Ino ty Hanampy Anao Tsy Hisalasala Hiresaky ty Raha Am-ponao ao amy Jehovah?

1-2. a) Ino ty raha mety hahavy antsika tsy hiresaky soa amy Jehovah? b) Akory ty ahaizantsika fa mijanjy soa ty vavaky ataontsika Jehovah?

TSAPANAO va kindraiky hoe lasa fahazara avao ty vavaky ataonao? Tsy iha raiky avao ro tratsini-zay. Mety hivavaky malakilaky tsika satria maniankia fotoa na koa maro raha atao. Na mety ho sarotsy amintsika mihintsy koa ty hiresaky amy Jehovah satria mahatsapa tsika hoe tsy maeva hamonjy azy.

² Manome toky antsika ty Baiboly hoe tsy ty hasoan’ny safà ampiasantsika ro vatan-draha amy Jehovah lafa mivavaky tsika, fa ty firesahantsika ty raha am-pontsika ao noho ty fiambaneantsika. Mijanjy ty “fangatahan’ny mpandefitsy” ie. (Sal. 10:17) Janjininy soa ze raha iaby volanintsika lafa mivavaky tsika, satria tena midary antsika ie.​—Sal. 139:1-3.

3. Ino iaby ty fanontanea hodinihintsika amy lahatsoratsy toy ato?

³ Handiniky an’ny fanontanea retoa tsika amy lahatsoratsy toy ato: Manino tsika ro tsy tokony hisalasala hiresaky ty raha am-pontsika ao lafa mivavaky amy Jehovah? Ino ty azontsika atao mba hifandramby marìny amy Jehovah lafa mivavaky? Manino ty fandinihantsika ty vavaky nataon’ny mpanompon’i Jehovah amy Baiboly ao ro manampy antsika hanasoa ty vavaky ataontsika? Le ino ty azontsika atao laha tsy hitantsika ty raha horesahy amy Jehovah?

KA MISALASALA MIVAVAKY AMY JEHOVAH

4. Manino tsika ro tsy tokony hisalasala hivavaky amy Jehovah? (Salamo 119:145)

⁴ Lafa haintsika hoe nama azontsika atokisa Jehovah sady mila ze hahasoa antsika, le tsy hisalasala tsika hiresaky ty raha an-tsaintsika noho am-pontsika ao aminy. Zay mihintsy ty nataon’ny mpanoratsy Salamo 119 lafa nivavaky tamy Jehovah ie. Niatriky raha sarotsy ie satria nasaran’olo nanao raha raty. (Sal. 119:23, 69, 78) Nisy fotoa koa ie kivy satria nanao hadisoa. (Sal. 119:5) Fe ndre zay, le tsy nisalasala ie niresaky ty raha am-pony ao tamy Jehovah.​—Vakio Salamo 119:145.

5. Manino ro tsy tokony hisy raha engàntsika hisaka antsika tsy hivavaky amy Jehovah? Hazavao amy ohatsy.

⁵ Ampirisihin’i Jehovah hivavaky aminy ty olo, anisani-zay ty olo nanao hadisoa bevata. (Isa. 55:6, 7) Tsy tokony hisy raha engàntsika hisaka antsika tsy hivavaky aminy mihintsy zany. Eritsereto hoe misy olo raiky trobo anaty ala any, le mahita olo afaky hanampy azy ie. Hisalasala hila fanampea aminy va ie satria hoe menatsy? Aha! Manahaky ani-zay koa, fa ndre tsy haintsika aza ty tokony hatao kindraiky na nanao fahotà tsika, le tsy tokony hisalasala hivavaky amy Jehovah tsika.​—Sal. 119:25, 176.

INO TY AZONAO ATAO MBA HIFANDRAMBY MARÌNY AMY JEHOVAH LAFA MIVAVAKY?

6-7. Ino ty hanampy antsika hiresaky amy Jehovah ty raha am-pontsika ao? Manomeza ohatsy. (Henteo koa ty fanamariha ambany pejy.)

⁶ Hifandramby marìny amy Jehovah tsika, laha resahintsika aminy soa ty raha an-tsaintsika noho am-pontsika ao. Ino zany ty azontsika atao mba hanasoava ty vavaky ataontsika?

