Lafovily amy Jehovah ty Ranomasonao

1-2. Ino ty raha mety hampitany antsika?

AZO antoky hoe samby fa nitany tsika iaby. Latsaky ty ranomasontsika kindraiky lafa misy raha tena mahafalifaly antsika, ohatsy hoe nahazo anaky tsika, na lafa nisy raha tena niavaky niseho tamy fiainantsika. Na mety nitany koa tsika lafa nahatiaro ty fotoa tena nahafalifaly antsika taloha, na lafa nifankahita ndraiky tamy namantsika fa tsy nihitantsika fa ela.

² Fa ty tena mampitany antsika matetiky, le tsika malahelo noho misy raha mamparary ty fontsika. Mety hitàny, ohatsy, tsika lafa misy olo atokisantsika mandiso fanantenà antsika, na marary tsika ka nijalijaly avao tanatin’ny tao maro, na maty ty olo teantsika. Amy fotoa rey, le mety hahatsapa ty raha nitsapan’i Jeremia mpaminany tsika. Hoy ty asany lafa niravàn’ny Babylonianina Jerosalema: “Misy rano mivary baka amy ty masoko ... Tsy mieny ty ranomasoko fa milatsaky avao, sady tsy mijano mihintsy.”​—Fitom. 3:48, 49.

3. Ino ty tsapan’i Jehovah lafa mahita ty mpanompony mijaly? (Isaia 63:9)

³ Hain’i Jehovah hoe fa impiry zay tsika ro nitany, vokatsin’ny raha sarotsy mahazo antsika. Manome toky antsika ty Baiboly fa tsy misy mivony aminy ty raha sarotsy atrehintsika mpanompony, sady reny tsika lafa mirohaky ty tany mila fanampea aminy. (Sal. 34:15) Fe tsy hoe mahita noho maharè antsika avao Jehovah. Babantsika ie sady tena tea antsika, ka malahelo biby ie lafa mahita antsika mitany sady avy le ampeany tsika.​—Vakio Isaia 63:9.

4. Tantaran’ia ro hodinihintsika, le ino ty hianarantsika mikasiky an’i Jehovah?

⁴ Ampahafantarin’i Jehovah antsika amy Safàny ao ty raha nitsapany noho ty raha nataony lafa nisy mpanompony nalahelo. Handiniky ty tantaran’i Hana, Davida, noho Hezekia Mpanjaka tsika mba hahitantsika ani-zay. Hodinihintsika hoe nanino rozy ro nitany, le ino ty nataon’i Jehovah mba hanampea an-drozy. Bakeo hodinihintsika hoe akory ty ampiononan’i Jehovah antsika lafa tsika malahelo, na lafa mivaliky amintsika ty olo atokisantsika, na lafa tsika manary toky.

LAFA MIASA LOHA MARÈ

5. Ino ty raha nahazo an’i Hana, le ino ty nitsapany?

⁵ Maro biby ty raha sarotsy natrehin’i Hana ka nampalahelo azy noho nampitany azy raha zay. Anisan’ny raha sarotsy raiky natrehiny zao, nampirafy valiny. Penina ty anaran’ny ampela io. Tena nampijalijaly an’i Hana ie. Tsy vitan’ny hoe fa mafy ty nahazo an’i Hana fa mbo tsy niteraky koa ie. Penina anefa nanan’anaky maro. (1 Sam. 1:1, 2) Nikizakizaky noho nanambanimbany azy avao Penina. Mety ino ty ho nitsapanao laha iha ro nitratsin’ny raha manahaky ani-zay? “Nalahelo biby Hana” ka “nitany noho tsy nahafihinan-kany.”​—1 Sam. 1:6, 7, 10.

