Mikarakara Noho Miaro ty Vahoakiny Jehovah

1. Manino Jesosy ro nangataky ani-Jehovah mba hiaro ty mpanori-dia azy?

TAMY haliky talohani-hahafatesani-Jesosy, le nisy raha manoka nangatahiny tamy Babany an-danitsy any iny. Nangataky ani-Jehovah ie mba hiaro ty mpanori-dia azy. (Jaona 17:15, 20) Mazava ho azy fa niaro noho nikarakara ty vahoakiny avao Jehovah bakany zay. Fe haini-Jesosy fa ho romotsy Satana ka hanohitsy marè ty mpanori-dia azy. Haini-Jesosy koa fa tsy maintsy hila ty fanampeani-Jehovah rozy mba hahafahan-drozy manohitsy ty fanafihani-Devoly.

2. Laha hentea ty Salamo 33:18-20, manino tsika ro tsy tokony hatahotsy lafa miatriky raha sarotsy?

² Miatriky raha sarotsy maro ty tena Kristiana henanizao, vokatsini-raha ataoni-tontolo ambany fahefàni-Satana toy. Mety hahakivy antsika raha rey na mety hahavy antsika hivaliky amy Jehovah mihintsy. Fe ho hitantsika amy lahatsoratsy toy ato fa tsy tokony hatahotsy tsika. Manenty antsika Jehovah. Midika zay fa hitany ty raha sarotsy mahazo antsika ka ta hanampy antsika ie. Ndao tsika handiniky tantara roe amy Baiboly ao mampiseho hoe ‘manenty soa ani-ze matahotsy azy ty masoni-Jehovah.’​—Vakio Salamo 33:18-20.

AMPEANI-JEHOVAH TSIKA LAFA MAHATIARO MANGIKY

3. Amy fotoa manao akory tsika ro mety hahatiaro mangiky?

³ Mana rahalahy noho anabavy maro amy fiangona eo tsika. Fe ndre zay, mety misy fotoa tsika mahatiaro mangiky. Ty tanora, ohatsy, mety hieritseritsy hoe tsy misy olo hanampy azy ie lafa manazava ty raha inoany amy ty mpiaraky mianatsy aminy an-dakilasy any, na mety hahatiaro mangiky koa ie lafa mifindra fiangona. Mety halahelo ty sisany amintsika na mety ho kivy lafa mieritseritsy hoe miatriky raha manahaky ani-zay. Mety hisalasala tsika hiresaky amin’olo mikasiky ty raha tsapantsika satria matahotsy tsika hoe hay ndre tsy ho azon-drozy ty raha mahazo antsika. Mety hieritseritsy mihintsy aza tsika kindraiky hoe tsy misy mpidary. Fe ndre ino ino antony mahavy antsika mahatiaro mangiky, le hita hoe mety halemy noho hiasa loha tsika kindraiky. Tsy teani-Jehovah hahatsapa ho zay mihintsy tsika. Manino tsika ro mivola ani-zay?

4. Manino Elia mpaminany ro nivola hoe: “Zaho raiky avao ro sisa tavela”?

⁴ Diniho ty tantarani-Elia, lahilahy tsy nivaliky. Nivola Jezebela hoe tsy maintsy hovonoany ie, farany ie nitavan’ay le nandeha nilay tanatini-40 andro. (1 Mpanj. 19:1-9) Lafa tamy lakato zay tao amy zay ie, le nitaray tamy Jehovah hoe: “Zaho raiky avao ro [mpaminany] sisa tavela.” (1 Mpanj. 19:10) Mbo nisy mpaminany hafa tamy tanà iny eo. Nisy mpaminany 100, ohatsy, navotani-Obadia mba tsy hovonoani-Jezebela. (1 Mpanj. 18:7, 13) Ka nanino zany Elia ro nahatiaro nangiky marè? Nieritseritsy vasa ie hoe nimaty iaby mpaminany navotani-Obadia rey. Mety nahatiaro nangiky koa ie satria tsy nisy olo nanompo ani-Jehovah niaraky taminy, ndre fa niporofoeni-Jehovah tamy Vohitsy Karmela teo hoe Ie raiky avao ro Ndranahary marina. Na mety nieritseritsy ie hoe tsy nisy olo nahay ty loza nahazo azy na tsy nisy olo nidary azy. Tsy tena resahini-tantara io iaby aloha ty fihetseham-poni-Elia. Fe ty raha azontsika antoky le hoe haini-Jehovah soa ty antony nahavy ani-Elia nahatiaro nangiky, sady hainy soa ty fomba hanampea azy.