⁷ Vetsevetseo ty toetsin’i Jehovah.a Arakaraky ty ametsevetseantsika ty toetsiny ro hahavy antsika tsy hisalasala hiresaky ty raha an-tsaintsika noho am-pontsika ao aminy. (Sal. 145:8, 9, 18) Diniho moa ty ohatsin’ny ranabavy Kristine. Zao ty nivolaniny: “Nisatà babako, ka tsy mora tamiko ty niresaky tamy Jehovah noho nino hoe Baba be fitiava ie. Nieritseritsy aho hoe tsy misy antony itiavan’i Jehovah ahy satria mpanota aho.” Fe ino ty toetsin’i Jehovah nanampy azy? Hoy ty asany: “Lafa nivetsevetseko hoe be fitiava noho tsy mivaliky Jehovah, le nitsapako hoe tea ahy vatany ie. Haiko fa tsy hiala ahy mihintsy ie. Ndre manao hadisoa aza aho, le mbo teany noho ampeany avao. Nanampy ahy raha zay mba tsy hisalasala hiresaky ty fihetseham-poko aminy, anisani-zay ty raha nahafalifaly ahy na nampalahelo ahy.”

8-9. Manino ro soa ty hoe dinihintsika soa ty raha ho resahintsika alohan’ny hivavaky? Manomeza ohatsy.

⁸ Eritsereto ty raha ho volaninao. Alohan’ny hivavahanao, le azonao atao ty mametraky fanontanea vitsivitsy amy vatanao. Ohatsy hoe: Ino iaby ty raha sarotsy atrehiko henanizao? Misy olo nanao raha tsy mety amiko va ka tokony hengàko ty hadisoany? Misy problemo vaovao nanova ty fiainako va ka ilàko fanampea amy Jehovah?’ (2 Mpanj. 19:15-19) Tiarovo koa ty raha nampianarin’i Jesosy antsika lafa tsika mivavaky. Nivola ie hoe tokony hivavaky tsika mba hanamasìna ty anaran’i Jehovah, hiavian’ny Fanjakàny, noho hanaova ty sitrapony.​—Mat. 6:9, 10.

⁹ Lafa nihain’ny ranabavy mana anara Aliska zay hoe voan’ny kansera amy ati-doha valiny, le nisarotsy taminy ty nivavaky. Zao ty nivolaniny: “Niasa loha marè aho, ka tsy hitako hoe ino ty horesahiko amy vavaky.” Ino ty nanampy azy? Hoy ie: “Alohan’ny hivavahako, le dinihiko soa ty raha horesahiko amy Jehovah. Manampy ahy raha zay mba tsy hiresaky ze raha mahasoa ahy na mikasiky aretin’ny valiko iny avao. Lafa manao ani-zay aho, le lasa kalma sady afaky miresaky raha sankarazany amy Jehovah.”

10. Manino tsika ro tsy tokony halisalisa lafa mivavaky? (Henteo koa sary reo.)

¹⁰ Ka malisalisa lafa mivavaky. Marina fa mety hahavy antsika hifandramby marìny amy Jehovah ty vavaky ataontsika ndre boribory. Fe laha mivavaky elaela tsika, le azo inoa fa hahavita hiresaky ty raha am-pontsika noho an-tsaintsika any.b Zao ty nivolanin’i Elijah, valin’i Aliska: “Mivavaky matetiky amy Jehovah aho sanandro, sady tsapako hoe lasa mifandramby marìny aminy lafa mivavaky elaela. Tsy malisalisa aho lafa mivavaky amy Jehovah satria haiko hoe manam-pahareta ie, ka parè hijanjy ahy.” Toy misy soso-kevitsy: Lafa hivavaky iha, le milà fotoa noho pilasy tsy misy mpanelingely, le azonao atao mihintsy amy zay ty mivola marerè sady miezaha mba tsy halisalisa.

DINIHO TY VAVAKY NATAON’NY MPANOMPON’I JEHOVAH AMY BAIBOLY AO

11. Manino ro hahasoa antsika ty mandiniky an’ny vavaky amy Baiboly ao rey? (Henteo ty efajoro hoe “Mitovy amy Raha Nitsapan-drozy va ty Raha Tsapanao?”)

¹¹ Mety hahasoa anao ty mandiniky ty vavaky noho ty hira, na ty salamo amy Baiboly ao. Tsy hisalasala hiresaky ty raha am-ponao ao amy Jehovah iha, lafa mandiniky ty fomba nampisehoan’ny mpanompo-Ndranahary ty raha an-tsainy any noho am-pony any. Mety hanampy anao koa ty vavaky nataon-drozy mba hahita hevitsy vaovao horesahy lafa mivavaky iha. Mety hahita vavaky nataon’ny mpanompon’i Jehovah mitovy amy raha teanao hangatahy iny koa iha.

