Manaraha an’i Jesosy Avao Afaran’ny Batisanao

1-2. Ino ty fitahia azon’olo raiky lafa ie vita batisa?

FALIFALY tsika lafa atao batisa noho lasa anisan’ny fianakavian’i Jehovah. Tombotsoa raha zay satria lasa mifandramby marìny amy Jehovah tsika. Mitovy hevitsy amy Davida mpanao salamo tsika. Hoy ty asany: “Sambatsy ze filìnao noho asànao mamonjy anao mba hipetraky an-tokotaninao eo.”​—Sal. 65:4.

² Tsy ty olo iaby ro ekèn’i Jehovah ho anisan’ny fianakaviany. Araky ty niresahy tamy lahatsoratsy taloha teo, le mifily hifandramby amy ze olo ta hifandramby soa aminy ie. (Jak. 4:8) Lafa manokam-bata ho an’i Jehovah noho atao batisa iha le lasa mana fifandrambesa manoka amy Jehovah. Afaky matoky iha fa ‘handatsaky fitahia maro biby aminao, mandilatsy ty ilànao Jehovah’, lafa iha vita batisa.​—Mal. 3:10; Jer. 17:7, 8.

3. Ino ty andraikitsy bevata ananan’ny Kristiana fa nanokam-bata noho natao batisa? (Mpitoriteny 5:4, 5)

³ Mazava ho azy fa vo fanombohany avao ty batisa. Lafa vita batisa iha, le ta hanao ze fara herinao mba hahavy anao hiay mifanaraky amy voady nataonao iny hoe hanompo an’i Jehovah avao, ndre eo aza ty fakam-panahy na raha sarotsy. (Vakio Mpitoriteny 5:4, 5.) Mpianatsin’i Jesosy iha ka azo antoky hoe hanao ze azonao atao mba hanaraha ty modeliny noho ty raha nandidiany. (Mat. 28:19, 20; 1 Pet. 2:21) Hanampy anao hahavita ani-zay lahatsoratsy toy.

MANARAHA AN’I JESOSY AVAO NDRE MIATRIKY RAHA SAROTSY NOHO FAKAM-PANAHY

4. Manino ro volany hoe manday ‘hazo fijalea’ ty mpianatsin’i Jesosy? (Lioka 9:23)

⁴ Ka mieritseritsy hoe hilamindamy ty fiainanao afaran’ny batisanao. Nivola mihintsy aza Jesosy fa handay ‘hazo fijalea’ ty mpianatsiny. Le handay an’ny raha io avao rozy “sanandro.” (Vakio Lioka 9:23.) Nivola va Jesosy hoe hijalijaly avao ty mpanori-dia azy? Aha, tsy zay mihintsy. Ta hivola avao ie fa tsy hoe hahazo fitahia avao rozy fa hiatriky raha sarotsy koa. Mety hampijaly mihintsy aza ty sisany amy raha sarotsy hahazo an-drozy.​—2 Tim. 3:12.

5. Ino hoasan’i Jesosy ty fitahia ho azoni-ze mahafoy tena?

⁵ Mety fa nanohitsy anao vasa ty fianakavianao. Na mety niala tamy asanao iha ndre be karama aza mba hanaova voaloha lista ty Fanjakà-Ndranahary. (Mat. 6:33) Laha zay ie, le afaky matoky iha fa hitan’i Jehovah ty raha iaby nataonao ho azy. (Heb. 6:10) Mety fa nitsapanao vasa hoe tena marina raha nivolanin’i Jesosy toy: “Tsy misy olo fa nahafoy trano, na rahalahy, na anabavy, na reny, na baba, na anaky, na tanimboly, ka zaho noho ty vaovao soa ro antony nanaovany ani-zay, ka tsy hahazo in-100 mandilatsy ani-reo amy andro henanizao, le trano, rahalahy, anabavy, reny, anaky, tanimboly, noho fanenjeha, voho fiaina mandrakizay amy tontolo ho avy iny.” (Mar. 10:29, 30) Hita baka amy zay fa ho be mandilatsy ty raha nafoinao ty fitahia ho azonao.​—Sal. 37:4.

