Andrambesantsika Fianara Bevata Mpanjaka tamy Israely teo Rey

1-2. Ino ty raha resahin’ny Baiboly mikasiky ty mpanjaka sisany tamy Israely teo?

MISY lahilahy 40 mahery eo ho eo resahin’ny Baiboly hoe nanjaka tamy Israely teo.a Atorony antsika mihintsy aza ty raha nataon’ny sisany amin-drozy. Resahiny, ohatsy, fa ndre ty mpanjaka soa aza nanao raha raty sisany. Eritsereto Davida Mpanjaka. Mpanjaka soa ie. Nivola Jehovah hoe: ‘Nanaraky ahy tamy fony iaby Davida mpanompoko, ka tsy nanao laha tsy raha soa avao tamasoko teo.’ (1 Mpanj. 14:8) Fe nijangajanga tamy valin’olo ie, bakeo nanao tetiky mba ho maty an’aly any valin’ampela io.​—2 Sam. 11:4, 14, 15.

² Mivola mikasiky mpanjaka nivaliky tamy Jehovah rey koa ty Baiboly. Resahiny fa nisy raha soa avao nataon-drozy. Eritsereto, ohatsy, Rehoboama. Nivola Jehovah hoe “nanao raty” ie. (2 Tan. 12:14) Fe nisy fotoa ie nanao raha soa. Nankatò an’i Jehovah, ohatsy, ie lafa nivolaniny mba tsy hialy amy foko folon’ny Israely noho hanenga an-drozy hana mpanjaka hafa. Nanao raha koa ie mba hanasoava ty vahoakiny, ka nihamafisiny ty ankamaroan’ny tanà tamy fanjakàny teo mba tsy ho azon’ny fahavalo.​—1 Mpanj. 12:21-24; 2 Tan. 11:5-12.

3. Ino ty fanontanea mila haintsika ty valiny, le ino ty hodinihintsika amy lahatsoratsy toy ato?

³ Misy fanontanea toy, le soa ty ahaizantsika ty valiny. Laha misy mpanjakan’ny Israely nanao raha soa noho raty, ino ty dinihin’i Jehovah mba hamaritany hoe tsy mivaliky ie na mivaliky? Soa ho hay ty valin’ny fanontanea zay satria hanampy antsika hahay hoe ino ty raha takin’i Jehovah amintsika. Handiniky raha telo dinihin’i Jehovah tsika ka manampy azy hahita hoe soa va ty mpanjaka raiky sa raty. Voalohany, tea an’i Jehovah amy ty fony iaby va ie. Faharoe, tena nibebaky va ie lafa nanao raha raty. Le fahatelo, nanohy nanompo an’i Jehovah tamy fomba itiavany azy va ie.

NANOMPO AN’I JEHOVAH TAMY FONY IABY ROZY

4. Ino ty raha raiky tsy nampitovy ty mpanjaka tsy nivaliky noho mpanjaka nivaliky rey?

⁴ Nanompo an’i Jehovah tamy fony iaby ty mpanjaka raiky kanao nanao raha nampifaly an’i Jehovah.b Mpanjaka soa Josafata, le “nila an’i Jehovah tamy fony iaby” ie. (2 Tan. 22:9) Hoy koa ty Baiboly mikasiky an’i Josia: “Tsy nisy mpanjaka nanahaky azy ty talohany, ka hoe nimpoly tamy Jehovah tamy ty fony iaby.” (2 Mpanj. 23:25) Ka manao akory Solomona, azy nanao raty lafa tafara atoy iny? ‘Tsy nivahatsy tanteraky tamy Jehovah ty fony.’ (1 Mpanj. 11:4) Ho zao koa ty resahin’ny Baiboly mikasiky an’i Abiama, mpanjaka nivaliky tamy Jehovah: ‘Tsy nivahatsy tanteraky tamy Jehovah ty fony.’​—1 Mpanj. 15:3.

5. Ino ty dikan’ny hoe manompo an’i Jehovah amy fo iaby? Hazavao.

⁵ Ino tse moa ty dikan’ny hoe manompo an’i Jehovah amy fo iaby? Ty olo manompo an’i Jehovah amy fony iaby, le tsy hoe manompo azy avao satria hainy hoe tokony hanao ani-zay ie. Manompo an’i Jehovah ie satria tena tea noho manaja azy. Manao ani-zay avao ie amy androm-piainany.

