Hasoavo ty Vavaky Ataonao

1. Asàni-Jehovah hanao ino ty mpanompony? (Henteo koa sary io.)

AMIN’ia ro azontsika ilà fanampea lafa tsika mila fampionona noho tari-dala? Haintsika ty valini-fanontanea zay. Afaky mivavaky amy Jehovah Ndranahary tsika. Ie mihintsy aza ro manasa antsika hanao ani-zay. Mivola ty Baiboly hoe: “Ka mieny mivavaky.” Teani-Jehovah zany laha mivavaky aminy matetiky tsika. (1 Tes. 5:17) Afaky mivavaky aminy avao tsika sady afaky mila tari-dala aminy amy ty raha iaby iainantsika. (Ohab. 3:5, 6) Ndranahary matariky Jehovah ka tsy asiany fetrany mihintsy ty fotoa ahafahantsika mivavaky aminy.

2. Ino ty hodinihintsika amy lahatsoratsy toy ato?

² Tena misaotsy ani-Jehovah tsika satria engàny hivavaky aminy. Fe ndre afaky manao ani-zay tsika iaby, le mety ho sarotsy amintsika ty hahita fotoa hivavaha. Mety ho tsapantsika koa hoe mila hasoavy ty vavaky ataontsika. Soa avao fa afaky mahita tari-dala noho fampahereza mikasiky ani-zay tsika amy Soratsy Masy ao. Hodinihintsika amy lahatsoratsy toy ty raha tokony ataontsika mba hananantsika fotoa hivavaha. Hanampy antsika amy zay ty modelini-Jesosy. Handiniky raha limy bevata hanampy antsika hanasoa ty vavaky ataontsika koa tsika ato.

NANOKA FOTOA HIVAVAHA JESOSY

3. Ino ty raha nihaini-Jesosy mikasiky vavaky?

³ Haini-Jesosy fa tena lafovily amy Jehovah ty vavaky ataontsika. Talohani-niaviany tan-tany etoy, le nahita ani-Babany namaly ty vavakini-lahilahy noho ampela tsy nivaliky taloha tany rey ie. Tanilani-Babany eo, ohatsy, Jesosy lafa Babany namaly ty vavaky vokatsini-fo nataoni-Hana, Davida, Elia, noho ty olo hafa tsy nivaliky. (1 Sam. 1:10, 11, 20; 1 Mpanj. 19:4-6; Sal. 32:5) Tsy mahatseriky zany laha nampianatsy ani-mpianatsiny rey ie mba hivavaky matetiky noho hatòky hoe hamaly ty vavaky ataon-drozy Jehovah!​—Mat. 7:7-11.

4. Ino ty ianarantsika baka amy vavaky nataoni-Jesosy rey?

⁴ Nanome modely ani-mpianatsiny rey Jesosy lafa nivavaky tamy Jehovah. Nivavaky matetiky ie tamy ie nanao ty fanompoany tan-tany etoy. Tsy maintsy nanoka fotoa hivavaha ie satria nimaro raha atao sady nanaraky azy avao vahoaky rey. (Mar. 6:31, 45, 46) Nifoha maray ie, amy zay mba ho afaky hivavaky. (Mar. 1:35) Nisy fotoa, ohatsy, ie nivavaky zisiky maraindray lafa handramby fanapahan-kevitsy bevata. (Lioka 6:12, 13) Nivavaky matetitetiky koa ie tamy haly talohani-nahafatesany iny satria hiatriky raha farani-ze sarotsy tamy raha naniraha azy tan-tany etoy.​—Mat. 26:39, 42, 44.

5. Akory ty azontsika anahafa ani-Jesosy?

⁵ Hitantsika tamy modelini-Jesosy hoe tokony hanoka fotoa hivavaha avao tsika ndre maro raha atao aza. Manahaky ani-Jesosy, le mila manao fandaharam-potoa tsika mba hivavaha. Azontsika atao, ohatsy, ty mifoha maray na manoka fotoa kelikely amy hariva rey. Laha manao ani-zay tsika, le asehontsika ani-Jehovah hoe lafovily amintsika fanomeza miavaky io. Nifalifaly, ohatsy, ranabavy Lynne tamy ie vo nahay hoe tena tombontsoa ty mivavaky. Nivola ie hoe: “Lafa nihaiko hoe afaky miresaky amy Jehovah avao aho amy fotoa iaby, le nirambesiko sahala amy Namako ie sady lasa ta hanasoa ty vavaky ataoko aho.” Azo antoky fa maro amintsika koa ty mahatsapa manahaky ani-zay. Ndao amy zay tsika handiniky raha limy bevata azontsika resahy amy vavaky.