6. Manino iha ro mbo mila manohitsy ty “fanirian’ny nofotsy” avao ndre fa vita batisa?

⁶ Mbo mila manohitsy “ty fanirian’ny nofotsy” avao iha ndre fa vita batisa. (1 Jaona 2:16) Fa manino? Satria mbo tsy lavorary iha. Mety hahatsapa ty raha nitsapan’ny apostoly Paoly iha kindraiky. Hoy ty asany: “Laha ty tsapako am-poko ato, le tena teako ty lalàna-Ndranahary. Fe misy lalàna hafa mialy amy lalàna mifehy ty saiko amy vatako ao, sady mitariky ahy ho andevon’ny lalànan’ny ota amy vatako ao.” (Rom. 7:22, 23) Mety ho kivy iha satria mialy mafy mba tsy hieritseritsy raha raty. Fe laha vetsevetsenao ty raha nampitamaninao an’i Jehovah tamy iha nanokam-bata ho azy, le hahazo hery iha ka vomaiky ho tapa-kevitsy hialy mba tsy ho resin’ny fakam-panahy. Hanampy anao voady nataonao io lafa iha miatriky fakam-panahy. Amy fomba akory?

7. Manino ty fanokanam-bata ho an’i Jehovah ro hanampy anao tsy hivaliky?

⁷ Lafa iha manokam-bata ho an’i Jehovah, le tsy ty sitraponao sasy ro vatan-draha aminao. Midika zay fa mifily tsy hanao ze teateanao avao iha sady tsy hanao raha halan’i Jehovah. (Mat. 16:24) Ka lafa iha miatriky fakam-panahy na miatriky raha tena sarotsy, le tsy mbo hieritseritsy ela eo iha satria fa hainao ty tokony hatao. Fa nidinihinao mialoha ty raha hataonao mba hahavy anao tsy hivaliky amy Jehovah avao. Ho tapa-kevitsy hanao raha mahafalifaly an’i Jehovah iha. Hanahaky an’i Joba iha laha manao ani-zay. Ndre niatriky raha tena sarotsy ie le mbo tapa-kevitsy tsy hivaliky. Hoy ty asany: “Tsy haneky hivaliky mihintsy aho!”​—Joba 27:5.

8. Manino ty fametsivetsea ty vavaky nataonao tamy iha nanokam-bata ro manampy anao hanohitsy fakam-panahy?

⁸ Hahavita hanohitsy fakam-panahy iha laha mametsivetsy ty vavaky nataonao tamy iha nanokam-bata ho an’i Jehovah. Nampitamà azy iha tamy zay fa hanao ty sitrapony. Iha va zao, ohatsy, le hihaminkamy valin’olo? Azo antoky fa tsy hanao ani-zay iha! Fa nampitamà an’i Jehovah iha fa tsy hanao raha manahaky ani-zay mihintsy. Laha tsy enganao hitombo anatinao ao ty eritseri-draty, le tsy ho sarotsy aminao ty hangalaky an’ny raha rey afara atoy. Tsy hanaraky ty “lalan’ny raty fanahy” iha amy zay.​—Ohab. 4:14, 15.

9. Manino koa ty fametsivetsea ty vavaky nataonao tamy iha nanokam-bata ro manampy anao hanao voaloha lista avao ty fanompoa an’i Jehovah?

⁹ Manao akory laha misy olo manome asa anao, kanefa hahavy anao hanapatapaky fivoria asa io? Fa hainao ty tokony hatao. Mbo tsy nanome anao an’ny asa io olo iny, le fa nanapa-kevitsy iha fa tsy hanao asa hahavy anao tsy hivory. Tsy halaim-panahy haneky ty asa manahaky ani-zay zany iha, kanefa bakeo mbo hila fomba hanaova voaloha lista ty sitrapon’i Jehovah. Afaky hanampy anao ty fametsivetsea ty modelin’i Jesosy. Tapa-kevitsy hanao ze raha tean’ny Babany avao ie. Manahaky an’i Jesosy, le miezaha handà noho hanalavitsy ze raha hainao fa tsy tea-Ndranahary, satria fa nanokam-bata ho azy iha.​—Mat. 4:10; Jaona 8:29.

10. Akory ty hanampean’i Jehovah anao mba ‘hanara-dia an’i Jesosy avao’ afaran’ny batisanao?

¹⁰ Manao akory laha miatriky raha sarotsy iha na miatriky fakam-panahy? Ho hita amy ty raha ataonao fa tena ta ‘hanara-dia an’i Jesosy avao’ iha. Afaky matoky iha fa hanampy anao Jehovah ka ho vitanao ty hanara-dia an’i Jesosy avao. Mivola ty Baiboly hoe: “Tsy misy fakam-panahy mahazo anareo, laha tsy ze fa mpahazo ty olo avao. Fe tsy mivaliky amy ty safàny Ndranahary, ka tsy hanenga anareo halaim-panahy mandilatsy ze zakanareo. Fa lafa misy fakam-panahy le hasiany lala hiboaha koa, mba hahazakanareo azy.”​—1 Kor. 10:13.

INO TY AZONAO ATAO MBA HAHAVY ANAO HANARA-DIA AN’I JESOSY AVAO?