6. Ino ty hanampy antsika ho tea an’i Jehovah amy ty fontsika iaby avao? (Ohabolana 4:23; Matio 5:29, 30)

⁶ Akory ty azontsika anahafa an’ny mpanjaka nitea an’i Jehovah tamy fony iaby rey? Tsy maintsy manalavitsy ze raha mety hitariky antsika hivaliky amy Jehovah tsika. Mila mitandrina amy ty raha ataontsika na henteantsika, ohatsy, tsika lafa manao fialam-boly. Mila mitandrina koa tsika amy ty olo inamantsika, satria mety ho voatariky tsika ka hieritseritsy hoe ty drala noho ty hanana ro tena vatan-draha. Laha hitantsika hoe misy raha manomboky mampihena ty fitiavantsika an’i Jehovah, le mila manao raha malaky tsika mba hialà na hangalà an’ny raha iny.​—Vakio Ohabolana 4:23; Matio 5:29, 30.

7. Manino tsika ro tena mila manalavitsy ze raha mety hampihena ty fitiavantsika an’i Jehovah?

⁷ Tsy tokony hengantsika ho voazarazara ty fontsika. Laha tsy mitandrina tsika, le mety hieritseritsy hoe tsy ho voatariky hanao raha raty tsika satria be atao amy fanompoa an’i Jehovah. Toy misy ohatsy. Eritsereto hoe mafana biby ty andro. Ka mba hahavy anao hanintsinintsy avao, le mety minon-drano maro iha. Fe ino ty ho vokany laha mijajiriky amy hafanà eo avao iha maray zisiky hariva fa tsy mila alokaloky? Mety harandrano ndraiky iha. Ino ty teantsika hiavia? Marina hoe soa ty manao ze raha hahavy antsika hifandramby soa amy Jehovah. Fe tsy ampy zay. Mila miaro ty vatantsika amy ze raha mety hampihena ty fitiavantsika an’i Jehovah tsika, manahaky antsika tsy mijano ela biby amy hafanà eo io avao.​—Efes. 2:2.

NIBEBAKY ROZY LAFA NANOTA

8-9. Nanao akory Davida Mpanjaka noho Hezekia Mpanjaka lafa nanary? (Henteo amy fonon’ny gazety toy.)

⁸ Niresahintsika taloha eroy hoe nanao fahotà bevata Davida Mpanjaka. Fe lafa nivola taminy Natana mpaminany hoe nampeloky an’i Jehovah raha nataony iny, le niambany ie ka nibebaky. (2 Sam. 12:13) Tsy hoe nanao kisary nibebaky Davida amy zay hieky Natana hoe nibebaky vatany ie, na nanao ani-zay ie mba tsy ho voasazy. Hita amy raha nisoratiny amy Salamo faha-​51 ao rey fa tena nibebaky ie.​—Sal. 51:3, 4, 17, safà mampilitsy azy.

⁹ Nanota tamy Jehovah koa Hezekia Mpanjaka. Hoy ty Baiboly: “Lasa nirengirengy ty fony. Le nimeloky azy noho tamy Joda voho Jerosalema Ndranahary.” (2 Tan. 32:25) Nanino Hezekia ro lasa nirengirengy? Mety nieritseritsy ie hoe tsy misy mitovy aminy satria nataon’i Jehovah panarivo ie, nampeany handresy ty Asyrianina, na nafahiny arety ho nahafaty azy iny. Hita hoe nirengirengy vatany ie satria nasehony an’ny Babylonianina rey ze raha iaby nananany. Nivola taminy amy zay Isaia mpaminany hoe neloky azy Jehovah. (2 Mpanj. 20:12-18) Fe niambany nanahaky an’i Davida Hezekia ka nibebaky. (2 Tan. 32:26) Ka nanao akory ty fahitan’i Jehovah azy? Mpanjaka tsy nivaliky hoasany Hezekia satria ‘nanao raha soa avao.’​—2 Mpanj. 18:3.

10. Nanao akory Amazia Mpanjaka lafa nanary?

¹⁰ Tsy nanahaky an’i Davida noho Hezekia, Amazia Mpanjakan’i Joda. Nanao raha soa avao ie “fe tsy tamy fony iaby.” (2 Tan. 25:2) Fa ino ty raha raty nataony? Nisy fotoa Amazia nialy tamy Edomita, le nampean’i Jehovah ie ka nandresy. Lasa nivavaky tamy ndranaharin’ny Edomita rey amy zay ie tafarani-zay.c Nisy mpaminanin’i Jehovah amy zay nananatsy azy. Fe tsy nijanjy mihintsy ie ka niroasiny mpaminany iny.​—2 Tan. 25:14-16.

11. Laha hentea ty 2 Korintianina 7:9, 11, tsy maintsy manao ino tsika laha teantsika hanenga ty hadisoantsika Jehovah? (Henteo koa sary reo.)