RAHA LIMY BEVATA AZONTSIKA RESAHY AMY VAVAKY

6. Laha hentea ty Apokalypsy 4:10, 11, maeva hamea ino Jehovah?

⁶ Miderà ani-Jehovah. Nahita fahità apostoly Jaona ndraiky zay, le nisy anti-panahy 24 nivavaky amy Jehovah tan-danitsy any. Nidera a Ndranahary rozy ka nivola hoe maeva hamea “voninahitsy noho haja voho hery” ie. (Vakio Apokalypsy 4:10, 11.) Mana antony maro hiderà ani-Jehovah koa ty anjely tsy mivaliky. Miaraky aminy an-danitsy any rozy ka mahay azy soa. Lasa mahay ty toetsini-Jehovah rozy lafa mandiniky ty raha ataony sady voatosiky hidera azy.​—Joba 38:4-7.

7. Ino ty azontsika iderà ani-Jehovah?

⁷ Tokony hidera ani-Jehovah koa tsika lafa mivavaky. Manao ani-zay tsika lafa resahintsika aminy hoe ino ty raha teantsika aminy le ino ty antony mahavy antsika tea azy. Lafa mamaky noho mianatsy Baiboly iha, le anovo hay hoe ino amy toetsini-Jehovah rey ro tena teanao. (Joba 37:23; Rom. 11:33) Bakeo resaho amy Jehovah ty raha tsapanao mikasiky ani-toetsiny rey. Afaky midera ani-Jehovah koa tsika satria manampy antsika noho ty mpiara-manompo amintsika iaby ie. Mikarakara antsika avao ie sady miaro antsika.​—1 Sam. 1:27; 2:1, 2.

8. Ino ty antony sisany mahavy antsika misaotsy ani-Jehovah? (1 Tesalonianina 5:18)

⁸ Misaora ani-Jehovah. Maro ty antony mahavy antsika tokony hisaotsy ani-Jehovah lafa mivavaky. (Vakio 1 Tesalonianina 5:18.) Afaky misaotsy azy tsika amy ze raha iaby ananantsika satria baka aminy ty fanomeza soa iaby. (Jak. 1:17) Azontsika atao, ohatsy, ty misaotsy azy satria soasoa tanintsika toy noho ty raha iaby niforoniny. Afaky misaotsy azy koa tsika satria nameany ay, fianakavia, nama, noho raha tamany. Ta hisaotsy ani-Jehovah koa tsika satria engàny hinama aminy.

9. Manino tsika ro tokony hiezaky hahay hankasitraky ani-Jehovah avao?

⁹ Mety mila manao ezaky kelikely vasa tsika mba handiniha ty antony mahavy antsika hankasitraky ani-Jehovah. Tsy mahay misaotsy moa ty ankamaroan’olo henanizao. Matetiky ty olo mifantoky amy ze raha teany ho azo avao fa tsy mba mahay mankasitraky. Laha manomboky manahaky ty toe-tsain-drozy tsika, le lasa hangataky avao saky mivavaky. Ka laha tsy teantsika hiseho raha zay, le mila miezaky avao tsika mba hahay hankasitraky ty raha iaby ataoni-Jehovah ho antsika.​—Lioka 6:45.

10. Manino ty fahaiza mankasitraky ro nanampy ani-ranabavy io hiaritsy? (Henteo koa sary io.)

¹⁰ Afaky manampy antsika hiaritsy raha sarotsy ty fahaiza mankasitraky. Diniho moa ty raha niainani-ranabavy Kyung-sook.b Nihitani-dokotera hoe voani-kanserani-havokavoky ie. Nivola ie hoe: “Tena nikivy biby aho lafa nahay hoe narary. Natahotsy aho satria atao raha tsy nisy azoko natao zay.” Ino ty nanampy azy hiaritsy? Hoy ty asany: “Mandeha anabo tranonay any aho saky haly alohani-hatory. Mivavaky marè amy Jehovah aho, le misaotsy azy amy ty raha limy nahafalifaly ahy tamy andro iny. Milamindamy ty saiko bakeon’iny ka ta hivola amy Jehovah aho hoe teako ie. Lasa tsapako hoe manoha antsika Jehovah lafa miatriky raha sarotsy tsika sady tsapako koa hoe maro biby mandilatsy ty problemo mahazo antsika ty fitahia azontsika.” Manahaky ani-Kyung-sook, le maro ty raha azontsika isaora ani-Jehovah, ndre miatriky raha tena sarotsy aza tsika. Afaky hiaritsy noho ho falifaly avao tsika laha misaotsy azy lafa mivavaky.