11. Ino ro anisan’ny fomba tena soa hahavy antsika hanara-dia an’i Jesosy avao? (Henteo koa sary io.)

¹¹ Nanompo an’i Jehovah tamy fony iaby Jesosy sady nifandramby marìny taminy avao tamy alalan’ny vavaky. (Lioka 6:12) Ka ino ty hanampy anao hanara-dia an’i Jesosy avao lafa iha vita batisa? Soa laha miezaky manao ze raha hanampy anao hifandramby soa amy Jehovah avao iha. Zay ro anisan’ny fomba tena soa hanampy anao. Ho zao ty volanin’ny Baiboly: “Fa misy fandrosoa vitantsika, ka ndao tsika hiezaky handroso manahaky ani-zay avao.” (Fil. 3:16) Kindraiky iha, haharè tantaran’ny rahalahy noho anabavy nanapa-kevitsy hampitombo ty fanompoany. Mety nanatriky ty Sekolin’ny Mpitory Fanjakà iny vasa rozy na nifindra amy faritany mila mpitory maro. Azonao atao koa ty manao manahaky ani-zay laha manenga anao ty raha iainanao. Mila fomba maro ty vahoakin’i Jehovah mba hampitomboa ty fanompoan-drozy. (Asa. 16:9) Fe manao akory laha mbo tsy afaky manao ani-zay iha amy zao? Ka mieritseritsy hoe tsy misy dikany iha laha ampitovizy amy azy afaky mampitombo ty fanompoany rey. Ty tena vatan-draha le hoe miaritsy avao iha. (Mat. 10:22) Ka mieritseritsy koa hoe tsy misy dikany ty fanompoanao an’i Jehovah satria tsy mana fahafaha iha na tsy manenga anao ty raha iainanao. Zay ty raha bevata azonao atao laha teanao ty hanara-dia an’i Jesosy avao afaran’ny batisanao.​—Sal. 26:1.

12-13. Ino ty azonao atao laha manomboky mihena ty zotom-ponao amy fanompoa an’i Jehovah? (1 Korintianina 9:16, 17) (Henteo koa ty efajoro hoe “Tohizo Avao Korsa Iny.”)

¹² Manao akory laha mahatsapa iha kindraiky hoe tsy vokatsin’ny fo ty vavaky ataonao, na tsy falifaly manahaky ty taloha iha lafa manompo? Manao akory laha tsy mazoto mamaky Baiboly manahaky ty taloha iha? Laha mahatsapa raha manahaky ani-zay iha afaran’ny batisanao, le ka avy le mieritseritsy hoe niala taminao ty fanahin’i Jehovah. Tsy lavorary iha ka mety hiovaova ty fihetseham-ponao. Laha manomboky mihena ty zotom-ponao, le vetsevetseo ty ohatsin’ny apostoly Paoly. Niezaky mafy ie mba hanahaky an’i Jesosy. Fe ndre zay, le nahatsapa ie fa nisy fotoa ie tsy de tena nazoto hanao ze raha tokony hataony. (Vakio 1 Korintianina 9:16, 17.) Hoy ty asany: “Ndre tsy an-tsitrapo aza ty anaovako ani-zay, le mbo mana asa nampiandraikety ahy avao aho.” Laha atao amy safà hafa zany, tapa-kevitsy hanao soa ty fanompoany avao Paoly ndre teo aza ty raha nitsapany tamy fotoa zay.

¹³ Manahaky an’i Paoly, le ka engà hisy vokany amy fanapahan-kevitsy ataonao ty fihetseham-ponao. Miezaha ho tapa-kevitsy hanao raha soa avao ndre tsy tena ta hanao ani-zay aza iha. Laha miezaky manao raha soa avao iha, le mety hiova ty fihetseham-ponao lafa mandeha ty fotoa. Fe zisiky hiaviani-zay, le soa laha miezaky manao fianara am-bata tsy tampaky iha, mivavaky, mivory, noho mitory, satria hanampy anao raha zay. Lafa hitan’ny rahalahy noho anabavinao reo hoe miaritsy avao iha amy fanompoa an’i Jehovah, le hampahery an-drozy raha zay.​—1 Tes. 5:11.

