Ino ty Hanampy Anao Tsy Hisalasala?

1-2. a) Ino ty raha sisany mety hampisalasala ty mpanompon’i Jehovah? b) Ino ty hodinihintsika ato?

FA NISY fotoa va iha nisalasalaa? Mety hahazo antsika iaby raha zay. Mety hisalasala, ohatsy, ty tanora raiky hoe mba midary azy va Jehovah. Mety misalasala amy zay ie laha tokony hatao batisa. Na eritsereto hoe misy rahalahy raiky nanapa-kevitsy hoe hanao voaloha lista ty fanompoa an’i Jehovah tamin’ie mbo nitanora, fa tsy nifily hanao asa be karama. Fa be ie henanizao le tsy manan-drala laha tsy drala amelomany ty fianakaviany avao. Mety misalasala amy zay ie laha nety avao fanapahan-kevitsy nataony taloha tany iny. Diniho koa hoe misy ranabavy raiky be tao fa mihareraky. Mety kivy ie satria fa tsy mahavita raha manahaky ty taloha. Ka iha? Fa nisy fotoa koa va iha nieritseritsy hoe: ‘Mba hitan’i Jehovah avao va aho? Tsy nisera avao va raha iaby nataoko ho an’i Jehovah rey? Mbo azon’i Jehovah ampiasà avao va aho?’

² Mety hisy vokany amy fanompoantsika an’i Jehovah ty fanontanea manahaky ani-reo, laha engantsika an-tsaintsika ao avao fa tsy miezaky tsika mba hila ty valiny. Hodinihintsika ato hoe manino ty fandiniha ty torolalan’ny Baiboly ro afaky manampy antsika laha misalasala tsika hoe 1) mba midary antsika avao va Jehovah, 2) nety va ty fanapahan-kevitsy nataontsika taloha tany, na 3) mbo azon’i Jehovah ampiasà avao va tsika?

INO TY AZONAO ATAO LAHA MISALASALA IHA?

3. Ino ty azontsika atao laha misy raha mampisalasala antsika?

³ Lafa misy raha mampisalasala antsika, le soa tsika laha mikaroky ty valin’ny raha iny amy Baiboly ao. Laha manao ani-zay tsika, le hihamatanjaky ty finoantsika an’i Jehovah sady vomaiky tsika hinama aminy. Lasa ‘hiory soa amy finoa’ koa tsika.​—1 Kor. 16:13.

4. Ino ty tokony hataontsika mba ‘hanamarìna soa ty raha iaby’? (1 Tesalonianina 5:21)

⁴ Vakio ty 1 Tesalonianina 5:21. Mampirisiky antsika ty Baiboly mba ‘hanamarina soa ty raha iaby.’ Akory ty hanaovantsika ani-zay? Mila ampitahantsika amy ty raha volanin’ny Baiboly ty raha inoantsika, amy zay ho azontsika antoky hoe marina raha iny. Mba diniho tse moa tanora niresahintsika taloha eroy iny. Nisalasala ie hoe tena midary azy vatany va Jehovah. Tokony hengany amy zao avao va raha zay? Aha. Tokony ‘hohamarininy soa iaby ty raha iaby’ ka hiezaky hianatsy Baiboly ie amy zay ho hainy hoe manao akory marina ty fahitan’i Jehovah azy.

5. Mila manao ino tsika laha ta hahita ty amalean’i Jehovah ty fanontaneantsika?

⁵ Sahala miresaky amintsika Jehovah lafa tsika mamaky Baiboly. Fe tsy ampy avao ty hoe mamaky Baiboly laha teantsika ty hahita ty amalean’i Jehovah ty fanontaneantsika. Mila manao fikaroha noho mianatsy ze andinin-teny hanampy antsika hahita ty valin’ny fanontaneantsika iny tsika. Afaky manao fikaroha amy boky noho gazetintsika rey tsika. (Ohab. 2:3-6) Mila mivavaky amy Jehovah tsika le mangataky azy mba hanampy antsika hahita ty valin’ny fanontaneantsika iny. Bakeo afaky mila torolalan’ny Baiboly noho fanazavà mifanaraky amy raha ilàntsika iny tsika. Mety handramby soa koa tsika laha mamaky tantaran’olo amy Baiboly ao, fa niatriky raha mitovy amy azy atrehintsika iny.