6. Ino ty nataon’i Hana mba hampisinda ty alahelony?

⁶ Ino ty nataon’i Hana mba hampisinda ty alahelony? Toy misy raha raiky nataony. Nandeha tamy tranolay masy tany ie mba hanompo an’i Jehovah. Tao ro foiben’ny fivavaha marina tamy zay. Mety narìny tamy filira amy tranolay masy teo ie ro “nivavaky tamy Jehovah sady nirohaky ty tany.” Nisoloho tamy Jehovah ie hoe: ‘Mba henteo lahy ty fijalean’ny mpanomponao ka tiarovo aho.” (1 Sam. 1:10b, 11) Nivavaky tamy Jehovah Hana le naborakiny taminy ze raha iaby nitsapany. Tsy maintsy ho nalahelo biby Jehovah lafa nahita an’ny anakampelany teany io nirohaky ty tany, ka azo antoky hoe ta hanampy azy ie!

7. Ino ty nitsapan’i Hana lafa ie baka niresaky ty raha tsapany tamy Jehovah?

⁷ Lafa baka niresaky ty raha tsapany tamy Jehovah Hana, le nanome toky azy Ely Mpisorobe fa hamaly ty vavaky nataony Jehovah. Nanao akory amy zay Hana? Mivola ty Baiboly hoe: “Lasa nandeha tamy ze nandehanany ie sady nihinan-kany, ka hita tamy ty endrikiny fa tsy nalahelo marè sasy ie.” (1 Sam. 1:17, 18) Marina fa mbo tsy nilamy raha nahazo azy iny, fe lasa nilamin-tsay ie. Sahala nanday enta mavesatsy ie lafa nalahelo, le nampanandesiny an’i Jehovah raha iny. Jehovah koa moa tsy nanome lambosy azy. Azony soa ty raha nitsapan’i Hana, le nijanjininy ty vavaky nataony. Nampeany ie tafara atoy ka nanan’anaky.​—1 Sam. 1:19, 20; 2:21.

8-9. Manino tsika ro tokony hiezaky hivory avao? (Hebreo 10:24, 25) (Henteo koa sary io.)

⁸ Ino ty fianara ho antsika? Mety mana problemo iha amy zao ka mahavy anao hitany. Mety hoe nimaty vasa ty longonao na ty namanao. Ara-dalàna laha tsy ta hiarakaraky amin’olo hafa iha amy fotoa rey. Fe tiarovo ty nataon’i Hana. Nandeha tamy tranolay masy tany ie ka nahazo fampionona baka amy Jehovah. Manahaky ani-zay koa fa hampionona noho hampahery anao Jehovah, laha mandeha mivory iha ndre mety mahatiaro vozaky noho malahelo aza. (Vakio Hebreo 10:24, 25.) Maharè andinin-teny mampahery antsika tsika lafa am-pivoria any. Anisan’ny fomba raiky anampean’i Jehovah antsika zay mba tsy hieritseritsy marè ty raha mampalahelo antsika. Vokany, mahatiaro maivamaiva tsika ndre tsy miova eo noho eo raha mahazo antsika iny.

⁹ Mampahery antsika koa rahalahy noho anabavintsika reo lafa tsika am-pivoria any, sady asehon-drozy hoe tena tean-drozy tsika. Lasa milamindamy ty saintsika lafa tsika miaraky amin-drozy. (1 Tes. 5:11, 14) Diniho ty raha niainan’ny rahalahy mpisava lala manoka toy. Nimaty valiny, le zao ty nivolaniny: “Mbo latsa-dranomaso avao aho. Kindraiky aho tsy ta hiarakaraky amin’olo satria tsy nieny aho fa nirohaky ty tany avao. Fe ndre zay le mbo mandeha mivory avao aho. Mahazo fampahereza aho lafa any. Lasa misinda ty alaheloko lafa maharè safà mampahery noho valin-teny baka amy rahalahy noho anabaviko reo. Ka ndre niasa loha na nalahelo manao akory aho talohan’ny hiaviako am-pivoria any, le tozoro falifaly aho lafa any.” Afaky mampiasa an’ny rahalahy noho anabavintsika reo Jehovah mba hanampy antsika lafa tsika am-pivoria any.