¹¹ Ino ty ianarantsika baka amy ohatsy reo? Mila mibebaky tsika lafa manota sady mila manao ze fara herintsika mba tsy hampimpoly an’ny raha iny sasy. Manao akory laha mahazo torohevitsy baka amy anti-panahy tsika, ndre amy raha heverintsika ho maliniky aza? Tsy tokony hahatsapa tsika hoe tsy tea antsika Jehovah na malay antsika ty anti-panahy. (Heb. 12:6) Lafa anary tsika, le tokony 1) miambany, 2) manova ze tokony hovà, noho 3) miezaky manompo an’i Jehovah amy fontsika iaby avao. Laha mibebaky amy ty fahotantsika tsika, le hanenga ty hadisoantsika Jehovah.​—Vakio 2 Korintianina 7:9, 11.

NANOMPO AN’I JEHOVAH TAMY FOMBA ITIAVANY AZY AVAO ROZY

12. Ino ty tena nampiavaky ty mpanjaka tsy nivaliky?

¹² Ze mpanjaka nanompo an’i Jehovah tamy fomba itiavany azy avao ro natao hoe tsy nivaliky. Tsy zay avao fa nampirisiky ty vahoakin’i Jehovah hanao manahaky ani-zay koa rozy. Nanao hadisoa avao aloha rozy, araky ty fa nihitantsika teo. Fe nanompo an’i Jehovah raiky avao rozy sady niezaky mafy nandrava ty sampy tamy tanin-drozy teo.d

13. Manino Jehovah ro nivola hoe mpanjaka nivaliky Ahaba?

¹³ Misy mpanjaka nivolanin’i Jehovah hoe nivaliky. Fa manino? Tsy hoe raty iaby ze raha nataon-drozy. Ndre Ahaba mpanjaka raty fanahy aza niambany sady naneny lafa nireny hoe nivonoa Nabota, vokatsin’ny raha nataony. (1 Mpanj. 21:27-29) Nanory tanà maromaro koa ie sady nanampy ty Israely handresy ty fahavalon-drozy. (1 Mpanj. 20:21, 29; 22:39) Fe nisy raha farani-ze raty nataon’i Ahaba. Lasa nivavaky tamy ndranahary diso ie satria nitaomin’ny valiny, sady tena nafana fo tamy raha zay. Hita baka amy zay hoe tsy nibebaky mihintsy ie.​—1 Mpanj. 21:25, 26.

14. a) Manino Jehovah ro nivola hoe mpanjaka raty Rehoboama? b) Ino ty raha nitovizan’ny ankamaroan’ny mpanjaka nivaliky rey?

¹⁴ Diniho koa Rehoboama, mpanjaka nivaliky tamy Jehovah. Fa niresahintsika taloha eroy hoe maro ty raha soa nataony, tamy ie nanjaka. Fe lafa nilasa mpanjaka mahery ie, le tsy nanoriky ty Lalànan’i Jehovah sasy sady nanomboky nivavaky tamy ndranahary diso. (2 Tan. 12:1) Tafarani-zay, misy fotoa ie nivavaky tamy Jehovah le misy fotoa nivavaky tamy ndranahary diso. (1 Mpanj. 14:21-24) Tsy Rehoboama noho Ahaba avao ro mpanjaka tsy nanompo an’i Jehovah tamy fomba itiavany azy. Maro biby ty mpanjaka nivaliky tamy Jehovah sady nivavaky tamy ndranahary diso. Tsy zay avao fa mbo nitao olo hanao manahaky ani-zay koa rozy. Hita baka amy zay fa anisan’ny raha bevata dinihin’i Jehovah ty hoe nanompo azy tamy fomba itiavany azy va ty mpanjaka raiky. Zay amy zay ie vo manatsoaky hevitsy hoe mpanjaka soa olo iny na raty.

15. Manino ro vatan-draha amy Jehovah ty hoe manompo azy araky ty itiavany azy?

¹⁵ Manino ro vatan-draha amy Jehovah ty hoe manompo azy araky ty fomba itiavany azy? Vatan-draha aminy raha zay satria ty mpanjaka ro nitendreny hitariky ty vahoakiny mba hanaraky ty fivavaha marina. Lafa nivavaky tamy ndranahary diso koa ty vahoaky, le lasa nanao raha farani-ze raty sady nampijalijaly ty olo hafa. (Hosea 4:1, 2) Ankoatsini-zay, firenena voatoka ho an’i Jehovah ty Israelita, le manahaky ani-zay koa ty mpanjakan-drozy. Rariny zany laha mivola ty Baiboly hoe sahala nijangajanga rozy lafa nivavaky tamy ndranahary diso. (Jer. 3:8, 9) Laha misy olo mijangajanga, le manota amy valiny ie. Tena raty raha zay satria tsy tokony hivaliky aminy mihintsy ie. Manahaky ani-zay koa lafa misy mpanompon’i Jehovah fa nanokam-bata ho azy manao raha misy ifandrambesany amy fivavahan-diso. Manota amy Jehovah ie sady manao raha mampalahelo ty fony.e​—Deot. 4:23, 24.

