Ka Miala amy Fahamarina Mihintsy!

1. Manino ro mahasoa antsika ty miresadresaky mikasiky ty fomba nahitantsika “fahamarina”?

“NANAO akory ty nahitanao fahamarina?” Azo antoky fa tsy indraiky avao iha namaly ani-fanontanea io. Io matetiky ty fanontanea apetrakintsika voalohany amy mpiara-manompo amintsika reo lafa tsika ta hahay soa an-drozy. Teantsika ho re hoe nanao akory ty nahavy ani-rahalahy noho anabavintsika reo hahay ani-Jehovah noho ho tea azy, le teantsika koa ty mitantara amin-drozy ty antony tena itiavantsika fahamarina. (Rom. 1:11) Ino ty vokany lafa tsika miresadresaky manahaky ani-zay? Hanampy antsika raha zay hitiaro avao hoe tena lafovily ty fahamarina. Vomaiky koa tsika ho tapa-kevitsy ‘tsy hiala amy fahamarina mihintsy’, zany hoe hana fomba fiaina soa avao. Hotahini-Jehovah tsika amy zay sady hahazo hatò aminy.​—3 Jaona 4.

2. Ino ty hodinihintsika amy lahatsoratsy toy ato?

² Handiniky antony vitsivitsy mahavy antsika ho tea ty fahamarina tsika amy lahatsoratsy toy ato. Bakeo hodinihintsika hoe ino ty azontsika atao mba hampisehoa hoe tsy miala am-pontsika ao fanomeza tena lafovily io. Azo antoky fa hanampy antsika hankasitraky marè ani-Jehovah raha zay satria nitao antsika ho amy fahamarina ao ie. (Jaona 6:44) Vomaiky koa tsika haniry hizara ty fahamarina amy Baiboly ao amin’olo hafa.

MANINO TSIKA RO TEA “TY FAHAMARINA”?

3. Ino ty antony bevata mahavy antsika ho tea ty fahamarina?

³ Maro ty antony mahavy antsika ho tea ty fahamarina. Fe toy ty tena bevata marè amy raha rezay: Tea ani-Jehovah Ndranahary, azy Niaviani-fahamarina iny tsika. Ty Safàny, zany hoe ty Baiboly ro manampy antsika hahay azy. Lasa haintsika hoe tsy Mpamoro mahery nahavita namoro ty lanitsy noho ty tany avao ie, fa Baba be fitiava tena midary antsika koa. (1 Pet. 5:7) Haintsika koa fa “mamindra fo noho miferinay” Ndranaharintsika iny. “Tsy mora meloky [ie], tena be fitiava noho tsy mivaliky sady tena tea fahamarina.” (Eks. 34:6) Tea raha mahity Jehovah. (Isaia 61:8) Malahelo ie lafa mahita antsika mijaly, le fa tsy lininy ty fotoa hanamperany ty raha iaby mampijaly antsika. (Jer. 29:11) Tena fa tsy linintsika koa ty hiaviani-raha zay! Anisani-antony tena itiavantsika ani-Jehovah zay!

4-5. Manino ro nampitovizini-apostoly Paoly amy nanga ty raha tamanintsika?

⁴ Ino koa ty antony hafa mahavy antsika ho tea ty fahamarina? Teantsika ty fahamarina satria tena mahasoa antsika. Eritsereto, ohatsy, ty raha tamanintsika amy hoavy. Anisani-fahamarina amy Baiboly ao raha io. Nampitovizini-apostoly Paoly amy nanga mihintsy raha tamanintsika io, soa ho hitantsika ty maha lafovily azy. Hoy ty asany: “Raha tamanintsika zay ro nangani-aintsika. Sady azo antoky raha io noho mafy fototsy.” (Heb. 6:19) Miaro ty sambo tsy hihetsiketsiky ty nanga. Manahaky ani-zay koa fa afaky manampy antsika ho kalma avao ty raha tamanintsika amy Baiboly ao, lafa tsika miatriky raha sarotsy.

