Ameo Voninahitsy Jehovah

1. Ino ty raha ifantohan’ny ankamaroan’olo henanizao?

TSY HITANAO va hoe mandrengirengy marè ty vatany ty ankamaroan’olo henanizao? Misy olo sisany zao, manao ze hampalaza azy amy tranonkala fifandrambesa any, le asehosehony ao ty raha vitany. Mampalahelo fa vitsivitsy avao ty olo manome voninahitsy an’i Jehovah henanizao. Ka amy lahatsoratsy toy ato, le hodinihintsika ty dikan’ny hoe manome voninahitsy an’i Jehovah, noho ty antony mandrisiky antsika hanao ani-zay. Hianarantsika koa hoe akory ty anomezantsika an’i Jehovah ty voninahitsy tokony ho azy, le akory ty hanomezany voninahitsy ty anarany amy ho avy.

INO TY DIKAN’NY HOE MANOME VONINAHITSY AN’I JEHOVAH?

2. Akory ty nampisehoan’i Jehovah ty voninahitsiny tamy Vohitsy Sinay teo? (Henteo koa sary amy toy.)

² Resahin’ny Baiboly fa Ndranahary farani-ze mahery Jehovah. Nasehon’i Jehovah tamy Israelita reo ty voninahitsiny tafaran’ny nanafahany an-drozy tsy ho andevo ta Ejipta any. Mba diniho moa toy: Nisy Israelita an-tapitrisany nivory tamy Vohitsy Sinay teo mba hijanjy an’i Jehovah. Bakeo nisy hotroky noho helatsy noho rahona matevy tanabon’ny vohitsy iny teo. Tsy zay avao fa nisy feon’antsiva naneno marè koa. Tampoky teo amy zay, nihozonkozo marè vohitsy iny, manahaky volkan fa hipoaky rey. (Eks. 19:16-18; 24:17; Sal. 68:8) Azo antoky fa tena nitseriky Israelita rey tamy zay lafa nahita ty fomba nampisehoan’i Jehovah ty voninahitsiny.

3. Ino ty dikan’ny hoe manome voninahitsy an’i Jehovah?

³ Ka manao akory tsika olombelo? Tena afaky manome voninahitsy an’i Jehovah va tsika? Mazava ho azy. Manome voninahitsy an’i Jehovah, ohatsy, tsika lafa miresaky amin’olo ty raha soasoa nataony noho ty toetsy soa ananany. Manome voninahitsy a-Ndranahary koa tsika laha mankasitraky azy amy ty raha iaby anampeany antsika. (Isa. 26:12) Modely soa ho antsika Davida Mpanjaka satria nanome voninahitsy an’i Jehovah. Zao ty vavaky nataony tamy Ndranahary tanatrehan’ny fiangonan’Israely teo: ‘Jehovah, iha ro farani-ze bevata noho mahery noho farani-ze soa sady manan-kaja noho be voninahitsy, satria ahinao ty raha iaby an-danitsy any noho an-tany etoy.’ Lafa nivita vavakin’i Davida iny, le “nidera an’i Jehovah ty fiangona iaby.”​—1 Tan. 29:11, 20.

4. Akory ty fomba nanomezan’i Jesosy voninahitsy an’i Jehovah?

⁴ Tamy Jesosy tan-tany etoy, le nanome voninahitsy an’i Babany ie satria nivolaniny hoe Jehovah ro nanome hery azy nahavitany fahagagà. (Marka 5:18-20) Nanome voninahitsy an’i Jehovah koa Jesosy lafa niresaky mikasiky an’ny Babany noho nifandramby tamin’olo. Ndraiky andro, nampianatsy tamy synagoga tao Jesosy. Anisan’ny nijanjy azy tamy zay ampela nipetrahan’ny demonia tanatin’ny 18 tao zay. Nampijalìn’ny demonia ampela io, ka nivokoky sady tsy afaky niandra mihintsy. Ino amy zay ty nataon’i Jesosy? Niferinesany ie ka nikaihiny, le nivolaniny hoe: “Afaky amy aretinao iny iha.” Bakeo ie nametra-tana taminy, ka avy le niandra ampela iny le “nanome voninahitsy a-Ndranahary” satria lasa salama ndraiky ie! (Lioka 13:10-13) Rariny laha nanome voninahitsy an’i Jehovah ampela iny, le manahaky ani-zay koa tsika.

MANINO TSIKA RO MANOME VONINAHITSY AN’I JEHOVAH?