6. Manino ty fivoria ro manampy antsika handresy ty raha mampisalasala antsika?

⁶ Sahala miresaky amintsika koa Jehovah lafa tsika mianatsy Baiboly am-pivoria any. Laha mivory tsy tampaky tsika, le mety haharè fanazavà baka amy lahateny na valin-teny manampy antsika handresy an’ny raha mampisalasala antsika iny mihintsy. (Ohab. 27:17) Ndao hodinihintsika henanizao hoe akory ty atao laha tsika misalasala mikasiky an’ny raha manaraky retoa.

LAHA MISALASALA IHA HOE MBA MIDARY ANAO VA JEHOVAH

7. Ino ty fanontanea mety hoeritseretintsika?

⁷ Fa nisy fotoa va iha nieritseritsy hoe: ‘Mba hitan’i Jehovah avao va aho?’ Laha mahatsapa iha hoe tsy misy dikany, le mety ho sarotsy aminao ty hino hoe afaky ho namani-azy Mpamoro ty raha iaby iny iha. Fa nisy fotoa koa Davida Mpanjaka nieritseritsy raha manahaky ani-zay. Nitseriky ie fa hain’i Jehovah mihintsy ty olombelo, ka hoy ty asany: “Nao lahy Jehovah! Ino koa moa olombelo zao ro mahakinto anao, le ino anak’olombelo mety maty zao ro karakaranao?” (Sal. 144:3) Aia ty hahitanao ty valin’ny fanontanea io?

8. Laha hentea ty 1 Samoela 16:6, 7, 10-12, ino ty raha hentean’i Jehovah amintsika olombelo?

⁸ Mampianatsy antsika ty Baiboly fa ndre ty olo tsy misy mpidary aza hitan’i Jehovah. Nirahin’i Jehovah ho an-tranon’i Jese any, ohatsy, Samoela ndraiky zay, mba hanosotsy ty raiky amy anakilahiny rey ho mpanjaka amy Israely eo. Nikaihin’i Jese ho amy Samoela eo ty fito amy anakilahiny valo rey, fe tsy nikaihiny Davida, azy faralahiny iny.b Fe Davida ro nifilin’i Jehovah. (Vakio 1 Samoela 16:6, 7, 10-12.) Nihitan’i Jehovah ty tena maha izy an’i Davida. Hainy hoe tena tea azy ie ndre mbo mpamaraky aza.

9. Manino iha ro afaky matoky fa midary anao Jehovah? (Henteo koa sary io.)

⁹ Eritsereto ty raha fa nataon’i Jehovah mba hampisehoa hoe hitany iha. Manome tari-dala tena soa ie mba hanampea anao amy raha mahazo anao iny. (Sal. 32:8) Akory moa ty hanaovany ani-zay laha tsy hainy soa iha? (Sal. 139:1) Laha manoriky ty torohevitsin’i Jehovah iha ka hitanao hoe manampy anao raha iny, le vomaiky iha ho resy lahatsy hoe midary anao ie. (1 Tan. 28:9; Asa. 17:26, 27) Hitan’i Jehovah ty ezaky ataonao. Hitany ty toetsy soa anananao sady ta hinama aminao ie. (Jer. 17:10) Ho falifaly biby ie laha maniry ho lasa namany koa iha.​—1 Jaona 4:19.

LAHA MISALASALA IHA HOE MBA NETY AVAO VA TY FANAPAHAN-KEVITSY NATAONAO TALOHA TANY

10. Ino ty fanontanea mety ho avy an-tsaintsika ao lafa tsika mieritseritsy ty fanapahan-kevitsy nataontsika taloha tany?