⁵ Niresaky ty raha lafovily tamanini-Kristiana voahosotsy Paoly amy andininy io, tsy ino zay fa ty hoe ho an-danitsy any. Fe mahasoa ty Kristiana mitamà hiay mandrakizay an-tany eto koa raha nivolaniny io. (Jaona 3:16) Azo antoky fa tena hisy dikany ty fiainantsika lafa haintsika hoe mitamà hiay mandrakizay tsika.

6-7. Manino ro nahasoa ani-Yvonne ty nahay ty marina mikasiky ty hoavy?

⁶ Eritsereto, ohatsy, ty raha niainani-ranabavy Yvonne. Tsy nitezà tamy fahamarina ie, le natahotsy ho maty ie liany nahakelikely azy. Namaky boky ie ndraiky zay, le nahita ani-fehezanteny toy: “Tsy misy olombelo tsy ho maty zao.” Tsy niala tan-dohany ao mihintsy raha io. Hoy ty asany: “Lasa tsy niazon-droro aho saky haly fa nieritseritsy mikasiky ty hoavy avao. Nieritseritsy amy zay aho hoe: ‘Le fa manahaky ani-zao avao zany ty fiaina?’ ‘Ino avao nanamboara-Ndranahary ahy io?’ Zaho aloha tsy ta ho maty!”

⁷ Nifankahita tamy Vavolombeloni-Jehovah Yvonne lafa nisomonjara. Hoy ty asany: “Lasa nino aho hoe afaky ho velo tsy misy farany amy Paradisa an-tany eto aho.” Manino ro nahasoa ani-ranabavintsika io ty nahay fahamarina? Hoy ty asany hoe: “Lasa miroro soa aho fa tsy miasa loha mikasiky ty hoavy sasy sady tsy matahotsy ho maty.” Azo antoky fa tena teani-Yvonne ty fahamarina amy Baiboly ao, le falifaly ie miresaky amin’olo hafa ty raha tamaniny amy hoavy.​—1 Tim. 4:16.

8-9. a) Nanao akory ty fahitani-lahilahy tamy fanoharani-Jesosy iny ani-raha nihitany iny? b) Manao akory ty fahitanao ty fahamarina?

⁸ Anisani-fahamarina amy Baiboly ao koa ty vaovao soa mikasiky Fanjakà-Ndranahary. Nampitovizini-Jesosy tamy hanana navony ty fahamarina mikasiky ani-Fanjakà iny. Hoy ty asany amy Matio 13:44 ao: “Ty Fanjakàni-lanitsy le manahaky hanana navony an-koraky any, fe nihitan’olo le navonin’olo iny koa. Nifalifaly biby ie, ka nandeha namarotsy ani-ze raha iaby nananany, le niviliny horaky iny.” Henteo fa tsy hoe nila ani-hanana iny lahilahy io. Fe lafa nihitany raha io, le nahafoy raha maro ie mba hahazoany azy. Naviliny mihintsy ze raha iaby nananany. Fa manino? Satria hainy hoe tena lafovily hanana nihitany io. Mbo lafovily mandilatsy ani-raha iaby nafoiny rey raha io.

⁹ Manahaky ani-zay koa va ty fahitanao ty fahamarina? Azo antoky aloha zay! Haintsika fa tsy misy dikany ty raha amy tontolo toy eto laha ampitovizy amy ty fifalea azontsika amy fanompoa ani-Jehovah henanizao noho ty fiaina mandrakizay tamanintsika amy hoavy, lafa manday ty Fanjakà-Ndranahary. Tombontsoa bevata ty hoe mifandramby marìny amy Jehovah, ka tsy matiantoky mihintsy tsika ndre ino ino raha afointsika ho azy. Ho falifaly biby tsika laha manao ze ‘tena mahafalifaly azy.’​—Kol. 1:10.

10-11. Ino ty nandrisiky ani-Michael hanova tanteraky ty fiainany?