5. Ino iaby ty antony mahavy antsika manaja an’i Jehovah?

⁵ Manome voninahitsy an’i Jehovah tsika satria tena manaja azy. Maro ty antony mahavy antsika manaja azy. Farani-ze mahery ie, sady tsy misy fetrany ty heriny. (Sal. 96:4-7) Hita amy ty raha iaby nataony hoe tena hendry ie. Nanome fiaina noho ty raha iaby ilàntsika koa ie mba hahavelo antsika avao. (Apok. 4:11) Tsy mivaliky ie. (Apok. 15:4) Mety iaby ze raha ataony, sady mitanjaky ty safàny koa ie. (Jos. 23:14) Zay nahavy an’i Jeremia mpaminany tsy nisalasala nivola mikasiky an’i Jehovah io hoe: “Tsy misy manahaky anao mihintsy ty olo hendry iaby amy firenena reo, noho amy ty fanjakàny iaby!” (Jer. 10:6, 7) Tena maro zany ty antony mahavy antsika tokony hanaja an’i Babantsika an-danitsy any iny. Fe tsy hoe manaja an’i Jehovah avao tsika, fa tea azy koa.

6. Manino tsika ro tea an’i Jehovah?

⁶ Manome voninahitsy an’i Jehovah tsika satria tena tea azy. Tea an’i Jehovah tsika satria mana toetsy soa maro ie. Mamindra fo noho miferinay olo ie. (Sal. 103:13; Isa. 49:15) Mahatsapa ty raha mahazo antsika ie. Ka lafa misy raha mampalahelo antsika, le malahelo koa ie. (Zak. 2:8) Ataony ze hahavy antsika tsy hisalasala hamonjy azy noho hinama aminy. (Sal. 25:14; Asa 17:27) Miambany koa ie. “Miondriky ie mba hanenty ty an-danitsy any noho ty an-tany etoy, ka atsangany hiala amy lemboky ty olo ambany.” (Sal. 113: 6, 7) Reo iaby ty antony mahavy antsika ta hanome voninahitsy an’ny Ndranaharintsika be voninahitsy iny.​—Sal. 86:12.

7. Ino ty tombotsoa manoka ananantsika?

⁷ Manome voninahitsy an’i Jehovah tsika satria teantsika hahay azy ty olo. Maro ty olo tsy mahay ty marina mikasiky an’i Jehovah. Ino ty antony? Satria manaparitaky vandy mikasiky Azy Satana, le maro ty olo mino an’ny raha zay. (2 Kor. 4:4) Ataon’i Satana ze hahavy ty olo hino hoe mpamaly faty Jehovah, tsy midary antsika, sady fototsin’ny ankamaroan’ny raha iaby mampijaly antsika henanizao. Fe tsika mahay ty marina mikasiky a-Ndranahary! Mana tombotsoa hiresaky amin’olo ty tena toetsiny tsika sady ampeantsika rozy mba hanome voninahitsy azy koa. (Isa. 43:10) Miresaky ty fanomeza voninahitsy an’i Jehovah ty salamo faha-​96. Hianarantsika amy salamo io hoe akory ty azontsika anomeza an’i Jehovah ty voninahitsy tokony ho azy.

AKORY TY ANOMEZANTSIKA AN’I JEHOVAH TY VONINAHITSY TOKONY HO AZY?

8. Mivolana fomba raiky azontsika anomeza voninahitsy an’i Jehovah? (Salamo 96:1-3)

⁸ Vakio Salamo 96:1-3. Manome voninahitsy an’i Jehovah tsika lafa miresaky mikasiky azy. Mampirisiky antsika andininy reo mba “hihira ho an’i Jehovah, hidera ty anarany, hanambara ty vaovao soan’ny fanavotany,” noho “hivola amy firenena reo hoe be voninahitsy ie.” Reo ty fomba azontsika anomeza voninahitsy an’i Babantsika an-danitsy any iny. Tsy nisalasala ty mpanompon’i Jehovah taloha tany niaro ty lazany noho niresaky tamin’olo ty raha soa nataony tamin-drozy. (Dan. 3:16-18; Asa 4:29) Akory ty azontsika anahafa an-drozy?

9-10. Ino ty ianaranao baka amy ty raha niainan’i Angelena? (Henteo koa sary io.)