5. Ino ty nataoni-Jehovah mba hanomeza toky ani-Elia hoe tsy raiky ie?

⁵ Nanao raha maro Jehovah mba hanampea ani-Elia. Nataony, ohatsy, ze hahavy ani-Elia tsy hisalasala hiresaky. Indroe mihintsy ie nanontany ani-Elia hoe: “Ino ataonao atoy io Elia?” (1 Mpanj. 19:9, 13) Nijanjinini-Jehovah soa Elia saky niresaky ty fihetseham-pony. Namaly ani-Elia Jehovah ka nasehony hoe teo Ie sady mana hery faratampony. Nameany toky koa Elia hoe mbo misy Israelita maro manompo Azy. (1 Mpanj. 19:11, 12, 18) Azo antoky fa nahatiaro naivaiva Elia lafa baka namboraky ty am-pony ao tamy Jehovah noho naharè ty valin-teniny. Nameani-Jehovah andraikitsy bevata maromaro Elia. Nivolaniny ie mba hanosotsy ani-Hazaela ho mpanjakani-Syria, hanosotsy ani-Jeho ho mpanjakani-Israely, le Elisa ho mpaminany. (1 Mpanj. 19:15, 16) Nanampy ani-Elia tsy hifantoky tamy raha nahakivy azy rey Jehovah lafa nanome azy ani-andraikitsy reo. Nameani-Jehovah ani-Elisa koa ie mba ho namany. Ino ty azonao atao mba hahazoa ty fanampeani-Jehovah lafa iha mahatiaro mangiky?

6. Ino ty raha azonao resahy amy Jehovah lafa iha mahatiaro mangiky? (Salamo 62:8)

⁶ Manasa anao hivavaky aminy Jehovah. Hitany ty raha sarotsy mahazo anao, ka manome toky anao ie hoe tsy maintsy hijanjy anao ie saky mivavaky aminy iha. (1 Tes. 5:17) Teateany ty mijanjy ty mpanompony. (Ohab. 15:8) Ino ty raha azonao resahy aminy lafa iha mahatiaro mangiky? Resaho amy Jehovah iaby ze raha tsapanao, manahaky ty nataoni-Elia. (Vakio Salamo 62:8.) Ambarao azy ty raha mampiasa loha anao noho ty vokatsini-raha rey aminao. Angataho Jehovah hanampy anao hahay ty raha tokony hataonao lafa iha mahatiaro mangiky na malahelo. Mety hahatiaro ho tsy misy manampy noho matahotsy, ohatsy, iha lafa anontaneani-mpiaraky mianatsy aminao mikasiky ty raha inoanao. Laha zay ty tsapanao, le angataho Jehovah mba hanome anao herim-po. Ho vitanao amy zay ty hiresaky. Azonao atao mihintsy aza ty mangataky fahendrea aminy mba hahaizanao mandanjalanja lafa manazava ty raha inoanao. (Lioka 21:14, 15) Laha mahatiaro malahelo na kivy iha, le angataho Jehovah hanampy anao hiresaky ani-raha iny amy Kristiana matotsy. Azonao atao ty mangataky amy Jehovah mba hanampy ani-olo hiresahanao iny hahazo soa ty raha tsapanao. Aboraho amy Jehovah ty am-ponao ao, henteo ty fomba namaleany ty vavaky nataonao, le manekea hampean’olo. Tsy hahatiaro mangiky marè iha laha manao ani-zay.