12. Ino ty fanontanea azontsika eritserety lafa mandiniky vavaky amy Baiboly ao tsika?

¹² Lafa mandiniky ty vavaky amy Soratsy Masy ao iha, le eritsereto zao: ‘Ia ty olo nanao an’ny vavaky toy, le ino ty raha niainany? Azoko ampiasà va raha resahiny eto toy lafa mivavaky aho? Ino ty raha azoko ianara baka amy vavaky toy?’ Mety mila manao fikaroha fanampiny iha mba hahitanao an’ny valin’ny fanontanea reo, fe tiarovo fa tsy hisera ty ezaky ataonao. Ndao tsika handiniky ohatsy vitsivitsy.

13. Ino ty raha azontsika ianara baka amy Hana mikasiky ty vavaky? (1 Samoela 1:10, 11) (Henteo koa sary io.)

¹³ Vakio 1 Samoela 1:10, 11. Niatriky problemo roe bevata Hana tamy ie nanao an’ny vavaky io. Tsy teraky ie sady nampijalijaly azy rafivaviny iny. (1 Sam. 1:4-7) Ino ty azonao ianara baka amy vavaky nataon’i Hana lafa miatriky raha sarotsy iha? Tsy nalisalisa ie lafa nivavaky sady niresahiny tamy Ndranahary ze raha iaby tam-pony ao, ka nahatiaro maivamaiva ie. (1 Sam. 1:12, 18) Ho maivamaiva koa tsika laha ‘apetrakintsika amy Jehovah ze manavesatsy antsika,’ ka resahintsika aminy iaby ty raha mampiasa loha antsika noho ty raha tsapantsika.​—Sal. 55:22.

14. a) Ino koa ty ianarantsika baka amy Hana? b) Manino ty famakia noho ty fametsevetsea ty Safà-Ndranahary ro manampy antsika hahay ty raha horesahy amy vavaky? (Henteo ty fanamariha ambany pejy.)

¹⁴ Tao vitsivitsy tafaran’ny niterahan’i Hana an’i Samoela, le nandesiny tamy Ely Mpisorobe any ie. (1 Sam. 1:24-28) Niresahin’i Hana tamy Jehovah ze tam-pony ao, sady nankasitrahany ie satria miaro noho mikarakara ty mpanompony tsy mivaliky.c (1 Sam. 2:1, 8, 9) Mety tsy niafaky ty raha sarotsy nahazo an’i Hana tan-trano ao, fe nifantoky tamy ty fitahia namean’i Jehova azy ie. Ino ty ianarantsika baka amy zay? Hahavita hiatriky raha sarotsy avao tsika laha mifantoky amy ty raha nanampean’i Jehovah antsika zisiky henanizao.

15. Ino ty ianarantsika baka amy vavaky nataon’i Jeremia mpaminany lafa tratsin’ny tsy rariny tsika? (Jeremia 12:1)

¹⁵ Vakio Jeremia 12:1. Nisy fotoa Jeremia mpaminany nikivy lafa nihitany hoe atao raha nilamy ty fiainan’ny mpanao raty. Nisy vokany taminy koa ty kizakizaky nataon’Israelita sisany azy. (Jer. 20:7, 8) Mety hahatsapa ty raha nitsapany koa tsika lafa kizakizahin’olo, na lafa mahita hoe ty olo manao tsy marina koa ro atao raha mana fiaina milamindamy. Marina fa nivolanin’i Jeremia tamy Ndranahary ty raha nampeloky azy, fe tsy nivola mihintsy ie hoe nanao tsy rariny Jehovah. Lafa nihitany koa ty fomba nanasazian’i Jehovah an’ny vahoakiny nivaliky rey, le vomaiky ie natoky hoe manao ty rariny Ndranahary. (Jer. 32:19) Afaky resahintsika amy Jehovah koa hoe malahelo tsika lafa mahita ty tsy rariny. Fe afaky matoky tsika fa halamin’i Jehovah raha zay amy fotoa mety.

16. Ino ty ianarantsika baka amy vavaky nataon’ny Levita natao sesitany iny laha voafetra ty raha azontsika atao? (Salamo 42:1-4) (Henteo koa sary reo.)

¹⁶ Vakio Salamo 42:1-4. Levita raiky natao sesitany sady tsy afaky nanompo an’i Jehovah niaraky tamy Israelita namany ro nanoratsy an’ny hira io. Hita amy salamo nisoratiny io ty fihetseham-pony. Mety hahatsapa ty raha nitsapany koa tsika, lafa tsy afaky miboaky an-tranontsika ao na gadra vokatsin’ny finoantsika. Mety hiovaova ty fihetseham-pontsika. Fe ndre ino ndre ino ty raha tsapantsika, le soa laha resahintsika amy Jehovah amy vavaky. Hanampy antsika hahay soa ty fihetseham-pontsika noho tsy ho kivy raha zay. Hain’ny Levita io, ohatsy, hoe hahita fomba hafa hiderà an’i Jehovah ie. (Sal. 42:5) Nivetsevetseny koa ty fomba nikarakaran’i Jehovah azy. (Sal. 42:8) Lafa resahintsika amy Ndranahary ty raha iaby am-pontsika ao, le hilamin-tsay tsika, hahay handanjalanja, noho hana hery hiareta raha sarotsy.

