Manino Tsika ro Tokony Hatahotsy ani-Jehovah?

1-2. Laha hentea ty Salamo 25:14, ino ty tokony hataontsika laha teantsika ty hinama amy Jehovah?

AKORY ty hevitsinao, ino ty toetsy tokony hanananao laha teanao ty hinama avao amin’olo raiky? Mety hamaly iha hoe tokony hifankatea noho hifanampy avao ty tena mpinama. Mety hieritseritsy koa iha hoe tsy de ilà ty hoe mifankatahotsy lafa ty olo roe mpinama marè. Fe hitantsika amy foto-kevitsy amy lahatsoratsy toy hoe tsy maintsy “matahotsy ani-Jehovah” ze olo ta hinama aminy.—Vakio Salamo 25:14.

² Samby mila manaja ani-Jehovah iaby tsika, ndre fa ela ndre vo betibety ty nanompoantsika azy. Fe ino moa ty dikani-hoe matahotsy a Ndranahary? Akory ty hahavy antsika hatahotsy azy? Le ino ty azontsika ianara baka amy Obadia, Joiada Mpisorobe, noho Joasy Mpanjaka mikasiky ty tahotsy a Ndranahary?

INO TY DIKANI-HOE MATAHOTSY A NDRANAHARY?

3. Manino tsika ro afaky mivola hoe miaro antsika ty tahotsy? Manomeza ohatsy.

³ Ty hoe matahotsy a Ndranahary, le midika hoe matahotsy tsy no hanao raha mampalahelo azy. Marina fa tsy de soa ty hoe matahotsy, fe mahasoa antsika raha zay satria mahavy antsika hiamby soa avao lafa misy raha ataontsika. Laha mandeha amy pilasy misy lavaky, ohatsy, tsika le miezaky mba tsy hihariny eny satria matahotsy tsy no ho latsaky any. Lafa misy raha mampidi-doza koa, le avy le miala teo tsika satria matahotsy tsy no ho azon-doza. Mitandrina mafy koa tsika mba tsy hivola na hanao raha mampalahelo ty namantsika satria matahotsy tsika tsy no ho rava ty finamantsika.

4. Ino ty raha teani-Satana hoeritseretintsika mikasiky ani-Jehovah?

⁴ Teani-Satana hieritseritsy tsika hoe mampatahotsy Jehovah zao. Ataony ze hinoantsika hoe romodromotsy lava Jehovah ka tsy ho vitantsika mihintsy ty hampifaly azy. Tsy misy raha haini-Jehovah hoasany laha tsy hanasazy antsika avao. (Joba 4:18, 19) Teani-Satana laha lasa matahotsy marè ani-Jehovah tsika, amy zay tsy hanompo azy sasy. Fe tsy tokony hanao manahaky ani-zay tsika. Vomaiky aza tsika tokony hiezaky hanaja azy noho tsy hanao raha mampalahelo azy.

5. Ino ty dikani-hoe matahotsy a Ndranahary?

⁵ Ty olo raiky matahotsy a Ndranahary, le tea azy ka tsy ta hanao raha hanimba ty fifandrambesany aminy mihintsy. “Natahotsy a Ndranahary”, ohatsy, Jesosy. (Heb. 5:7) Fe tsy nahatsapa ie hoe mampatahotsy marè Jehovah. (Isaia 11:2, 3) Vomaiky aza ie nitea azy ka naniry hanoriky ze raha volaniny avao. (Jaona 14:21, 31) Manahaky ani-Jesosy, le tena manaja noho matahotsy ani-Jehovah tsika satria ie be fitiava, hendry, manao ty rariny, noho mahery. Haintsika hoe tena tea antsika Jehovah sady misy vokany aminy ze fomba andrambesantsika ty raha ampianariny antsika. Laha tsy manoriky ty safàny tsika, le malahelo ie. Fa laha manoriky ty safàny tsika, le falifaly biby ie.—Sal. 78:41; Ohab. 27:11.

