Maro ty Raha Nahafalifaly Tsy Nampoizinay Noho Nianaranay Tamy Fanompoa ani-Jehovah

Niala ta Estonỳ any ty ray aman-dreniko tanatini-Aly Bevata II iny, le nandeha an’Alemaigny any. Tany aho ro nateraky. Lafa niteraky ahy rozy le nioma handeha hifindra a Kanada any. Tanilani-Ottawa, a Kanada any ty tranonay voalohany. Trano fiharea akoho raha io sady kelikely biby. Tena nahantra zahay, fe soa avao fa mba nisy atoly maro taminay ao nataonay sakafo maray.

Ndraiky zay, nisy Vavolombeloni-Jehovah namaky ty Apokalypsy 21:3, 4 tamy mamako. Lafa nivita vaky andinin-teny io, le nifalifaly biby ie ka nilatsaky ty ranomasony. Samby nanohy nianatsy Baiboly mamako noho babako, ka tsiela avao rozy le fa natao batisa.

Tsy de nahay anglè mamako noho babako, fe ndre zay le nazoto nanompo ani-Jehovah rozy. Niasa tamy orinasa fampitranaha vy ta Sudbury, a Ontario any zay babako, le miasa mafy avao ie saky haly. Fe tozoro andesiny manompo avao zahay amy Sylvia, zaiko ampela iny presky saky Sabotsy. Niaraky nianatsy Tilikambo Fiambena koa zahay sankerinandro. Nampeani-Mama noho Baba aho mba ho tea a Ndranahary. Farany nanapa-kevitsy aho, le nanoka ty fiainako ho ani-Jehovah tamy 1956. Mbo 10 tao aho tamy zay. Tena tea ani-Jehovah rozy, ka saky mieritseritsy ani-zay aho le lasa ta hanompo ani-Jehovah avao.

Lafa nivita ty fianarako, le somary nitandrena aho ka tsy de nifantoky tamy fanompoa ani-Jehovah. Nieritseritsy aho hoe laha zaho hoasako manao mpisava lala le tsy hahavory drala, kanefa mba ta hiondra rapolany aho le hahita ani-zao tontolo zao. Nahita asa zay aho. Mpangalaky feo moziky raha io sady niteako biby. Fe niasa hariva aho, ka lasa nanapatapaky fivoria. Lasa ninama tamin’olo tsy tea a Ndranahary rey iaby aho. Farany nanea ahy ty eritseritsiko le nanao fanovà aho.

Nifindra ta Oshawa, a Ontario any aho. Nifankahita tamy Ray Norman aho lafa tany, le nifankahita tamy Lesli anabaviny noho mpisava lala hafa rezay. Tena nirambesin-drozy soa aho. Hitako hoe falifaly avao rozy ka nandiniky ty vatako aho. Lasa nanova ty raha teako hatao tamy fiainako amy zay aho. Nampirisihin-drozy aho mba hanao mpisava lala, le nanao aho tamy Septambra 1966. Nifalifaly biby aho sady niteako ty fiainako. Fe nisy raha niseho tampoky nanova ty fiainako.

ANOVO ZE RAHA AMPANAOVINI-JEHOVAH ANAO

Tamy zaho mbo nianatsy, le nandefa fangataha tamy Betelani-Toronto, a Kanada any. Lafa zaho nanao mpisava lala tafara atoy, le nahazo fanasà hiasa efatsy tao tamy Betela any. Fe niteako biby Lesli, ka natahotsy aho hoe laha maneky aho le tsy hahita azy sasy. Farany nivavaky mafy aho. Lafa baka nivavaky aho le nanapa-kevitsy hoe hiasa amy Betela any. Fe nalahelo biby aho lafa nanao veloma ani-Lesli.

Niasa tamy fanasan-damba tamy Betela ao aho, le lasa sekretera lafa tafara atoy. Tamy zay koa Lesli nivoatendry ho mpisava lala manoka ta Gatineau, a Québec any. Nieritseritsy mikasiky azy avao aho matetiky, le niasa loha hoe manao akory ie any zay, mba nety avao va fanapahan-kevitsiko iny. Fe toy nisy raha tsy nampoiziko. Anisani-raha tena niteako tamy fiainako io. Nivoatendry hiasa tamy Betela ao Ray, anadahini-Lesli iny. Lasa niharo efitsy zahay! Lasa afaky nifandramby tamy Lesli ndraiky aho. Nifanambaly zahay lafa nariny ho tampitsy efatsy tao nanompoako tamy Betela tao iny, zany hoe tamy 27 Fevriè 1971.