10. Akory ty azontsika anahafa ty modelin’i Hana lafa misy raha tena mampalahelo antsika?

¹⁰ Nahazo fampionona koa Hana lafa niresahiny tamy Jehovah ze raha tsapany. Afaky ‘apetrakinao’ amy Jehovah koa ‘ze raha iaby mampiasa loha anao’, le matokisa fa hijanjy ty vavaky ataonao ie sady hanampy anao. (1 Pet. 5:7) Maty nivonoan’olo ty valin’ny ranabavy raiky zay, le zao ty nivolaniny: “Tena nahatiaro torotoro fo aho ka nieritseritsy hoe tsy ho afaky mihintsy raha zay. Fe nahatiaro maivamaiva aho saky baka nivavaky tamy Jehovah, azy Babako be fitiava iny. Tsy haiko kindraiky ty raha hovolaniko aminy, fe azony soa ty raha mahazo ahy. Lafa nikivy tanteraky aho, le nivavaky taminy mba hameany fiadanan-tsay. Avy le kalma amy zay ty foko noho ty saiko ka afaky nanao ze raha tokony hataoko tamy andro iny aho.” Laha aborakinao amy Jehovah ze raha iaby mampiasa loha anao, le hiferinay anao ie satria hitany ty ranomasonao sady tsapany ty raha maharary anao. Afaky mampionona anao noho manampy anao hilamin-tsay Jehovah ndre mbo tsy afaky aza problemo mahazo anao iny. (Sal. 94:19; Fil. 4:6, 7) Hitany hoe miaritsy iha sady tsy mivaliky ka hamaly soa anao ie.​—Heb. 11:6.

LAFA MIVALIKY AMINAO TY OLO ATOKISANAO

11. Ino ty nitsapan’i Davida lafa nisy olo nampijalijaly azy?

¹¹ Maro ty raha sarotsy tsy maintsy niaretan’i Davida ka nampitany azy. Maro biby ty olo nalay azy. Nisy namany sisany noho olo tamy fianakaviany aza nalay azy mihintsy noho ta hamono azy. (1 Sam. 19:10, 11; 2 Sam. 15:10-14, 30) Ho zao ty nivolaniny ndraiky zay: “Vozakin’ny misento aho; lontsikin’ny ranomasoko ty fandriako haly tontolo; lontsikin’ny ranomasoko ty kitreliko.” Nanino Davida ro nahatsapa manahaky ani-zay? ‘Vokatsin’ny raha ataon’olo iaby nampijaly azy’ hoasany. (Sal. 6:6, 7) Tena nampalahelo an’i Davida ty raha raty nataon’olo taminy, ka nirohaky ty tany avao ie.

12. Ino ty natokisan’i Davida laha hentea ty Salamo 56:8?

¹² Fe ndre teo ty raha sarotsy natrehin’i Davida, le natoky ie hoe tea azy Jehovah. Zao ty nivolaniny: “Ho ren’i Jehovah ty taniko.” (Sal. 6:8) Nisy fotoa koa Davida nanoratsy an’ny safà mampahery amy Salamo 56:8 ao reo. (Vakio.) Hita amy safà reo fa tena tea antsika Jehovah sady azony soa ty raha mahazo antsika. Nahatsapa Davida fa sahala navorin’i Jehovah anaty siny ty ranomasony na nisoratiny anaty boky. Natoky ie fa hitan’i Jehovah ty raha niaretany sady tiarony raha rey. Resy lahatsy ie fa tsy hoe nahita ty raha nahazo azy avao Babany be fitiava an-danitsy any iny, fa hainy koa ty vokatsin’ny raha zay taminy.