¹⁰ Mety mieritseritsy ty fanapahan-kevitsy nataony taloha tany ty olo sisany ka lasa misalasala hoe mba nety avao va ty nataony. Mety nana asa be karama vasa rozy na nanao raharaham-barotsy ahazoa drala be, fe nanapa-kevitsy rozy hoe hiala amy raha iny, amy zay afaky manompo an’i Jehovah bebe kokoa. Nandeha amy zay ty tao, mety hoe fa am-polony tao afara atoy. Mety misy olo hain-drozy hoe tsy nanapa-kevitsy hiala tamy ty asany, le lasa manan-drala be olo rey sady atao raha metimety ty fiainany. Mety lasa say amy zay rozy hoe: ‘Mba nety avao va fanapahan-kevitsiko iny? Sa tokony ho niasa be aho amy zay ho nanan-drala amy zao?’

11. Ino ty raha nahakivy ty mpanoratsy ty Salamo faha-​73?

¹¹ Manahaky ani-zay koa va ty tsapanao? Laha zay ie, le diniho ty raha nitsapan’ny mpanoratsy ty Salamo faha-​73. Nihitany hoe nisalama soa ty olo tsy nanompo an’i Jehovah, nimpanarivo, sady atao raha tsy nana problemo fa nandeha soa ty fiainany. (Sal. 73:3-5, 12) Lafa nahita an’olo rey amy zay ie, le nikivy. Lasa nahatsapa ie hoe nisera avao ty ezaky nataony mba hanompoa an’i Jehovah. ‘Nahita problemo ie tontolo andro’ vokatsin’ny raha zay. (Sal. 73:13, 14) Ino ty nataony mba tsy ho resy?

12. Laha hentea ty Salamo 73:16-18, ino ty nataon’ny mpanao salamo iny mba handresea ty hakiviany?

¹² Vakio Salamo 73:16-18. Nandeha tamy pilasy masin’i Jehovah tany mpanao salamo iny. Afaky nandiniky soa ie lafa tany. Nihainy fa ndre atao raha nilamy aza ty fiainan’olo sisany, le tsy nana fanantenà mikasiky ty hoavy rozy. Lasa tsy nikivy sasy ie sady natoky hoe tena nety ty nataony satria nanompo an’i Jehovah. Vokany, vomaiky ie lasa nitapa-kevitsy hanompo an’i Jehovah avao.​—Sal. 73:23-28.

13. Ino ty azonao atao laha maneny iha tamy fanapahan-kevitsy nataonao taloha tany? (Henteo koa sary io.)

¹³ Afaky manampy anao hilamin-tsay manahaky an’ny mpanao salamo iny koa ty Safà-Ndranahary. Amy fomba akory? Mba somary diniho moa ty raha lafovily anananao, anisani-zay ty hoe mana hanana an-danitsy any iha. Diniho amy zay hoe mana raha manahaky ani-zay va olo tsy manompo an’i Jehovah rey. Mety hanao ze hampilamindamy ty fiainany rozy satria tsy mana fanantenà mikasiky ty hoavy. Fe tsy manahaky ani-zay iha. Tsy vitan’ny hoe fa maro ty raha soa anananao henanizao fa mbo mampitamà koa Jehovah fa hanome raha soa maro anao amy hoavy. (Sal. 145:16) Eritsereto koa zao: Tena ho nihainao va hoe ho nanao akory ty fiainanao laha nihafa ty fanapahan-kevitsy nataonao? Fe zao ty raha azo antoky: Laha ty fitiavanao a-Ndranahary noho ty olo hafa ro mandrisiky anao handramby fanapahan-kevitsy, le tozoro hana ze raha ilànao avao iha amy fiaina ka hahatiaro sambatsy.

LAHA MISALASALA IHA HOE MBO AZON’I JEHOVAH AMPIASÀ AVAO VA IHA

14. Ino ty raha mahazo ty mpanompon’i Jehovah sisany, le ino ty raha mety hoeritseretin-drozy?

¹⁴ Misy mpanompon’i Jehovah sisany mbo ta hanao raha maro amy fanompoa azy, fe fa tsy afaky satria fa miha antitsy, marary lava, na manan-kandra. Mety mahatsapa amy zay rozy hoe fa tsy misy viliny amy Jehovah. Mety mieritseritsy rozy hoe: ‘Aia koa va ty ilàn’i Jehovah ahy?’