MIANARA HATAHOTSY A NDRANAHARY

6. Ino ty fomba raiky hanampy antsika hatahotsy a Ndranahary? (Salamo 34:11)

⁶ Tsy hoe vo teraky tsika le fa matahotsy ani-Jehovah. Tsy maintsy miezaky hatahotsy azy tsika. (Vakio Salamo 34:11.) Akory ty hanaovantsika ani-zay? Azontsika atao, ohatsy, ty mandiniky ty zavaboary. Lafa hitantsika baka amy ‘raha niforoniny’ hoe hendry Jehovah, mahery ie sady tena tea antsika, le vomaiky tsika ho tea noho hanaja azy. (Rom. 1:20) Zay mihintsy ty nitsapani-ranabavy Adrienne. Nivola ie hoe: “Lafa zaho mandiniky ty raha iaby niforonini-Jehovah, le hitako hoe hendry ie. Tsy vitani-hoe tandrena aho, fa lasa haiko koa hoe tena mahay ze hahasoa ahy ie.” Lafa nieritseritsy matetiky mikasiky ani-zay ie le nivola hoe: “Tsy ta hanao raha hanimba ty fifandrambesako amy Jehovah, azy nanome fiaina ahy iny aho.” Afaky manoka fotoa kelikely koa va iha amy herinandro toy mba handiniha ty raha niforonini-Jehovah? Laha manao ani-zay iha, le vomaiky ho tea ani-Jehovah noho hanaja azy.—Sal. 111:2, 3.

7. Manino ty vavaky ro manampy antsika hatahotsy ani-Jehovah?

⁷ Toy koa misy fomba hafa hanampy antsika hatahotsy a Ndranahary: Mivavaky tsy tampaky. Arakaraky ty ivavahantsika, le vomaiky tsika hahay soa ani-Jehovah. Saky tsika mangataky hery aminy mba hahavitantsika hiaritsy raha sarotsy, le lasa ho tiarontsika hoe mahery ie. Lafa tsika misaotsy ani-Jehovah amy nanomezany ani-Anakilahiny iny, le ho tiarontsika hoe tena tea antsika ie. Lafa tsika koa mangataky fanampea aminy lafa misy problemo mahazo antsika, le ho hitantsika hoe tena hendry ie. Hanampy antsika hanaja marè ani-Jehovah ty vavaky manahaky ani-reo. Sady vomaiky tsika ho tapa-kevitsy hanalavitsy ze raha mety hanimba ty fifandrambesantsika aminy.

8. Ino ty azontsika atao mba hahavy antsika hatahotsy a Ndranahary avao?

⁸ Hatahotsy a Ndranahary avao tsika laha mianatsy Baiboly. Misy olo nanao raha soa noho nanao raha raty ty amy Baiboly ao, le soa laha miezaky mandramby fianara baka amy raha rey tsika. Ndao moa tsika handiniky mpanomponi-Jehovah roe tsy nivaliky, tsy ia zay fa Obadia mpanomponi-Ahaba Mpanjaka noho Joiada Mpisorobe. Hodinihintsika koa bakeo hoe ino ty ianarantsika baka amy Joasy Mpanjakani-Joda. Nanompo ani-Jehovah tse ie tamy voalohany, fe bakeo tsy nanompo azy sasy.