13. Ino ty tokony ho tiarovintsika lafa misy olo mandiso fanantenà antsika? (Henteo koa sary io.)

¹³ Ino ty fianara ho antsika? Marary va ty fonao satria tena nandiso fanantenà anao na nivaliky taminao ty olo natokisanao? Mety manaly ho vaky ty fonao satria nisaraky aminao tampoky ty olo raiky fa nieritseretinao ho valy, na niala anao valinao. Na nijano tsy nanompo an’i Jehovah ty olo teanao. Nijangajanga, ohatsy, ty valin’ny rahalahy raiky zay le bakeo niala azy. Hoy rahalahy iny: “Tsy nino mihintsy aho hoe hahazo ahy ty raha manahaky an’iny. Nahatiaro ho tsy misy ilà azy aho, nalahelo sady nimeloky.” Laha misy olo namitaky anao na tena nandiso fanantenà anao, le hampionona anao ty mahay hoe tsy hahafoy anao mihintsy Jehovah. Hoy ndraiky rahalahy iny: “Tsapako tamin’iny hoe mety hivaliky aminao ty olo, fa Jehovah tsy hanao ani-zay mihintsy. Ie ro Vatolampintsika. Eo avao ie hanampy antsika ndre inon-kidona ndre inon-kihatra. Tsy hanenga ty mpanompony tsy mivaliky ie.” (Sal. 37:28) Tiarovo koa fa Jehovah ro tena tea anao mandilatsy ty olombelo. Marina hoe marary biby ty fonao lafa mivaliky aminao ty olo teanao. Fe tsy miova mihintsy ty fitiavan’i Jehovah anao. Tena lafovily aminy iha. (Rom. 8:38, 39) Zao zany ie: Ndre ino ino fomba anandesan’olo anao, le tiarovo fa tea anao Babanao an-danitsy any iny.

14. Ino ty toky amean’ny Salamo 34:18 antsika?

¹⁴ Afaky mampionona anao ty raha nivolanin’i Davida amy Salamo 34:18 ao laha fa nisy olo nivaliky taminao. (Vakio.) Manazava ty atao hoe “torotoro fo” boky raiky zay. Mivola ie fa mety manondro olo “tsy mana raha soa tamany mihintsy” raha io. Laha misy olo mahatsapa raha manahaky ani-zay satria tena diso fanantenà, akory ty fahitan’i Jehovah azy? ‘Anilantsika’ eo Jehovah. Manahaky baba na reny raiky mitrotro noho manambitamby ty anany mitany rey Jehovah. Tsapany ty raha maharary antsika ka avy le hanampy antsika ie lafa tsika mijalijaly satria nivaliky tamintsika na nanenga antsika ty olo teantsika. Parè hampionona antsika ie lafa torotoro fo tsika noho lafa mahatiaro tsy misy dikany. Maro biby koa ty raha ampitamaniny fa hameany antsika mba hanampea antsika hiaritsy ty raha mahazo antsika amy zao.​—Isaia 65:17.

LAFA TSIKA MANARY TOKY

15. Nanino Hezekia ro nalahelo biby sady nitany?

¹⁵ Hain’i Hezekia mpanjakan’i Joda hoe voan’ny arety mahafaty ie tamy ie 39 tao. Nirahin’i Jehovah ho aminy any Isaia mpaminany mba hivola aminy fa ho maty ie. (2 Mpanj. 20:1) Lafa naharè ani-zay Hezekia, le nalahelo biby ie sady nirohaky ty tany. Nisoloho tamy Jehovah ie mba hanampy azy.​—2 Mpanj. 20:2, 3.

16. Ino ty nataon’i Jehovah mba hampionona an’i Hezekia?

¹⁶ Niferinay an’i Hezekia Jehovah lafa naharè ty vavaky nataony noho nahita ty ranomasony, ka nivola taminy hoe: “Fa reko ty vavaky nataonao, sady fa hitako ty ranomasonao. Ka le hitaha anao aho.” Nivola tamy Isaia Jehovah fa namindra fo tamy Hezekia ie ka hohalavàny ty andro iainany, sady hovonjeny tsy ho azon’ny tanan’ny Asyrianina Jerosalema.​—2 Mpanj. 20:4-6.