11. Nanino mpianatsini-Jesosy rey ro nila herim-po tafarani-niakarani-Jesosy tan-danitsy any?

¹¹ Mangataha herim-po amy Jehovah lafa mitory. Taloha kelikelini-hiakarani-Jesosy tan-danitsy any, le nampitiaroviny ani-mpianatsiny rey ty andraikitsin-drozy mba hitory mikasiky azy “a Jerosalema any, noho mbamy faritsini-Jodia noho Samaria voho amy faritsy farany lavitsy an-tany eto.” (Asa. 1:8; Lioka 24:46-48) Tsiela tafarani-zay, nisamborini-mpitariky jiosy rey apostoly Petera noho Jaona ka nandesin-drozy amy Fitsarà Anabo Jiosy tao. Niraran-drozy lahilahy reo mba tsy hitory sasy sady nampitahorin-drozy. (Asa. 4:18, 21) Ino ty nataoni-Petera noho Jaona?

12. Ino ty nataoni-mpianatsy rey laha hentea ty Asan’ny Apostoly 4:29, 31?

¹² Lafa baka nampitahorini-mpitariky fivavaha jiosy rey Petera noho Jaona, le namaly rozy hoe: “Nareo ro hitsara laha mety amaso-Ndranahary eo na tsy mety ty hijanjy anareo, fa tsy hijanjy a-Ndranahary. Fa laha ty manahaky anay, le tsy azonay atao ty tsy hivola sasy mikasiky ty raha fa nihitanay noho nirènay.” (Asa. 4:19, 20) Lafa naboaky baka am-prizon ao Petera noho Jaona, le nivavaky tamy Jehovah mpianatsy rey mba hahavita hanao ty sitrapony avao. Nivavaky rozy hoe: “Anovo ze hahavy anay mpanomponao mba tena hahasaky hitory ty safànao.” Nivaleani-Jehovah vavaky baka am-po io.​—Vakio Asan’ny Apostoly 4:29, 31.

13. Ino ty azontsika ianara baka amy Jin-hyuk?

¹³ Manahaky ani-mpianatsy rey koa tsika laha manohy mitory avao ndre mandrara antsika aza ty manam-pahefà. Diniho ty ohatsini-rahalahy Jin-hyuk. Nigadrà ie satria tsy nety nanao maramila. Lafa tam-prizon tao ie, le nitendrè hikarakara ani-gadra sisany natoka pilasy rezay. Fe tsy nahazo niresaky raha tsy mifandramby amy asany iny amin-drozy ie, anatini-zay ty Baiboly. Nivavaky ie le nangataky herim-po mba hahavita mitory saky misy hiriky. (Asa. 5:29) Nivola ie hoe: “Nivaleani-Jehovah vavaky nataoko rey ka nameany herim-po noho fahendrea aho, le afaky nanomboky fampianara Baiboly tamin’olo maro, ndre tanatini-limy minity avao, tam-bavahadini-prizon rey teo. Le lafa hariva amy zay aho nanoratsy taratasy mba hameako ani-gadra rey hamarain’iny.” Afaky matoky koa tsika hoe hanampy antsika hahavita ty fanompoantsika Jehovah. Manahaky ani-Jin-hyuk, le afaky mangataky herim-po noho fahendrea tsika.

14. Ino ty hanampy antsika lafa tsika miatriky raha sarotsy? (Salamo 37:3, 5)

¹⁴ Mangataha fanampea amy Jehovah mba hahavitanao hiatriky ty raha mahazo anao. Miatriky raha sarotsy ty ankamaroantsika satria marary, miasa loha marè, nimaty longo, mana olana ara-pianakavia, enjehy, na miatriky problemo hafa. Le vomaiky mihamafy ty miatriky raha manahaky ani-reo lafa misy arety mandripaky noho aly. Aboraho amy Jehovah iaby ze raha anaty fonao ao. Resaho aminy ty raha mahazo anao manahaky ty ataonao lafa iha miresaky amy tena namanao. Matokisa fa “hanampy anao” Jehovah.​—Vakio Salamo 37:3, 5.