16. Ino ty tsy mampitovy ty olo marina noho ty raty fanahy amy Jehovah?

¹⁶ Ino ty fianara ho antsika? Tsy tokony hanao raha mifandramby amy fivavahan-diso mihintsy tsika. Fe tokony hanompo an’ i Jehovah araky ty fomba itiavany azy avao koa tsika sady hiezaky ho be atao avao amy fanompoa azy. Niresahin’i Malakia mpaminany mazava soa hoe ino ty tsy mampitovy ty olo manao raha soa noho manao raha raty. Hoy ty asany: “Ho hitanareo ndraiky fa tsy mitovy ty olo marina noho ty raty fanahy, voho ty manompo a-Ndranahary noho ty tsy manompo azy.” (Mal. 3:18) Teantsika laha olo marina ty fahitan’i Jehovah antsika. Tsy tokony hisy raha hengantsika hanaka antsika tsy hanompo an’i Jehovah sasy zany, ndre ty tsy fahalavorariantsika noho ty fahadisoantsika aza. Manao fahotà bevata tsika laha mijano tsy manompo an’i Jehovah sasy.

17. Manino tsika ro tsy maintsy mitandrina lafa hifily valy?

¹⁷ Mpitovo va iha ka mieritseritsy hanambaly? Tsy hitanao va hoe afaky manampy anao hifily ty olo ho valinao raha nivolanin’i Malakia io? Fe manao akory laha tsy manompo an’ny Ndranahary marina iny olo io, olo marina va ty fahitan’i Jehovah azy? (2 Kor. 6:14) Laha manambaly an’olo io iha, hanampy anao tsy hivaliky amy Jehovah avao va ie? Diniho zao: Nanambaly ampela mpanompo sampy Solomona Mpanjaka, le mety nana toetsy soa avao ampela rey. Fe tsy nanompo an’i Jehovah rozy. Farany, nivoataon-drozy tsikelikely hivavaky amy ndranahary diso Solomona.​—1 Mpanj. 11:1, 4.

18. Ino ty tokony hampianarin’ny ray aman-dreny ty anany?

¹⁸ Nareo ray aman-dreny, afaky ampiasanareo tantaran’ny mpanjaka amy Baiboly ao rey mba hanampea ty ananareo ho tea manompo an’i Jehovah. Ampeo rozy mba hahay hoe lafa nanompo an’i Jehovah noho nampirisiky ty vahoaky hanompo azy avao ty mpanjaka raiky vo nankasitrahany. Ampianaro rozy ka asehò amy ty raha ataonao noho volaninao fa ze raha manampy anao hifandramby soa amy Jehovah avao ro tena vatan-draha amy fiaina. Ohatsy hoe mianatsy ty Baiboly, mivory, noho mitory. (Mat. 6:33) Mety hana ty hevitsiny manoka ty ananao. Mety hieritseritsy ie hoe “fivavaham-pianakavia” avao ty hoe Vavolombelon’i Jehovah. Vokany, mety hataon-drozy amy pilasy faharoe ty fanompoa an’i Jehovah na mety tsy hanompo azy sasy rozy.

19. Mbo afaky mimpoly amy Jehovah va ty olo nijano tsy nanompo azy sasy? (Henteo koa ty efajoro hoe “Afaky Mimpoly amy Jehovah Iha!”)

¹⁹ Manao akory laha misy olo nijano tsy nanompo an’i Jehovah sasy? Midika va zay hoe tsy afaky mimpoly amy Jehovah ie? Aha. Afaky mibebaky ie le manompo an’i Jehovah ndraiky. Mila miambany ie laha ta hahavita ani-zay sady maneky ty fanampean’ny anti-panahy. (Jak. 5:14) Mila manao ze fara heriny ie mba hahavy azy hinama amy Jehovah ndraiky!

20. Hanao akory ty ho fahitan’i Jehovah antsika laha manahaky an’ny mpanjaka tsy nivaliky rey tsika?

²⁰ Ino ty nianarantsika baka amy mpanjakan’ny Israely rey? Afaky hanahaky an’ny mpanjaka tsy nivaliky rey tsika laha manompo an’i Jehovah amy fontsika iaby avao. Mila mandramby fianara baka amy ty fahadisoantsika tsika, mibebaky, le bakeo manova ze tokony hovà. Le enga anè ho tiarovintsika avao fa tena vatan-draha ty hoe manompo an’ny Ndranahary marina iny, amy fomba itiavany azy. Laha tsy mivaliky amy Jehovah avao iha, le ho olo manao raha soa avao ty ho fahitany anao.