15. Ino ty raha natokisan’ny mpanao salamo io?

¹⁵ Nahatsapa raha mitovy amy zay koa ty mpanoratsy ty Salamo faha-​71. Nivavaky ie hoe: “Ka afoy aho lafa mihena ty heriko.” (Sal. 71:9, 18) Fe ndre zay, le mbo natoky avao mpanao salamo io hoe laha tsy mivaliky amy Jehovah avao ie, le hitari-dala azy Jehovah sady hanampy azy. Nihain’ny mpanao salamo io koa tao vitsivitsy tafara atoy fa tena tean’i Jehovah ze olo manao ze fara heriny amy fanompoa azy ndre voafetra aza ty raha azony atao.​—Sal. 37:23-25.

16. Akory ty azon’i Jehovah ampiasà ty olo be tao? (Salamo 92:12-15)

¹⁶ Laha be tao iha, le diniho hoe manao akory ty fahitan’i Jehovah anao. Marina aloha hoe fa mihareraky iha, fe afaky manampy anao ie mba tsy hivaliky aminy avao. (Vakio Salamo 92:12-15.) Ka mifantoky amy raha tsy ho vitanao sasy, fa mifantoha amy ze azonao atao. Afaky mampahery ty olo hafa, ohatsy, ty modelinao satria tsy mivaliky iha sady midary olo. Azonao resahy amin-drozy hoe akory ty fomba nanampean’i Jehovah anao bakany zay, le ino amy fampitamana amy Baiboly ao rey ro fa tsy lininao ty hahatanteraky azy amy hoavy. Le ka halino mihintsy koa hoe tena misy heriny ty vavaky ataonao ho an’olo hafa. (1 Pet. 3:12) Samby mana raha azontsika amea an’i Jehovah noho ty olo hafa tsika iaby, ndre ino ino ty raha iainantsika.

17. Manino tsika ro tsy tokony hampitaha ty vatantsika amin’olo hafa?

¹⁷ Kivy va iha satria fa tsy mahavita raha maro sasy amy fanompoa an’i Jehovah? Matokisa fa lafovily amy Jehovah ze vitanao ho azy. Mety hiezaky hampitaha ty raha vitanao amy ty ahin’olo hafa iha. Fe ka manao ani-zay! Fa manino? Satria tsy manao ani-zay Jehovah. (Gal. 6:4) Maria, ohatsy, nanome menaky manitsy lafovily an’i Jesosy. (Jaona 12:3-5) Fa ampela mahantra maty valy iny nanome drala maliniky roe tsy de misy viliny, mba hatao fanomeza tamy tempoly tao. (Lioka 21:1-4) Fe tsy nampitaha an’ny ampela roe reo Jesosy. Nivola aza ie hoe samby nanam-pinoa rozy roe. Tena nanahaky tanteraky an’ny Babany Jesosy. Afaky matoky zany iha fa tena lafovily amy Jehovah ze raha iaby ataonao satria mino azy iha sady tea azy. Ndre atao hoe kelikely aza ty fahitanao an’ny raha iny, le tsy manahaky ani-zay ty fahitany azy.

18. Ino ty hanampy antsika handresy ty fisalasalà anatintsika ao? (Henteo koa ty efajoro hoe “Afaky Manampy Anao Tsy Hisalasala ty Safàn’i Jehovah.”)

¹⁸ Mety hisy raha hampisalasala antsika aloha kindraiky. Fe nianarantsika tato hoe afaky manampy antsika handresy an’ny raha rey ty Baiboly. Miezaha zany mba hangalaky ze raha mampisalasala an-tsainao ao, amy zay iha tsy hiasa loha fa hana fatokisa avao. Hain’i Jehovah soa iha. Ankasitrahany ze raha iaby nafoinao mba hahafahanao hanao voaloha lista ty fanompoa azy, sady mampitamà ie fa hamaly soa anao. Matokisa fa tea noho midary ty mpanompony tsy mivaliky kiraidraiky Jehovah.