17. Akory ty anampean’i Jehovah antsika lafa tsika tratsin’ny arety sarotsy afaky? (Salamo 41:3) (Henteo koa sary io.)

¹⁷ Ino ty fianara ho antsika? Marary va iha ka atao raha tsy hisy fanafany arety mahazo anao io? Laha zay ie, le mivavaha amy Jehovah. Ambarao azy ze raha tsapanao fa hijanjy anao ie ndre mitany aza iha. Manome toky antsika ty Baiboly fa hampionona antsika azy “Baban’ny fiferinesa noho Ndranaharin’ny fampionona iaby” iny, lafa miatriky raha sarotsy tsika. (2 Kor. 1:3, 4) Amy zao aloha tsika tsy afaky mitamà hoe halàn’i Jehovah lafa kila raha manahira antsika. Fe afaky matoky tsika fa hanampy antsika avao ie. (Vakio Salamo 41:3.) Mampiasa ty fanahiny masy Jehovah mba hanomeza hery, fahendrea, noho filaminan-tsay antsika, amy zay tsika hahavita hiatriky ty raha mahazo antsika. (Ohab. 18:14; Fil. 4:13) Mampionona antsika koa ie ka mampitamà antsika amy Baiboly ao fa tsy harary sasy ty olo amy hoavy.​—Isaia 33:24.

18. Ino ty andinin-teny hitanao hoe mampionona anao lafa iha miatriky raha tena sarotsy? (Henteo koa ty efajoro hoe “Safà Mampahery Afaky Mampionona Antsika lafa Tsika Mitany.”)

¹⁸ Nampionona an’i Hezekia ty raha nivolanin’i Jehovah taminy. Hahazo fampionona koa tsika laha mijanjy ty raha volanin’i Jehovah amintsika amy Baiboly ao. Lafa miatriky raha mahakivy tsika, le fa misy safà mampahery nihajarin’i Jehovah ho antsika anatin’ny Safàny ao. (Rom. 15:4) Diniho ty raha nahazo an’ny anabavy raiky an’Afriky Andrefa any toy. Nitany avao ie lafa nihainy hoe voan’ny kansera. Ho zao ty nivolaniny: “Tena nampahery ahy ty Isaia 26:3. Marina aloha hoe tsy afaky mangalaky ty problemo mahazo antsika tsika matetiky. Fe mampitamà andininy io fa hataon’i Jehovah ze hahavy antsika hilamin-tsay. Hampeany koa tsika ka hahavita hiaritsy ze raha mahazo antsika.” Misy andinin-teny va hitanao hoe mampahery anao lafa iha mahatsapa fa atao raha tsy ho voavaha ty raha sarotsy mahazo anao, na mety tsy misy azo atao mihintsy?

19. Ino ty raha mandiny antsika amy hoavy?

¹⁹ Fa lasa lavitsy amy andro farany tsika henanizao, ka fa ampoizintsika hoe vomaiky hihamaro ty raha hampalahelo noho hampitany antsika. Fe nihitantsika tamy tantaran’i Hana, Davida, noho Hezekia Mpanjaka fa hitan’i Jehovah ty ranomasontsika sady tena malahelo ie. Tena lafovily aminy ty ranomasontsika. Ka lafa miatriky raha mahakivy tsika, le tokony haborakintsika amy Jehovah ze raha am-pontsika ao. Tsy tokony hihatakataky amy rahalahy noho anabavintsika be fitiava amy fiangona eo reo koa tsika. Tsy zay avao fa tokony hamaky Baiboly tsy tampaky tsika amy zay hahazo fampionona amy Jehovah. Afaky matoky tsika fa hamaly soa antsika Jehovah laha miaritsy avao tsika ka tsy mivaliky aminy. Anisan’ny raha ampitamaniny zao ty hoe ‘hamafa ty ranomaso iaby’ amy ty masontsika ie lafa tsika mitany satria miasa loha marè, mivaliky amintsika ty olo atokisantsika, noho lafa tsika manary toky. (Apok. 21:4) Lafa mitany tsika amy fotoa zay, le tsy hoe vokatsin’ny alahelo fa ho ranomasom-pifalea.