7. Ino ty ianaranao baka amy tantarani-Mauricio?

⁷ Misy asa tena mahafa-po nampanaovini-Jehovah antsika iaby. Afaky matoky iha fa hitany sady ankasitrahany ze raha iaby ataonao amy fiangona eo noho amy fanompoa eny. (Sal. 110:3) Miezaha hifantoky amy asa io avao. Manino raha zay ro hanampy anao lafa iha mahatiaro mangiky? Henteo moa tantarani-rahalahy tanora mana anara Mauricio toy.b Vo vita batisa kelikely Mauricio, le niala tsikelikely tamy fahamarina ty raiky amy namany rey. Hoy Mauricio: “Lasa tsy natoky tena sasy aho lafa nahita azy niala tamy Jehovah. Nisalasala aho hoe ho vitako avao va ty hanatanteraky ty voady nataoko mba hanompo ani-Jehovah noho hijano amy fianakaviani-Jehovah ao. Nahatiaro nangiky aho, le nieritseritsy aho hoe tsy hisy olo hahazo ty fihetseham-poko.” Ino ty nanampy ani-Mauricio? Hoy ty asany: “Nampitombo ty fanompoako aho. Nanampy ahy raha zay mba tsy hifantoky marè amy ty vatako noho ty fihetseham-poko. Lasa nifalifaly noho tsy de nahatiaro nangiky aho lafa niaraky nanompo amin’olo hafa.” Ndre tsy afaky miaraky mivanta amy mpiara-manompo aza tsika lafa mitory, le mahazo fampahereza tsika lafa miaraky mitory an-taratasy noho an-telefony. Ino koa ty raha hafa nanampy ani-Mauricio? Nivola ndraiky ie hoe: “Nandramby anjara tamy asa natao tamy fiangona eo aho. Niezaky nanoma soa aho lafa nahazo anjara amy fivoria. Lasa nahavy ahy nahatsapa raha zay hoe lafovily amy Jehovah noho ty olo hafa aho.”

AMPEANI-JEHOVAH TSIKA LAFA KIVY AMY TY RAHA SAROTSY MAHAZO ANTSIKA

8. Mety hanao akory tsika lafa misy raha tena sarotsy mahazo antsika?

⁸ Fa ampoizintsika hoe tsy maintsy hiatriky raha sarotsy tsika amy andro farany zao. (2 Tim. 3:1) Fe mety ho taitsy tsika lafa misy raha tena sarotsy miseho. Mety tsy hanan-drala tampoky, ohatsy, tsika, na mety hivola amintsika ty dokotera hoe misy arety sarotsy mahazo antsika, na mety ho maty ty olo teantsika. Mety ho kivy na halahelo tsika amy raha manahaky ani-zay, sirtò laha misesisesy ty raha sarotsy atrehintsika na anatini-fotoa raiky ty isehoani-raha rezay. Fe tiarovo fa haini-Jehovah soa ty raha mahazo antsika. Afaky matoky tsika fa ho vitantsika ty hiaritsy ndre ino ino ty raha sarotsy mahazo antsika, satria manampy antsika ie.

9. Resadresaho ty sisany amy raha sarotsy nahazo ani-Joba.

⁹ Eritsereto ty fomba nanampeani-Jehovah ani-Joba lahilahy tsy nivaliky. Niatriky raha tena sarotsy noho nifanesisesy ie. Tanatini-fotoa kelikely avao ty nisehoani-raha iaby reo. Ndraik’andro, le nireni-Joba hoe nisy nangalatsy noho nisy namono ty hariny iaby. Nimaty koa ty mpanompony noho anany rey iaby. (Joba 1:13-19) Tsiela tafarani-zay, le niazon’arety tena nampijaly Joba, kanefa ie amin’io mbo nalahelo biby. (Joba 2:7) Tena raty ty raha nahazo ani-Joba, farany ie nivola hoe: “Mampangaroharo ahy ty fiainako. Tsy ta ho velo sasy aho.”​—Joba 7:16.

10. Ino ty nataoni-Jehovah mba hanampea ani-Joba hiaritsy ty raha sarotsy nahazo azy? (Henteo sary amy fononi-gazety toy.)