Nivoatendry tamy fiangona mampiasa fivolana fransè ta Québec tao zahay amy Lesli. Tsy nampoiziko fa nivoatendry ho mpiandraikitsini-faritsy aho tao vitsivitsy tafara atoy, kanefa mbo 28 tao aho tamy zay. Nieritseritsy aho hoe mbo mpamaraky sady tsy mana traikefa, ka tsy maeva ho mpiandraikitsini-faritsy. Fe nampahery ahy ty safà amy Jeremia 1:7, 8 ao. Nisy raha hafa niseho koa. Niaksidà Lesli satria nifampidofotsy tamy tomobily, ka lasa tsy nety niroro. Nieritseritsy amy zay zahay hoe tsy ho vitanay hanao asani-faritsy zao. Fe nivola Lesli hoe: “Lafa misy raha teani-Jehovah hampanaovy antsika, tsy tokony hiezaky hanao ani-raha iny va tsika?” Naneky ani-fanendrea iny zahay, le nifalifaly avao nanao ty asani-faritsy tanatini-17 tao.

Tena nimaro biby ty andraikitsiko tamy zaho mbo nimpiandraikitsini-faritsy, ka tsy de nanam-potoa firy hiaraha tamy Lesli aho. Nisy raha vaovao tsy maintsy nianarako. Latsinainy ty andro tamy zay sady mbo mangoantinana. Nisy nandondò tam-baravaranay teo. Fe tsy nisy olo teo fa paniè fandesy mitsangatsanga ro teo, le nisy saron-databatsy, voankazo, fromazy, mofo, divay tavoangy raiky, noho vera. Nisy soratsy koa teo hoe: “Mba andeso mitsangatsanga valinao.” Tena nisoasoa biby tamy zay sady niboaky soa koa ty masoandro. Fe nivola tamy Lesli aho hoe hanao lahateny aho ka tsy maintsy manoma, le tsy afaky handeha. Azony soa raha zay fe somary nalahelo ie. Lafa zaho hanoma tamy latabatsy teo le nanomboky nanea ahy ty eritseritsiko. Nieritseritsy ty Efesianina 5:25, 28 aho. Haiko fa nampitiaro ahy Jehovah baka amy andininy reo hoe mila midary ty fihetseham-poni-valiko aho. Farany nivavaky aho, le nivola tamy Lesli hoe: “Lasa tsika a.” Nifalifaly biby ie tamy zay. Nandeha tomobily zahay, le nijano tamy pilasy soasoa anilani-vavarano zay. Namelatsy lamba zahay, le niaraky nifalifaly teo. Tsy halinonay mihintsy andro io. Nitohizako ndraiky fanomana lahateny iny tafarani-zay.

Nimaro ty faritsy nitsidihinay sady tena nisoasoa iaby, baka a Kolombỳ Britaniky le zisiky a Terre-Neuve any. Nitanteraky amy zay faniriako tamy mbo nikely iny. Ta ho nanao Sekolini-Gileada aho fe tsy ta handeha an-tany hafa any. Nieritseritsy koa aho hoe olo miavaky misionera rey ka tsy maeva ho misionera aho. Tsy vitani-zay fa natahotsy aho tsy no ho voatendry amy tany misy arety noho feno aly an’Afriky any. Fa nety tamiko avao ty ta Kanada any.

FANENDREA TSY NAMPOIZY HO A ESTONỲ NOHO AMY TANY BALTIKY

Tamy 1992, le afaky nitory nalalaky soa ndraiky ty Vavolombeloni-Jehovah tamy faritsy sisany iandraiketani-Sovietiky. Nivola taminay amy zay rahalahy rey laha afaky mifindra a Estonỳ any zahay le ho misionera any. Nitampoky anay aloha raha iny, fe nivavaky mikasiky ani-raha iny zahay. Nieritseritsy ndraiky zahay hoe: ‘Lafa misy raha teani-Jehovah hampanaovy antsika, tsy tokony hiezaky hanao ani-raha iny va tsika?’ Nekenay fanendrea iny. Soa avao koa hoasako fa tsy nalefa tan’Afriky any zahay.

Avy le nianatsy fivolana estoniein zahay. Vo roe vola avao ty nipetrahanay tamy tanà iny tany, le nitendrè hanao ty asani-faritsy zahay. Nitsidiky fiangona 46 noho antoko mpitory ta Estonỳ, Latvia, Litoanỳ, noho ta Kaliningrad a Russie any zahay. Tsy maintsy mianatsy ani-fivolana reo zany zahay. Tsy mora taminay aloha ty nanao ani-zay. Fe nifalifaly rahalahy noho anabavy reo satria niezaky nianatsy ty fivolanan-drozy zahay, sady rozy koa nanampy anay. Lasa nisy biròni-sampana ta Estonỳ any tamy 1999, le nivoatendry Komitini-Sampana aho niaraky tamy Toomas Edur, Lembit Reile, noho Tommi Kauko.

