Mbo Mahasoa Avao va ty Fahamarina?

Fa tsy hay sasy va ty manavaky ty marina noho ty tsy marina henanizao? Andesin’ny fihetseham-po noho ty raha inoany avao ty ankamaroan’olo henanizao, fa tsy mandiniky ty marina noho ty porofo. Mino koa ty ankamaroan’olo fa tsy misy fahamarina zao.

Tsy vo nandroany ro nisiani-zay. Roe arivo tao lasa zay, le nanontany an’i Jesosy Governera Romanina kaihy hoe Pontio Pilato zay hoe: “Ino ty marina?” (Jaona 18:38) Tsy tena ta hahay ty valin’ny fanontanea io Pilato, fe tena bevata fanontanea napetrany io. Manome valiny mahafapo mikasiky an’ny fanontanea io ty Baiboly, le hanampy anao raha zay hahay ty marina noho ty diso amy tontolo mivalintoa toy eto.

Tena misy va ty marina?

Eka. Ty safà hoe “marina” amy Baiboly ao, le manondro raha raiky mifanaraky amy ty raha misy sady azo ekè. Kaihin’ny Baiboly hoe “Ndranaharin’ny fahamarina” Jehovaha Ndranahary satria ie ro Loharanon’ny fahamarina. (Salamo 31:15) Hita amy Baiboly ao ty fahamarina baka aminy. Ampitoviziny amy hazavà afaky mitariky antsika amy tontolo tsy ahità ty marina toy eto raha zay.​—Salamo 43:3; Jaona 17:17.

Akory ty hahitanao ty marina?

Tsy tean’i Jehovah hanekineky fahatany ze raha volanin’ny Baiboly avao tsika. Mampirisiky antsika aza ie mba hampiasa soa ty saintsika, le handiniky soa ty Baiboly fa tsy handesin’ny fihetseham-po avao. (Romanina 12:1) Tean’i Jehovah hahay azy noho ho tea azy tsika. Fe teany laha ampiasantsika ty “saintsika iaby” mba hahaiza azy noho hitiava azy. Mampirisiky antsika koa ie mba hanamarina soa ty raha ianarantsika amy Baiboly ao.​—Matio 22:37, 38; Asan’ny Apostoly 17:11.

Baka amin’ia ty vandy?

Resahin’ny Baiboly fa baka amy Satana Devoly, azy fahavalo-Ndranahary iny ty vandy. Zay ty antony mahavy azy kaihin’ny Baiboly hoe “baban’ny vandy.” (Jaona 8:44) Namoronany vandy mikasiky a Ndranahary olombelo voalohany rey. (Genesisy 3:1-6, 13, 17-19; 5:5) Nanomboky tamy zay, le mampiparitaky vandy avao ie sady ataony ze tsy hahaizan’olo ty marina mikasiky a Ndranahary.​—Apokalypsy 12:9.

Manino ro lasa manjeky ty vandy henanizao?

Kaihin’ny Baiboly hoe “andro farany” fotoa iainantsika zao, le amy andro farany zao vomaiky mamitaky olo maro Satana. Matetiky mavandy ty olo mba hamitaha ty hafa, le hahazoa tombony baka aminy. (2 Timoty 3:1, 13) Ndre ty mpivavaky koa aza henanizao mavandivandy iaby. Fa nivola mialoha moa ty Baiboly hoe “hila mpampianatsy ze teany ty olo, mba haharezany ze raha teatean’ny sofiny,” noho “tsy hijanjinany ty fahamarina.”​—2 Timoty 4:3, 4.

Mbo tena ilà va ty fahamarina?

Mahavy ty olo hifampatoky ty fanaova ty marina. Laha tsy misy ty fifampatokisa, le tsy misy finamà na orinasa vano zao. Volanin’ny Baiboly koa fa tea-Ndranahary hanompo azy amy fahamarina tsika. Zao ty volaniny: “Ze mivavaky aminy [Ndranahary], le tsy maintsy mivavaky araky ty fanahy noho ty fahamarina.” (Jaona 4:24) Laha mianatsy ty fahamarina amy Baiboly ao iha, le hohainao ty vandy ataon’ny fivavaha reo sady ho afaky hiala aminy iha. Vakio moa ty lahatsoratsy mifampitohy hoe “Inona avy Ireo Lainga Momba An’Andriamanitra?”

Manino aho ro tea-Ndranahary hahay ty marina?

Tea-Ndranahary hiay zisiky farany iha. Fe mila mianatsy ty marina mikasiky azy iha zay vo afaky hahazo ani-zay. (1 Timoty 2:4) Laha mianatsy ty fitsipiki-Ndranahary mikasiky ty mety noho ty tsy mety iha, le ho afaky hifandramby mariny aminy. (Salamo 15:1, 2) Naniraky an’i Jesosy anakilahiny ho an-tany etoy Ndranahary mba hampianatsy ty olo ty marina. Teany koa laha mijanjy an’ny raha nampianarin’i Jesosy rey tsika.​—Matio 17:5; Jaona 18:37.

Mbo hofoana-Ndranahary avao va ty vandy?

Eka. Tena hala-Ndranahary ty olo mamerivery olo mba hahazoa tombony. Nampitamà ie fa haripakiny iaby ze olo mavandivandy rey. (Salamo 5:6) Hanatanteraky an’ny raha nivolaniny toy koa ie lafa manao ani-zay: “Haharitsy zisiky farany ty sonin’olo mivola ty marina.”​—Ohabolana 12:19.