¹⁰ Nihitani-Jehovah soa ty raha nahazo ani-Joba. Teani-Jehovah Joba ka nameany ze raha nilàny ie mba hahafahany hiaritsy noho tsy hivaliky. Niresaky tamy Joba Jehovah, le nampitiaroviny ani-Joba hoe tsy misy olo hendry mandilatsy Azy sady tena mikarakara ty zavaboariny Ie. Niresaky mikasiky biby mahatseriky sankarazany ie. (Joba 38:1, 2; 39:9, 13, 19, 27; 40:15; 41:1, 2) Nampiasa ani-Eliho, lahilahy tanora noho tsy nivaliky koa Jehovah mba hampahery noho hampionona ani-Joba. Nanome toky ani-Joba Eliho hoe mamaly soa ty mpanompony avao Jehovah lafa miaritsy rozy. Fe tsy zay avao, nampirisihini-Jehovah koa Eliho mba hanome torohevitsy feno fitiava ani-Joba. Nampeani-Eliho ie mba tsy hifantoky marè amy ty vatany ka nampitiaroviny hoe tena kelikely tsika laha ampitovizy amy Jehovah, azy Mpamoro ty kila raha iaby iny. (Joba 37:14) Nisy raha nampanaovini-Jehovah ani-Joba koa. Nivolaniny ie mba hivavaky ho ani-namany telo nanota rey. (Joba 42:8-10) Manao akory koa ty anampeani-Jehovah antsika henanizao lafa miatriky raha sarotsy tsika?

11. Akory ty anampeani-Baiboly antsika lafa tsika miatriky raha sarotsy?

¹¹ Tsy miresaky amintsika mivanta manahaky nataony tamy Joba iny Jehovah henanizao, fe mampiasa ty Safàny ie, zany hoe ty Baiboly mba hiresaha amintsika. (Rom. 15:4) Mampahery antsika ie ka manome antsika raha tamany amy hoavy. Ndao moa tsika handiniky hevitsy vitsivitsy baka amy Baiboly ao afaky mampahery antsika lafa tsika miatriky raha sarotsy. Manome toky antsika Jehovah amy Soratsy Masy ao fa ‘tsy hisy raha hahavita hampisaraky antsika aminy ka hahavy azy tsy ho tea antsika sasy’, ndre raha sarotsy manao akory aza. (Rom. 8:38, 39) Manome toky antsika avao koa ie hoe “anilani-ze olo iaby mikaiky azy” ie. (Sal. 145:18) Mivola Jehovah fa laha miantehitsy aminy tsika, le afaky hahavita hiaritsy raha sarotsy sady ho falifaly avao ndre misy raha mampijaly antsika aza. (1 Kor. 10:13; Jak. 1:2, 12) Mampitiaro antsika koa ty Safà-Ndranahary fa mandalo avao ty raha sarotsy mahazo antsika laha ampitovizy amy ty fitahia mandrakizay hameany antsika. (2 Kor. 4:16-18) Mampitamà Jehovah hoe haripakiny ze fototsini-problemo mahazo antsika, tsy ia zay fa Satana Devoly noho ze olo raty fanahy manahaky azy. (Sal. 37:10) Tena azo antoky raha zay! Misy andinin-teny mampahery tiaronao va ka afaky manampy anao hiatriky ty raha sarotsy hiseho amy hoavy?

12. Ino ty teani-Jehovah hataontsika laha teantsika hahasoa antsika ty Safàny?

¹² Teani-Jehovah tsika laha manoka fotoa hianara Baiboly tsy tampaky noho hametsevetsea ty raha nivakintsika. Laha manoriky ty raha ianarantsika tsika, le hihamatanjaky ty finoantsika sady hifandramby soa amy Babantsika an-danitsy any iny tsika. Lasa hahavita hiaritsy amy zay tsika lafa misy raha sarotsy. Ameani-Jehovah ty fanahiny masy koa ze miantehitsy amy ty Safàny. Afaky manome antsika “hery mandilatsy ty an’olombelo” fanahy io mba hahafahantsika miaritsy ze raha sarotsy miseho.​—2 Kor. 4:7-10.