‘MIEZAHA AVAO HANDINI-TENA NOHO HAHAY SOA TY VATANAO’

14. Ino ty tokony hodinihinao matetiky, le ino ty antony? (2 Korintianina 13:5)

¹⁴ Tena soa laha mandini-tena matetiky iha afaran’ny batisanao satria hanampy anao raha zay. (Vakio 2 Korintianina 13:5.) Diniho soa kindraiky ty fiainanao noho ty fahazaranao mba hahitanao laha mivavaky sanandro iha, mamaky noho mianatsy Baiboly, mivory, noho mandramby anjara amy fanompoa. Anovo ze hahavy anao hazoto noho handramby soa baka amy raha reo. Retoa, ohatsy, misy fanontanea azonao dinihy: ‘Haiko va ty manazava amin’olo hafa ty fampianara fototsy amy Baiboly ao? Misy raha azoko atao va mba hahavy ty fanompoako ho soasoa? Tena voafaritsy soa va ty vavaky ataoko, le hita amy raha rey va fa tena miantehitsy tanteraky amy Jehovah aho? Mivory tsy tampaky va aho? Ino ty azoko atao mba hahavy ahy hifantoky soa noho handramby anjara lafa am-pivoria any?’

15-16. Ino ty ianaranao baka amy ty raha niainan’ny rahalahy raiky io mikasiky fanohera fakam-panahy?

¹⁵ Tena mila dinihinao soa koa hoe ino ty handranao. Hanampy antsika hahatakatsy ani-zay ty raha nivolanin’ny rahalahy Robert. Niresaky ty raha niainany ie le zao ty nivolaniny: “Nana asa tapa-potoa zay aho tamy zaho 20 tao. Ndraiky andro, lafa nirava niasa zahay le nanasa ahy ho an-tranony any ampela mpiaraky miasa aminay zay. Nivola ie fa zahay roe avao ty ho ao sady ‘hanalanala azy’ zahay. Nandandà kely tse aho tamy voalohany, fe nandà tanteraky aho tamy farany sady nihazavaniko aminy ty antony.” Nanohitsy fakam-panahy Robert, ka tena soa raha nataony zay. Fe nandiniky soa an’ny raha niseho iny ie lafa tafara atoy, le nieky ie fa nisy fomba soa kokoa tokony ho nataony mba handamina an’ny raha iny. Hoy ty asany: “Tsy avy le nandà na nanohitsy manahaky ty nataon’i Josefa tamy valin’i Potifara iny aho, lafa nasàny. (Gen. 39:7-9) Nitseriky amy zay aho lafa nimafy tamiko ty handà an’ny raha iny. Nanampy ahy raha niseho io mba hahita fa nila nanatanjaky ty finamako amy Jehovah aho.”

¹⁶ Mety hahasoa anao laha mandini-tena manahaky ty nataon’i Robert iha. Ndre nahavita nanohitsy fakam-panahy aza iha, le eritsereto zao: ‘Firy lera na firy andro vo nivitako ty nandà an’ny raha iny?’ Laha hitanao hoe misy raha mbo mila hasoavy, le ka manamelo-tena. Tokony ho falifaly aza iha satria hitanao fahalemeanao io. Mivavaha amy Jehovah mikasiky an’ny fahalemeanao io, le anovo ze raha hanampy anao ho tapa-kevitsy hanoriky ty fitsipikiny.​—Sal. 139:23, 24.

17. Ino ty vokatsin’ny raha nataon’i Robert iny amy ty anaran’i Jehovah?

¹⁷ Misy raha hafa koa ianarantsika baka amy raha niseho tamy Robert iny. Hoy ty asany: “Lafa tsy naneky an’ny fanasan’ny ampela iny aho, le nivola ie hoe: ‘Testako anao avao iny!’ Ino, hoasako, ty teanao hovolany. Nanazava ie fa nivola taminy namany raiky zay fa manao raha raty mbambalimbaliky any ty tanora Vavolombelon’i Jehovah lafa mahita hiriky hanaova ani-zay. Vavolombelon’i Jehovah moa namany io taloha. Farany nivola tamy namany io ie fa teany ho hita laha manahaky ani-zay koa aho. Tena nifalifaly aho tamy zay satria nanome voninahitsy ty anaran’i Jehovah.”

18. Tapa-kevitsy hanao ino iha afaran’ny batisanao? (Henteo koa ty efajoro hoe “Lahatsoratsy Roe Tena ho Teanao.”)

¹⁸ Laha manokam-bata ho an’i Jehovah noho atao batisa iha, le asehonao fa ta hanamasy ty anarany iha, ndre ino ino hiseho. Sady tena afaky matoky iha fa hain’i Jehovah ty raha sarotsy atrehinao noho ty fakam-panahy toherinao. Hotahiny ty ezaky ataonao mba hahavy anao tsy hivaliky aminy avao. Matokisa fa ho vitanao ty hanao ani-zay satria hameany hery iha amy alalan’ny fanahiny masy. (Lioka 11:11-13) Hanampy anao Jehovah ka ho vitanao ty hanara-dia an’i Jesosy avao, afaran’ny batisanao.