¹⁰ Nahafoy raha bevata ty ankamaroantsika mba hahazoa hatò amy Jehovah. Ty sisany, ohatsy, nahafoy asa be karama amy tontolo toy eto. Ty ilany koa taloha ta ho mpanarivo, fe tsy nifantoky amy zay sasy. Misy koa nanova tanteraky ty fomba fiainany lafa nahay ani-Jehovah. Zay mihintsy ty raha nataoni-Michael. Tsy nitezà tamy fahamarina ie. Lafa ie nimpamaraky, le nianatsy karatè. Hoy ty asany: “Nikontrana avao aho soa ho anforma. Be hozatsy aho, ka nieritseritsy aho kindraiky hoe tsy hisy haharesy mihintsy.” Fe lafa Michael nanomboky nianatsy Baiboly, le nihainy hoe manao akory ty fahitani-Jehovah ty hasatà. (Sal. 11:5) Ho zao ty nivolanini-Michael mikasiky mpivaly Vavolombeloni-Jehovah nampianatsy Baiboly azy rey: “Tsy nivola mihintsy rozy hoe tsy tokony hianatsy aly sasy aho. Nanohy nampianatsy ahy ty fahamarina amy Baiboly ao avao rozy.”

¹¹ Arakaraky ty nianarani-Michael mikasiky ani-Jehovah le vomaiky nitombo ty fitiavany azy. Tena nidosiky ty fony ty nieritseritsy hoe mikarakara ty mpanompony Jehovah. Lafa nandeha ty fotoa le nihitani-Michael hoe nila nanova ty fomba fiainany ie. Hoy ty asany: “Haiko fa tena tsy ho mora amiko ty hiala amy karatè. Fe haiko koa fa hahafalifaly ani-Jehovah raha zay, sady resy lahatsy aho fa tokony hahafoy ty raha iaby ho azy. Tena maeva azy raha zay.” Haini-Michael fa tena lafovily ty fahamarina nihitany, ka parè hanova tanteraky ty fiainany ie.​—Jak. 1:25.

12-13. Akory ty nanampeani-fahamarina amy Baiboly ao ani-Mayli?

¹² Tena lafovily ty fahamarina satria ampitovizini-Baiboly amy jiro mamirapiratsy amy andro maìky rey. (Sal. 119:105; Efes. 5:8) Falifaly biby Mayli, ranabavy baka Azerbaïjan any zay satria nanampy azy ty Safà-Ndranahary. Samby nana ty fivavahany ty ray aman-dreniny. Silamo babany, le Jiosy reniny. Hoy ty asany: “Nino aho hoe misy Ndranahary, fe maro biby ty raha tsy nazava tamiko. Nieritseritsy aho hoe: ‘Manino Ndranahary ro namoro antsika? Manino ro misy olo mijaly avao amy androm-piainany, kanefa mbo hijalijaly mandrakizay amy afobe any koa?’ Mivola ty olo hoe sitrapo-Ndranahary ze raha iaby miseho. Nieritseritsy amy zay aho hoe: ‘Atao-Ndranahary va zany ze hampisy problemo ty fiainan’olo, le bakeo falifaly ie mahita an-drozy mijaly?’ ”

¹³ Tsy nieny Mayli fa niezaky avao nila ty valini-fanontaneany rey. Naneky hianatsy Baiboly ie tafara atoy, le nilasa Vavolombeloni-Jehovah. Ho zao ty nivolaniny: “Nandresy lahatsy ahy ty fanazavani-Baiboly, ka niova tanteraky ty fahitako ty fiaina. Lasa nilamin-tsay aho.” Manahaky ani-Mayli tsika iaby ka midera ani-Jehovah, satria ‘nikaihiny hiala tamy maìky’ tsika mba hamonjy ty hazavàny.​—1 Pet. 2:9.

14. Ino ty azontsika atao mba hampitomboa ty fitiavantsika ty fahamarina? (Henteo koa ty efajoro hoe “Raha Hafa Azontsika Ampitovizy amy Fahamarina amy Baiboly Ao.”)

¹⁴ Tena lafovily vatany ty fahamarina. Ohatsy vitsivitsy avao niresahintsika reo fa azo antoky hoe mbo mahita maro hafa iha. Manino laha dinihinao amy fianara am-bata hoe ino koa ty antony hafa tokony hitiavantsika ty fahamarina? Arakaraky ty itiavantsika ty fahamarina, le vomaiky tsika hahita fomba ampisehoa hoe teantsika raha io.