Lasa nahay Vavolombeloni-Jehovah maro natao sesitany ta Siberỳ any rey zahay. Tsy neloky na nitanjaky lolompo mihintsy rozy ndre nampijalijalỳ aza tam-prizon tao sady nisarahy tamy fianakaviany. Niezaky ho falifaly avao rozy sady nazoto tamy fanompoa. Hitanay tamy modelin-drozy hoe afaky miaritsy noho ho falifaly avao zahay ndre miatriky raha sarotsy aza.

Niasa mafy avao zahay tanatini-tao maro sady tsy mba nanoka fotoa hitofà, farany lasa nahatiaro vozaky avao Lesli. Tsy nihainay hoe ino nahavy ani-Lesli mahatiaro vozaky avao io, ka nieritseritsy hiala zahay le himpoly a Kanada any. Fe nihainay avao raha iny tafara atoy lafa zahay ta Etazinỳ any. Nasà hanatriky ty sekoly ho ani-Komitini-sampana natao ta Patterson, a New York, a Etazinỳ any zahay. Tsy nieritseretiko hoe ho afaky hanatriky ani-sekoly iny zahay. Fe lafa baka nivavaky mafy zahay le nekenay fanasà iny. Nitahini-Jehovah fanapahan-kevitsinay iny. Nivoatsabo soa avao Lesli lafa tany zahay. Vokany, lasa afaky niasa soa ndraiky zahay.

TSY NAMPOIZINAY FA NIVOATENDRY TAMY TANÀ HAFA ZAHAY

Lafa nimpoly ta Estonỳ any zahay tamy 2008, le nahazo kaiky an-telefony baka amy foibe any aho ndraiky hariva zay. Nivola rozy bakany fa laha teanay le ho tendrè a Congo any zahay. Nitofotsy aho, sady raha iny amin’io mila valea hamarain’iny avao. Tsy nivolaniko tamy Lesli tse raha iny tamy voalohany satria haiko fa tsy ho azon-droro ie amy haly iny. Kay hondy zaho ro tsy niazon-droro satria nivavaky tamy Jehovah mikasiky ani-raha nampiasa loha ahy iny, zany hoe ty handeha an’Afriky any.

Lafa nivolaniko tamy Lesli raha iny hamarain’iny, le hoy ty asany: “Teani-Jehovah ho an’Afriky any tsika. Ka manao akory moa ty ahafahantsika mivola hoe tsy ho vitantsika ty handeha any laha tsy mandeha any mihintsy tsika?” Fa nipetraky ta Estonỳ any tanatini-16 tao amin’io zahay, le bakeo nandeha a Kinshasa, a Congo any. Nisy zariday soasoa biby tamy biròni-sampana tao sady nilamindamy. Lafa tamy efitsy fatorianay tao zahay, le nisy raha zay napetrakini-Lesli tao. Karta nihajariny tamy zahay niala baka a Kanada any raha io. Ho zao ty nisoratsy tamy karta iny: “Mifalifalea avao ndre aia ty misy anao.” Lafa nifankahita tamy mpiara-manompo zahay, nampianatsy Baiboly, noho nahazo tavy ty asani-misionera, le nitombo ty hafaleanay amy fanompoa ani-Jehovah. Lafa nandeha ty fotoa le nahazo tombontsoa hafa zahay. Nivoatendry hitsidiky faritsy 13 tan’Afriky any zahay. Lasa nahita olo sankarazany zahay sady nihainay koa hoe samby mana ty mampiavaky azy ty olo. Tsy nampiasa loha ahy sasy ty hoe ho an’Afriky any, sady nisaotsy ani-Jehovah zahay nandefa anay tany.

Maro biby ty karazan-kany nihaninay lafa ta Congo any, anisani-zay ty bibikely. Zaho aloha hoasako tamy voalohany tsy hihina ani-rey mihintsy. Fe lafa nihitanay hoe teani-rahalahy noho anabavy reo raha rey, le lasa nihina koa zahay sady niteanay raha rey.

Nandeha tamy ilany antinana tamy tanà iny zahay mba hampahery ani-rahalahy noho anabavy tany rey sady nanday ze raha nilan-drozy. Nisy olo maromaro nanafiky ani-tanà iny sady nampijalin-drozy ty ampela noho ty ajà. Tsy nanan-draha mpiara-manompo rey. Fe tena nampahery anay rozy satria tena nino ty fameloma ty maty. Tena tea ani-Jehovah koa rozy sady tsy nivaliky tamy fandamina. Lasa nandiniky ty antony anompoanay ani-Jehovah zahay lafa nahita ty modelin-drozy. Ty sisany amin-drozy nisimba ty tranony sady nipotiky koa ty fambolean-drozy. Nampitiaro ahy raha zay hoe tena mora rava ty hanana, ka ty fifandrambesantsika amy Jehovah ro tena vatan-draha. Tsy nimenimeny mpiara-manompo reo ndre teo ty raha sarotsy natrehin-drozy. Nana toe-tsay soa rozy ka tena nanampy anay hiatriky ty raha sarotsy nahazo anay raha zay, anatini-zay ty tsy fahasalamà.