15. Manino ty vavaky ro afaky manampy antsika ‘hiaritsy fijalea’? Manomeza ohatsy.

¹⁵ Hahavita ‘hiaritsy fijalea’ tsika laha tsy mieny mivavaky. (Rom. 12:12) Haini-Jehovah ty raha iaretani-mpanompony ka “janjininy rozy lafa mila fanampea.” (Sal. 145:18, 19) Nahatsapa ani-zay mihintsy Kristie, ranabavy 29 tao sady mpisava lala. Tsy nampoiziny fa lasa nisy arety sarotsy tsaboa nahazo azy. Farany nikivy biby ie. Lafa tafara atoy, nihainy hoe narary mamany, le tsy maintsy ho maty. Hoy Kristie: “Nisoloho tamy Jehovah aho le nangataky hery taminy mba hahavitako hiaritsy avao sanandro. Niezaky nanao raha ara-panahy avao koa aho ka nivory noho nanao fianara am-bata.” Mbo nivola koa ie hoe: “Tsy ho nahavita niatriky ani-raha sarotsy rey aho laha tsy nivavaky. Haiko fa tanilako eo avao Jehovah, le zay ro nanampy ahy tsy hiasa loha marè. Marina fa mbo tsy niafaky arety nahazo ahy iny, fe namaly ty vavaky nataoko Jehovah, ka nameany fiadanan-tsay aho sady nampeany ho kalma avao.” Enga anè tsy ho halinontsika mihintsy hoe “haini-Jehovah ty manafaky ty olo mahafoy tena ho azy mba ho tafaboaky amy fitsapà mahazo azy.”​—2 Pet. 2:9.

16. Manino tsika ro mila ty fanampeani-Jehovah mba hahafahantsika manohitsy fakam-panahy?

¹⁶ Mangataha fanampea amy Jehovah mba hahatohitsy fakam-panahy. Tsy lavorary tsika ka mila mialy mafy avao mba tsy ho voatao hanao raha raty. Manao ze fara heriny Satana mba hahavy antsika vomaiky hialy mafy. Ataony, ohatsy, ze hanimbà ty saintsika ka mampiasa fialam-boly misy fandaisam-bata raty ie. Mety hahavy antsika hieritseritsy raha raty ty fialam-boly manahaky ani-zay, ka lasa tsy halio anatrehani-Jehovah eo tsika sady mety ho voatariky hanao fahotà bevata.​—Mar. 7:21-23; Jak. 1:14, 15.

17. Ino ty tokony hataontsika lafa baka nangataky fanampea tamy Jehovah tsika? (Henteo koa sary io.)

¹⁷ Mila ty fanampeani-Jehovah tsika mba hahafahantsika hanohitsy fakam-panahy hanao raha raty. Henteo moa fa nanao ani-fangataha toy Jesosy tamy vavaky modely iny: “Ka engà ho resini-fakam-panahy zahay, fa afaho amy azy raty iny.” (Mat. 6:13) Ta hanampy antsika Jehovah, fe tsika mihintsy ro mila mangataky fanampea aminy. Tokony hanao raha mifanaraky amy vavaky nataontsika iny koa tsika. Tokony hiezaky mafy tsika mba tsy hamaky na hijanjy hevitsy diso malaza amy tontoloni-Satana toy eto. (Sal. 97:10) Afaky mameno ty saintsika amy raha soa tsika laha mamaky noho mianatsy Baiboly. Miaro ty saintsika koa ty fanatreha fivoria noho fandrambesa anjara amy fanompoa. Sady mampitamà Jehovah fa tsy hanenga antsika halaim-panahy mandilatsy ani-ze zakantsika ie.​—1 Kor. 10:12, 13.

18. Mila manao ino tsika kiraidraiky?

¹⁸ Miay amy andro farany tsy mora atrehy tsika henanizao ka vomaiky mila mivavaky matetiky tsika kiraidraiky, laha tsy ta hivaliky amy Jehovah mihintsy. Manokàna fotoa sanandro mba hivavaha amy fo. Teani-Jehovah laha ‘aborakintsika aminy ze raha am-pontsika ao’ lafa tsika mivavaky. (Sal. 62:8) Derao noho isaoro Jehovah amy ze raha iaby ataony. Angataho ie mba hanome herim-po anao lafa iha manompo. Iangavio ie mba hanampy anao hahavita hiaritsy ty raha sarotsy mahazo anao noho mba hahafahanao hanohitsy ani-ze fakam-panahy mety hatrehinao. Ka engà hisy raha na olo hisaka anao tsy hivavaky matetiky amy Jehovah. Fe manao akory ty amaleani-Jehovah ty vavaky ataontsika? Handiniky ani-fanontanea bevata zay tsika amy lahatsoratsy manaraky ao.