tamy voalohandohani-tao 1921, ohatsy, nifankatojiky tamy pasitera metodista zay ie. Ho zao ty nanombohani-Rahalahy Hoskin ani-resakin-drozy iny: “Resaky Baiboly hataontsika zao ka tokony ho soasoa avao. Ndre tsy mitovy hevitsy aza tsika amy raha sisany, le mbo tokony ho soasoa avao ty iafarani-resakintsika zao sady tsy tokony hisy aly.” Fe ino ty raha niseho? Hoy Rahalahy Hoskin: “Mbo tsy ampy firy minity resakinay iny, napoakini-pasitera iny marè biby varavara iny, ka ataoko fa ho nivaky vitra tamy varavara teo iny.”

Nitabataba marè pasitera iny ka nivola hoe: “Manino iha tsy mandeha amin’olo mbo tsy Kristiana rey any io le miresaky amin-drozy?” Fe tsy namaly Rahalahy Hoskin. Lafa niala teo ie, le hoy ty asany: ‘Ka fa niresaky tamy ty raiky amin’olo rezao anè aho!’

Lafa nitory teny tamy fiangonany tao pasitera iny hamarain’iny, le niratiratìny Rahalahy Hoskin. Hoy Rahalahy Hoskin: “Nivolanini-pasitera iny ty olo fa nao zaho zao ro olo farani-ze mpavandy niavy an-tanà eo, ka tokony hovonoa.” Fe tsy nampieny ani-Rahalahy Hoskin raha zay. Nitory avao ie sady niresaky tamin’olo maro. Hoy ty asany: “Tena niteako ty nitory tamy tanà io. Nivola mihintsy aza ty olo sisany hoe: ‘Haiko fa manao ty asa-Ndranahary iha!’, le bakeo namean-drozy ahy ze raha nilàko.”

FIANARA AM-BATA NOHO FOTOAM-PIVAVAHANI-FIANAKAVIA

Mba hanampea ty olo kinto hahay soa ty raha volanini-Baiboly, le nampiboaky fandahara fianara Baiboly tsy tampaky tamy gazety Fotoam-pahasambara ty Mpianatsy Baiboly.a Nisy fanontanea ho ani-tanora, ohatsy, ty tao ka azoni-ray aman-dreny dinihy niaraky amy ty anan-drozy. Tokony hametraky ani-fanontanea reo amy ty anan-drozy ty ray aman-dreny, le bakeo manampy an-drozy hahita ty valiny amy Baiboly ao. Nisy fanontanea manahaky ani-toy, ohatsy, nampianatsy raha tsotra mikasiky ty Baiboly: “Firy ty isakini-boky amy Baiboly ao?” Nisy fanontanea manahaky ani-toy koa nampioma ty tanora mba tsy hatahotsy hitory: “Tokony fa hampoizini-Kristiana kiraidraiky va hoe henjehy ie?”

Nisy fandahara hafa misy fanontanea noho valiny baka amy Baiboly ao koa natao ho an’olo fa mahay soa ty raha volanini-Baiboly. Afaky nahita ty valini-fanontanea reo rozy tamy boky voalohany hoe Fianara ty Soratsy Masy. An’arivony ty mpamaky niana-draha baka amy fanontanea reo. Fe nampandrenesy tamy gazety Fotoam-pahasambara, tamy 21 Desambra 1921 hoe tsy haboaky sasy fanontanea reo. Fa nanino?

BOKY VAOVAO!

Haini-rahalahy nitariky rey hoe nila nianatsy foto-kevitsy raiky baka amy Baiboly ao ty olo saky mianatsy. Farany rozy nampiboaky ty boky hoe Harpa-Ndranahary, tamy Novambra 1921. Afaky nanao ty fandaharany manoka mba hianara Baiboly ze olo nandramby ani-boky io. Nanampy ty olo hianatsy ty raha tea-Ndranahary hatao fianara io, le tsy ino zay fa ty hoe hameany fiaina mandrakizay ty olombelo. Nanao akory ty fomba fianara?

Lafa nandramby ani-boky io ty olo raiky, le nisy karta kelikely niazony. Natoro tamy karta iny ao ty pejy tokony hovakìny anatini-boky iny ao. Amy herinandro manaraky olo iny, mahazo hafatsy misy karta hafa ahità fanontanea vitsivitsy mikasiky ani-raha nivakìny iny. Misy pejy ampamakỳ an’olo iny amy herinandro manaraky ndraiky amy farani-karta iny eo.

Sankerinandro anatini-12 herinandro, le mahazo karta vaovao baka amy fiangona marìny azy eo mpianatsy iny. Matetiky karta rey baka amy mpitory be tao na tsy afaky nitory santrano amy fiangona eo rey. Nivola, ohatsy, Anna Gardner, baka Millvale Pennsylvania, an’Etazinỳ any hoe: “Lafa niboaky ty boky Harpa-Ndranahary, le nisy raha maro niazoni-Thayle rahavaviko natao, ndre kilemaina aza ie. Nandefa ani-karta misy fanontanea sankerinandro rey ie.” Lafa vita fianaran’olo iny, le nisy olo baka amy fiangona eo nitsidiky azy mba hanampy azy hahay soa ty raha volanini-Baiboly.

ASA NANDINY AN-DROZY

Tamy farani-tao iny, le nandefa taratasy tamy fiangona iaby Rahalahy Joseph Rutherford. Nivola ie hoe: “Tena nahità vokatsy noho nanampy olo maro ty fitoria mikasiky Fanjakà iny tamy tao toy, laha ampitovizy tamy tao lasa.” Bakeo hoy koa ty asany: “Mbo maro ty asa mila atao. Ampirisiho ty olo hafa mba handramby anjara amy asa tena soasoa toy.” Azo antoky fa nanoriky ty raha nivolaniny Mpianatsy Baiboly rey. Tamy tao 1922, le vomaiky nibè herim-po rozy nitory mikasiky Fanjakà iny. Tena niavaky ty raha nataon-drozy tamy tao io!