MANÀNA HERIM-PO MANAHAKY ANI-OBADIA

9. Manino ro nanampy ani-Obadia ty tahotsy ani-Jehovah? (1 Mpanjaka 18:3, 12)

⁹ Zao ty raha voalohany resahini-Baiboly mikasiky ani-Obadiab: “Olo tena natahotsy ani-Jehovah Obadia.” (Vakio 1 Mpanjaka 18:3, 12.) Nanino ro nahasoa ani-Obadia raha zay? Lasa nanao ty marina noho niazo atokisa, ohatsy, ie farany nitendreni-Ahaba Mpanjaka hiandraikitsy ty raha iaby an-tranony ao. (Ampitovizo amy Nehemia 7:2.) Nanampy ani-Obadia ho be herim-po koa ty tahotsy a Ndranahary. Azo antoky fa tena nila herim-po ie satria niay tamy fotoa nanjakani-Ahaba Mpanjaka raty fanahy. “Nanao ze raty tamasoni-Jehovah eo mandilatsy ty mpanjaka iaby talohany Ahaba.” (1 Mpanj. 16:30) Tsy vitani-zay koa fa tena nalay ani-Jehovah valini-Ahaba mpivavaky amy Bala iny. Tsy ia zay fa Jezebela. Nataony ze hahavy ty olo iaby tamy fanjakàni-foko folon’Israely teo tsy hanompo ani-Jehovah sasy. Nivonoany mihintsy aza ty ankamaroani-mpaminani-Ndranahary. (1 Mpanj. 18:4) Tsy nimora ty raha niainani-Obadia, fe ndre zay le nanompo ani-Jehovah avao ie.

10. Ino ty mampiseho fa tena be herim-po Obadia?

¹⁰ Akory ty nampisehoani-Obadia hoe tena be herim-po ie? Lafa nanomboky nandripaky ty mpaminanini-Jehovah Jezebela, le nisy mpaminany 100 nalàni-Obadia, bakeo navoniny tanaty lava-bato. Nizaràny roe rozy, le nataony tanaty lava-bato samby hafa. Nasiany ‘50 isany iaby lavaky reo sady nanaterany mofo noho rano rozy.’ (1 Mpanj. 18:13, 14) Laha nitratsini-Jezebela Obadia, le azo antoky fa ho nivonoany. Mazava ho azy fa tsy ta ho maty Obadia satria olombelo avao koa ie. Fe tena nitea ani-Jehovah noho ty mpanompony ie ka parè hamoy ty ainy ho an-drozy.

11. Ino ty mampitovy ty mpanomponi-Jehovah henanizao amy Obadia? (Henteo koa sary io.)

¹¹ Mipetraky amy tany andrarà ty asantsika rey any koa ty ankamaroani-mpanomponi-Jehovah henanizao. Manahaky ani-Obadia rahalahy noho anabavy tsy fointsika reo, satria tsy mieny rozy fa manompo ani-Jehovah avao sady miezaky manaja ty manam-pahefà. (Mat. 22:21) Asehon-drozy hoe matahotsy a Ndranahary rozy ka ty safàny ro orihin-drozy fa tsy olombelo. (Asa. 5:29) Akory ty ampisehoan-drozy ani-zay? Miezaky mitory avao rozy sady miaraky mivory, fe mivonivony. (Mat. 10:16, 28) Ataon-drozy azo antoky hoe mahazo hany ara-panahy avao rahalahy noho anabavin-drozy reo. Diniho moa ty tantarani-Henri, mipetraky an’Afriky any. Nisy fotoa nirarà ty asantsika tany. Fe tanatini-fotoa zay, le nanao volontera hizara boky noho gazety amy ty mpiara-manompo aminy Henri. Hoy ty asany: “Olo farani-ze saro-kenatsy aho. Fe lasa nibe herim-po aho satria tena nanaja ani-Jehovah. Azoko antoky hoe zay ro nahavy ahy hahavita ani-zay.” Be herim-po manahaky ani-Henri koa va iha? Ho vitanao zay laha matahotsy a Ndranahary iha.