17. a) Ino ty ianarantsika baka amy vavaky nataon’i Jona mpaminany? (Jona 2:1, 2) b) Manino ro mety hanampy antsika hiatriky raha sarotsy ty safà sisany baka amy Salamo ao? (Henteo ty fanamariha ambany pejy.)

¹⁷ Vakio Jona 2:1, 2. Zay ty vavaky nataon’i Jona mpaminany lafa tanatin’ny kibon’ny fia bevata iny tao ie. Marina fa tsy nanoriky ty safàn’i Jehovah ie, fe natoky ie fa hijanjy ty vavaky ataony Ndranahary. Nampiasa safà maro baka amy Salamo ao Jona tamy vavakiny io.d Azo inoa fa nihainy soa Salamo reo. Lafa nivetsevetseny raha reo, le natoky ie fa hanampy azy Jehovah. Manahaky ani-zay koa, fa laha miezaky hahay andinin-teny vitsivitsy baka amy Baiboly ao tsika, le mety ho tiarontsika noho hampahery antsika raha rey lafa miatriky raha sarotsy tsika ka mivavaky amy Jehovah.

MIVAVAHA MATETIKY AMY JEHOVAH AVAO

18-19. Lafa sarotsy amintsika kindraiky ty miresaky ty fihetseham-pontsika, manino ro mampahery antsika ty raha resahin’ny Romanina 8:26, 27? Manomeza ohatsy.

¹⁸ Vakio Romanina 8:26, 27. Lafa maro marè ty raha mampiasa loha antsika, le mety tsy ho hitantsika ty safà hivolana ty fihetseham-pontsika amy Jehovah. Fe soa avao fa mana mpanampy tsika. “Misoloho” ho antsika ty fanahy masi-Ndranahary lafa miatriky raha sarotsy tsika. Amy fomba akory? Nampiasa ty fanahiny masy Jehovah mba hahavy ty mpanoratsy Baiboly hanoratsy vavaky maro amy Safàny ao. Ka lafa tena tsy haintsika ty hivola ty raha an-tsaintsika ao amy Jehovah, le afaky mamaky an’ny vavaky amy Baiboly ao rey tsika. Horambesin’i Jehovah sahala baka amintsika vavaky rey amy fotoa zay, ka hovaleany.

¹⁹ Nanampy an’ny ranabavy mana anara Yelena baka a Russie any zay raha zay. Nisambory ie satria nivavaky noho namaky Baiboly. Nalahelo marè ie, ka sarotsy taminy ty nivavaky. Zao ty nivolaniny: “Tiaroko fa lafa nikivy aho sady tsy nahita raha horesahy amy vavaky, le afaky mamaky an’ny vavaky nataon’ny mpanompon’i Jehovah taloha any rey. Horambesin’i Jehovah sahala baka amiko vavaky rey amy fotoa zay. Tena nampahery ahy raha zay tamy fotoa sarotsy nahazo ahy io.”

20. Ino ty mety hanampy anao ho parè hivavaky lafa miasa loha marè iha?

²⁰ Lafa miasa loha marè tsika, le mety tsy hifantoky lafa mivavaky. Fe mba hanomanantsika ty saintsika, le afaky mijanjy Baiboly nalà feo amy Salamo ao rey tsika. Azontsika atao koa ty manoratsy ty fihetseham-pontsika manahaky ty nataon’i Davida Mpanjaka. (Sal. 18, 34, 142; safà mampilitsy azy.) Mazava ho azy fa tsy misy fitsipiky mikasiky ty fomba tokony hanomanantsika ty vavaky ataontsika. (Sal. 141:2) Ataovo zany ze farany soa vitanao lafa manoma ty vavaky ataonao iha.

21. Manino ro azontsika resahy ze am-pontsika ao lafa mivavaky tsika?

²¹ Tena falifaly tsika fa hain’i Jehovah ty fihetseham-pontsika, ndre mbo tsy mivola aza tsika. (Sal. 139:4) Fe teany laha volanintsika aminy ty raha tsapantsika sady asehontsika hoe matoky azy tsika. Ka misalasala zany mivavaky amy Babanao an-danitsy any iny. Ampiasao vavaky amy Safàny ao rey. Resaho iaby ty raha am-ponao ao lafa mivavaky. Volano aminy ty raha mahafalifaly anao noho mampalahelo anao. Tena namanao Jehovah, ka tsy hiala anao mihintsy!