FANENDREA VAOVAO TAN’AZỲ ANY

Mbo nisy raha hafa koa tsy nampoizinay. Nivoatendry tamy sampani-Hong Kong tao zahay. Tsy tan-tsainay tao mihintsy hipetraky an’Azỳ any zao! Fe tsapanay hoe nanampy anay avao Jehovah saky nahazo fanendrea zahay, farany naneky zahay. Nanenga ani-nama tsy foinay rey zahay tamy 2013, le nilatsaky ty ranomasonay. Soasoa koa moa ty an’Afriky any kanefa mbo tsy hainay ty amy fanendrea vaovao iny.

Tena tsy nimora taminay ty nipetraky ta Hong Kong any satria maro olo biby ty any sady maro olo baka amy firenena samby hafa. Sarotsy hay koa ty fivolanan’olo any. Fe nandramby soa anay ty mpiara-manompo sady niteanay koa ty hany tany. Nihamaro ty asa nila natao tamy sampana tao, fe niakatsy koa ty vilin-draha. Farany nanapa-kevitsy ty Filan-kevi-pitantana hoe ahena ty asa tao le nafindra an-tany hafa, bakeo navily ty ankamaroani-tany noho tranoni-sampana. Tsiela tafarani-zay, zany hoe tamy 2015 zahay nivoatendry a Korè Antimo atoy, le mbo atoy zahay zisiky henanizao. Sarotsy aminay koa ty fivolanan’olo atoy. Fe ndre tsy de mahay soa ani-fivolana io aza zahay, le mampahery anay rahalahy noho anabavy reo ka mivola hoe fa mihamahay zao zahay.

TY RAHA NIANARANAY TAMY FANOMPOA ANI-JEHOVAH

Tena tsy mora aloha ty hamoro nama vaovao, fe nahita nama avao zahay satria nanasa olo ho an-tranonay any. Tsielatsiela avao le fa nifankazatsy tamin’olo zahay. Nihitanay hoe hafa mihintsy mpiara-manompo amintsika reo, sady Jehovah koa lafa namoro antsika le nataony mora mifandramby am-po amin’olo tsika ka afaky minama amin’olo maro.—2 Kor. 6:11.

Nihitanay fa tokony hanahaky ani-Jehovah zahay ka tsy hanavakavaky, le handiniky ty porofo ahità fa tena tea anay Jehovah sady mitari-dala anay. Saky kivikivy zahay na miasa loha hoe tea anay va rahalahy noho anabavy reo, le ampolinay vakỳ ndraiky karta na taratasy mampahery baka amy namanay rey. Tena tsapanay hoe namaly ty vavaky nataonay Jehovah, le nanome toky anay ie hoe tea anay sady nameany hery zahay mba hahavitanay hiatriky raha sarotsy.

Nisy raha bevata nianaranay amy Lesli tanatini-tao maro zay. Tokony hanoka fotoa hiaraha avao zahay ndre maro biby aza ty raha ataonay. Lasa nihainay koa hoe tena ilà ty mba mihehy kelikely lafa tena manao hadisoa rey, sirtò lafa mianatsy fivolana vaovao. Le saky haly zahay mieritseritsy ze raha niteanay ka azonay isaora ani-Jehovah.

Nieritseritsy aho taloha fa tsy ho vitako mihintsy ty hanao misionera na hipetraky amy tany hafa. Fe falifaly aho satria nihitako tamy raha niainako fa tsy misy raha tsy ho vita zao lafa manampy Jehovah. Tiaroko raha nivolanini-Jeremia mpaminany iny hoe: “Nifitahinao lahy aho Jehovah.” (Jer. 20:7) Maro biby ty raha soasoa tsy nieritseretinay ho azo fe nameany anay. Fa tsy hay volany koa ty fitahia niazonay. Ndre nofinofiko tamy mbo nikely hiondra rapolany iny aza nitanterahiny. Niondra rapolany zahay le nitsidiky sampana tamy tany maro. Nandilatsy ty raha nieritseretiko tamy zaho mbo nikely iny raha zay. Tena isaorako bevata koa Lesli satria niparè hanoha ahy avao ie tamy fanendrea sankarazany reo.

Iezahanay tiarovy avao sanandro hoe nanao ani-raha iaby reo zahay satria teanay Jehovah. Hitanay amy raha soa maro azonay henanizao reo fa mbo ho soasoa biby ty fiaina amy hoavy lafa ‘hanokatsy ty tanany Jehovah ka hanome fahafaham-po ty faniriani-rahamananay iaby.’—Sal. 145:16.