MIEZAHA TSY HIVALIKY MANAHAKY ANI-JOIADA MPISOROBE

12. Akory ty nampisehoani-Joiada Mpisorobe noho Josebata valiny hoe tsy nivaliky tamy Jehovah mihintsy rozy?

¹² Tena natahotsy ani-Jehovah Joiada Mpisorobe, le zay ro nahavy azy tsy hivaliky noho hampirisiky ty hafa hanompo ani-Jehovah. Zay mihintsy ty raha niseho lafa nanao ty vatany ho mpanjakavavy ta Joda tao Atalia, anakampelani-Jezebela. Rariny laha natahotsy ani-Atalia ty olo satria tena niraty fanahy ie sady nitea fahefà. Nataony mihintsy aza ze hamonoa ty anakilahini-mpanjaka iaby, zany hoe zafiny rey, amy zay ie ro lasa mpanjakavavy. (2 Tan. 22:10, 11) Fe tsy nimaty ty raiky amy anakini-mpanjaka rey. Tsy ia zay fa Joasy satria navotani-Josebata valini-Joiada. Navonin-drozy morovaly ajà iny, le nikarakaran-drozy. Nanao ani-zay Joiada noho Josebata amy zay mba tsy ho lany ripaky ty taranakini-Davida fa hisy ho mpanjaka avao. Tsy nivaliky tamy Jehovah mihintsy Joiada sady tsy natahotsy ani-Atalia.—Ohab. 29:25.

13. Lafa nifeno fito tao Joasy, akory ndraiky ty nampisehoani-Joiada hoe tsy nivaliky tamy Jehovah ie?

¹³ Lafa nifeno fito tao amy zay Joasy, le mbo nasehoni-Joiada ndraiky hoe tsy nivaliky tamy Jehovah avao ie. Nisy tetiky zay nataony. Laha mety raha io, le ho lasa mpanjaka Joasy taranakini-Davida. Fa laha tsy mety raha io, le tsy maintsy ho maty Joiada. Fe nampeani-Jehovah Joiada ka nimety soa raha nataony iny. Nanoha azy ty mpiadidy noho ty Levita, le nataon-drozy mpanjaka Joasy, le bakeo nivonoan-drozy Atalia. (2 Tan. 23:1-5, 11, 12, 15; 24:1) Bakeo “nampanaovini-Joiada fifanekea tamy Jehovah ty mpanjaka noho ty vahoaky hoe ho vahoakini-Jehovah avao rozy.” (2 Mpanj. 11:17) Le “nasiani-Joiada mpiamby vavahady koa tam-bavahadini-tranoni-Jehovah teo, amy zay tsy hisy afaky hilitsy eo ty olo maloto ndre ino ino nampaloto azy.”—2 Tan. 23:19.

14. Nanome voninahitsy ani-Jehovah Joiada ka nameany voninahitsy. Akory ty nampisehoani-Jehovah ani-zay?

¹⁴ Fa nivola Jehovah taloha tany hoe: “Ze manome voninahitsy ahy ro hameako voninahitsy.” Zay vatany ty nataony satria namaly soa ani-Joiada ie. (1 Sam. 2:30) Nampanoratiny amy Baiboly ao, ohatsy, ty tantarani-Joiada amy zay andrambesantsika fianara. (Rom. 15:4) Lafa nimaty amy zay Joiada, le nameany voninahitsy bevata. Nalevy “tamy tanàni-Davida tao niaraky tamy mpanjaka rey ie, satria nanao raha soa ho an’Israely noho ho ani-Ndranahary marina iny noho ty tranony.”—2 Tan. 24:15, 16.

15. Ino ty ianarantsika baka amy tantarani-Joiada? (Henteo koa sary io.)

¹⁵ Manampy antsika iaby hatahotsy a Ndranahary ty tantarani-Joiada. Afaky manahaky ani-Joiada ty anti-panahy ka mila fomba avao mba hiarova ty aondri-Ndranahary. (Asa. 20:28) Hitantsika baka amy tantarani-Joiada iny koa hoe laha matahotsy ani-Jehovah noho tsy mivaliky aminy mihintsy ty olo raiky, ndre fa be tao aza, le hampiasa an-drozy Jehovah mba hanatanteraha ty sitrapony. Tsy hanary an-drozy mihintsy ie. Afaky mandramby fianara baka amy fomba nanandesani-Jehovah ani-Joiada koa ty tanora. Manahaky ani-Jehovah rozy laha manaja noho manome voninahitsy ty rahalahy noho ranabavy be tao, sirtò azy fa ela nanompoa ani-Jehovah rey. (Ohab. 16:31) Samby afaky mandramby fianara baka amy mpiadidy noho Levita nanoha ani-Joiada rey koa tsika iaby. Enga anè tsika mba hanoha avao ani-‘azy mitariky reo’ ka hanoriky ty safàn-drozy.—Heb. 13:17.