13. Manino ty hany ara-panahy ameani-“mpanompo azo atokisa noho mahihitsy” ro manampy antsika hiaritsy raha sarotsy?

¹³ Ampeani-Jehovah “ty mpanompo azo atokisa noho mahihitsy” ka afaky mampiboaky lahatsoratsy, video, noho hira sankarazany. (Mat. 24:45) Manampy antsika hana finoa matanjaky noho hifandramby soa amy Jehovah avao raha rey. Tokony hampiasantsika soa ze raha iaby ameani-Jehovah antsika. Vo tsiela, le nivola ranabavy raiky baka a Etazinỳ any zay fa tena ankasitrahany ty hany ara-panahy iaby amea antsika. Hoy ty asany: “Fa 40 tao zay ty nanompoako ani-Jehovah. Niatriky raha sarotsy nifanesisesy avao aho tanatini-fotoa zay ka lasa nisarotsy amiko ty tsy hivaliky amy Jehovah.” Tena sarotsy ty raha nahazo ani-ranabavy io. Nivoadodo tomabily nandesini-sofera mamo zay dadabeny le nimaty, narary mafy koa babany noho reniny bakeo nimaty, le indroe zay ie ro niazoni-kansera. Ino ty nanampy azy hiaritsy? Nivola ie hoe: “Nikarakara ahy avao Jehovah. Tena nanampy ahy ty hany ara-panahy nameany amy alalani-mpanompo azo atokisa noho mahihitsy. Vokatsini-raha zay, le afaky mivola manahaky ani-Joba aho hoe: ‘Tsy haneky hivaliky mihintsy aho, zisiky ahafatesako.’ ”​—Joba 27:5.

14. Akory ty ampiasani-Jehovah ani-rahalahy noho anabavintsika reo mba hanampea antsika lafa miatriky raha sarotsy tsika? (1 Tesalonianina 4:9)

¹⁴ Nampianarini-Jehovah hifankatea noho hifampahery ty mpanompony lafa misy raha sarotsy. (2 Kor. 1:3, 4; vakio 1 Tesalonianina 4:9.) Manahaky ani-Eliho ty rahalahy noho anabavintsika ka parè hanampy antsika avao rozy lafa miatriky raha sarotsy tsika. (Asa. 14:22) Narary mafy, ohatsy, ty valini-ranabavy Diane le nimaty. Henteo moa hoe ino ty nataoni-mpiara-manompo tamy fiangona nisy azy tafarani-zay, mba hampahereza noho hanampea azy hifandramby soa amy Jehovah avao. Hoy ty asany: “Tena mafy aloha. Fe tsapanay hoe nanoha anay ty tana maherini-Jehovah tamy fotoa rey. Nanao raha maro ty fiangonanay mba hanampea anay. Namangy anay rozy, nikaiky amy telefony, le nandrakoky anay. Tena nanampy anay hiaritsy raha iaby nataon-drozy rey. Tsy mahay manday tomabily aho, farany nalàni-ranadahy noho rahavavy reo saky hivory noho hitory.” Tena falifaly tsika satria mana rahalahy noho anabavy be fitiava manahaky ani-zay amy fiangona eo!

ANKASITRAHO TY FIKARAKARANI-JEHOVAH

15. Manino tsika ro matoky hoe ho vitantsika ty hiatriky ty raha sarotsy mahazo antsika?

¹⁵ Samby hiatriky raha sarotsy sankarazany tsika iaby. Fe nihitantsika teo hoe tsy mialy raiky tsika lafa miatriky ani-raha rey. Manahaky baba be fitiava io Jehovah ka mikarakara antsika avao. Anilantsika eo avao ie, parè hijanjy ty fitarainantsika sady parè hanampy antsika. (Isaia 43:2) Matoky tsika fa ho vitantsika ty hiatriky ty raha sarotsy mahazo antsika, satria matariky ie ka manome antsika ze raha iaby ilàntsika mba hahafahantsika miaritsy. Nameany tombontsoa hivavaky tsika sady nameany ty Baiboly. Eo koa ty hany ara-panahy maro sankarazany, noho rahalahy noho anabavy be fitiava afaky manampy antsika amy fotoa tena ilàntsika azy.

16. Ino ty tokony hataontsika mba hahavy antsika hokarakaràni-Jehovah avao?

¹⁶ Tena falifaly tsika hoe mana Baba an-danitsy any mikarakara antsika! ‘Mahafalifaly ty fontsika ty raha ataony.’ (Sal. 33:21) Asehontsika amy Jehovah hoe ankasitrahantsika ty fikarakaràny antsika ka rambesintsika ze fanampea iaby ameany antsika. Mila manao ty anjarantsika koa tsika mba hahavy antsika hokarakarà-Ndranahary avao. Midika raha zay fa mila miezaky manoriky ty safàni-Jehovah avao tsika sady manao ze raha volaniny hoe soa. Laha manao ani-zay tsika, le hokarakaràny avao zisiky farany!​—1 Pet. 3:12.