AKORY TY AMPISEHOANTSIKA HOE TEANTSIKA TY FAHAMARINA?

15. Akory ty azontsika ampisehoa hoe teantsika ty fahamarina?

¹⁵ Asehontsika hoe teantsika ty fahamarina laha ianarantsika tsy tampaky ty Baiboly noho boky noho gazetintsika rey. Tokony hazoto hianatsy avao tsika ndre fa ela ndre vo betibety ty nilirantsika amy fahamarina ao. Nivola ty gazety Tilikambo Fiambena voalohany marè tany fa manahaky folera raiky kelikely manaly ho voasaroni-akata raty maro biby rey ty fahamarina. Tsy hahita ani-folera io ty olo raiky laha tsy mila soa. Fe lafa hitany raha iny, le tsy tokony hijano amin’io avao ie fa tokony mbo hila hafa. Manahaky ani-zay koa ty tokony hataontsika lafa misy fahamarina lasa haintsika. Tsy hijano amy fahamarina raiky zay avao tsika fa hila avao mba hahaizantsika raha hafa. Tsy mora aloha ty mianatsy, fe tsy hisera ty ezaky ataontsika.

16. Fomba fianara manao akory ro hitanao hoe mahasoa anao? (Ohabolana 2:4-6)

¹⁶ Tsy tsika iaby ro tea mamaky noho mianatsy. Fe mampirisiky antsika Jehovah mba ‘hila avao’ noho ‘hikaroky avao’, amy zay ho haintsika soa ty fahamarina. (Vakio Ohabolana 2:4-6.) Handramby soa tsika laha miezaky manao ani-zay. Zay ty nitsapani-rahalahy Corey. Nivola ie fa nangalaky andinin-teny raiky ie lafa mamaky Baiboly, bakeo manoka fotoa handiniha soa ani-raha iny. Hoy ty asany: “Vakiko iaby ty andininy hafa mifandramby amy andinin-teny iny noho ty fanamariha ambany pejy, le mbo manao fikaroha fanampiny aho bakeo ... Maro biby ty soa azoko lafa manao ani-zay aho!” Misy amintsika manao manahaky ani-zay lafa mianatsy, le misy mampiasa fomba hafa. Fe ndre manao akory ty fomba fianarantsika, le asehontsika hoe lafovily amintsika ty fahamarina laha miezaky manoka fotoa hianara azy tsika.​—Sal. 1:1-3.

17. Manao akory miay mifanaraky amy fahamarina zao? (Jakoba 1:25)

¹⁷ Azo antoky fa haintsika hoe tsy ampy ty hoe mianatsy fahamarina. Laha tena teantsika hahasoa antsika raha io, le tsy maintsy iainantsika, zany hoe orihintsika ze raha ianarantsika. Lafa manao ani-zay avao tsika vo tena ho sambatsy. (Vakio Jakoba 1:25.) Akory ty ahaizantsika hoe miay mifanaraky amy fahamarina vatany tsika? Nivola rahalahy raiky zay hoe mila dinihintsika ty fiainantsika mba hahità hoe manoriky ty raha ianarantsika va tsika, le ino ty raha mbo mila hasoavintsika. Hoy apostoly Paoly: “Fa misy fandrosoa vitantsika, ka ndao tsika hiezaky handroso manahaky ani-zay avao.”​—Fil. 3:16.

18. Manino tsika ro miezaky “tsy miala amy fahamarina mihintsy”?

¹⁸ Eritsereto hoe ino ty soa ho azontsika laha tsika miezaky “tsy miala amy fahamarina mihintsy”! Hihasoa ty fomba fiainantsika, le ho falifaly koa Jehovah noho ty mpiara-manompo amintsika. (Ohab. 27:11; 3 Jaona 4) Reo ty antony farani-soa mahavy antsika tokony ho tea ty fahamarina noho ‘tsy hiala amy fahamarina mihintsy’!