KA MANAHAKY ANI-JOASY MPANJAKA

16. Ino ty mampiseho hoe tsy nanan-kazon-dambosy Joasy Mpanjaka?

¹⁶ Nampeani-Joiada Joasy Mpanjaka mba ho lasa olo soa. (2 Mpanj. 12:2) Lafa nibe amy zay mpanjaka iny, le lasa ta hampifalifaly ani-Jehovah. Fe lafa nimaty Joiada, le lasa nijanjy ani-andriana nivaliky rey Joasy. Ino ty vokany? Lasa “nanompo tsato-kazo masy noho sampy” ie miaraky amy vahoakiny rey. (2 Tan. 24:4, 17, 18) Tena nalahelo Jehovah ka “naniraky mpaminany mana amin-drozy any avao ie mba hampirisiky an-drozy himpoly aminy ..., fe tsy nety nijanjy rozy.” Ndre Zakaria aza tsy nijanjinin-drozy, kanefa tsy hoe mpaminanini-Jehovah noho mpisoro avao Zakaria fa rahalahini-Joasy, satria anakilahini-Joiada dadatoany. Nivonoani-Joasy Mpanjaka mihintsy aza Zakaria kanefa fa ho nimaty ie laha tsy teo ty fianakaviani-Zakaria. Tsy mba nankasitraky ty raha natao azy Joasy.—2 Tan. 22:11; 24:19-22.

17. Nanao akory ty niafarani-Joasy?

¹⁷ Tsy tena natahotsy ani-Jehovah Joasy ka niraty fiafara. Fa nivola Jehovah hoe: “Ze manivativa ahy, le hatao afa-baraka.” (1 Sam. 2:30) Lafa nialy tamy Syrianina rey ry Joasy tafara atoy, le niresy rozy kanefa vitsivitsy avao maramila syrianina rey fa rozy “maro biby.” Tena “naratsy mafy” Joasy tamy fotoa zay. Lafa nandeha amy zay Syrianina rey le nivonoani-mpanompony, azy namono ani-Zakaria rey Joasy. Raty fanahy biby mpanjaka io ka nieritseritsy ty olo hoe tsy maeva alevy amy “fasani-mpanjaka” rey ao ie.—2 Tan. 24:23-25.

18. Laha hentea ty Jeremia 17:7, 8, ino ty azontsika atao mba tsy hanahaky ani-Joasy?

¹⁸ Ino ty ianarantsika baka amy tantarani-Joasy? Nanahaky hazo tsy namahatsy soa rey ie ka nila raha hiankina avao. Lafa nimaty Joiada, azy nanoha azy iny, le nanomboky nijanjy ani-andriana nivaliky rey Joasy ka lasa nivaliky tamy Jehovah. Hitantsika baka amy zay fa tsika mihintsy ro tokony hatahotsy a Ndranahary, fa tsy hoe manoriky ty safà-Ndranahary tsika satria manao ani-zay ty fianakaviantsika na ty olo hafa amy fiangona eo. Laha ta hifandramby marìny amy Jehovah avao tsika, le tokony hanamafy ty fitiavantsika azy sady tokony hanaja azy. Hahavita ani-zay tsika laha mazoto mianatsy, mametsivetsy, noho mivavaky.—Vakio Jeremia 17:7, 8; Kol. 2:6, 7.

19. Ino ty raha takini-Jehovah amintsika?

¹⁹ Tsy mitaky raha maro amintsika Jehovah. Fa ino ty raha takiny amintsika? Mivola ty Mpitoriteny 12:13 hoe: “Matahora ani-Ndranahary marina iny ka oriho ty didiny. Satria zay ro adidy farani-ze bevata tokony hataon’olombelo.” Laha matahotsy a Ndranahary tsika, le ho vitantsika ty hanahaky ani-Obadia noho Joiada ka tsy hivaliky amy Jehovah mihintsy, ndre ino ino ty raha hiseho amy hoavy. Tsy hisy afaky hanimba ty fifandrambesantsika amy Jehovah koa.