⁹ Diniho ty raha niainan’i Angelena,a ranabavy mipetraky a Etazìny any. Nahasaky niaro ty lazan’i Jehovah ie tam-piasàny any. Ndraiky andro, nasà hivory ze mpiasa vaovao tam-piasàn-drozy tao, anisani-zay Angelena. Lafa natao fivoria iny, le samby afaky niresaky mikasikasiky ty fiainany ty kiraidraiky. Farany Angelena nanoma hampiseho sary vitsivitsy mampiseho ty fifalea tsapany amy maha Vavolombelon’i Jehovah azy. Fa marìny ty toròny amin’io, fe mbo toron’ny lahilahy raiky mpiaraky miasa aminy zay ty nivola. Nivola lahilahy io hoe anaky Vavolombelon’i Jehovah ie. Nanomboky nandratiraty antsika noho ty raha inoantsika ie. Zao ty nivolanin’i Angelena: “Tena narary ty foko tamy zay. Fe nieritseritsy aho hoe: ‘Zaho va le hanenty avao lafa misy olo mandratiraty an’i Jehovah? Sa hitsanga hiaro Azy aho?’”

¹⁰ Lafa nitampitsy resakin’ny mpiaraky miasa aminy iny, le nivavaky moramora malaky Angelena. Bakeo nisoa fanahy ie lafa nivola taminy hoe: “Mitovy avao tsika. Anaky Vavolombelon’i Jehovah manahaky anao koa aho, sady mbo anisany avao zisiky amy zao.” Nafanafana resaky iny, fe nikalma avao Angelena. Nasehony tamy mpiaraky miasa aminy rey ty sariny noho ty namany falifaly manompo an’i Jehovah, sady nihazavaniny tamim-panajà ty raha inoany. (1 Pet. 3:15) Ino ty vokany? Lafa nivita resakin’i Angelena iny, le nikalma lahilahy mpiaraky miasa aminy iny. Nieky mihintsy aza ie hoe maro ty raha soa nihitany tamy ie mbo niaraky tamy Vavolombelon’i Jehovah. Nivola Angelena hoe: “Tena maeva harova Jehovah. Tombotsoa bevata ty hoe miresaky ty marina mikasiky azy.” Mana tombotsoa hidera an’i Jehovah noho hanome voninahitsy azy koa tsika, ndre tsy manaja azy aza ty olo.

11. Akory ty nanorihan’ny mpanompon’i Jehovah bakanibakany zay ty torolala amy Salamo 96:8 ao?

¹¹ Vakio Salamo 96:8. Manome voninahitsy an’i Jehovah amy ty raha lafovily ananantsika tsika. Fa zay avao ty nataon’ny mpanompon’i Jehovah bakanibakany zay mba hanomeza voninahitsy azy. (Ohab. 3:9) Nanome drala noho ze raha lafovily nananany, ohatsy, ty Israelita mba hanamboara noho hikojakojà an’ny tempoly iny. (2 Mpanj. 12:4, 5; 1 Tan. 29:3-9) “Nampiasa ty hananan-drozy” koa ty mpianatsin’i Jesosy sisany mba hanohana azy noho apostoliny rey. (Lioka 8:1-3) Resahin’ny Baiboly koa, fa nandefa fanampea ho an’ny mpiara-manompo aminy nitratsin’ny mosary ty Kristiana tamy taonjato voalohany. (Asa 11:27-29) Manome voninahitsy an’i Jehovah koa tsika henanizao, lafa manao fanomeza an-tsitrapo.

12. Manino ty fanomeza ataontsika ro manome voninahitsy an’i Jehovah? (Henteo koa sary io.)

¹² Toy misy tantara raiky mampiseho hoe manome voninahitsy an’i Jehovah ty fanomeza ataontsika. Nisy bain-tao naharitsy tanatin’ny fotoa elaela ta Zimbabwe tany, tamy 2020 iny. An-tapitrisany tamy zay ty olo natahora ho maty satria tsy nisy raha ho hany, anisani-zay ranabavy mana anara Prisca zay. Fe ndre teo zay, le nandeha nanompo avao Prisca lafa Larobia noho Zoma. Nanao ani-zay avao ie ndre tanatin’ny fotoa fambolea. Nikizaky azy ty olo tanà raiky aminy lafa nahita azy nanompo fa tsy nandeha tam-baibò eny. Nivola rozy hoe: “Ho mati-mosary nareo trano raiky amy toy.” Tsy nisalasala Prisca namaly an-drozy hoe: “Mbo tsy nanary ty mpanompony zao mihintsy Jehovah.” Tsiela tafarani-zay, le nahazo fanampea tamy fandamina ie. Baka amy fanomeza ataontsika rey fanampea niazony reo. Tseriky olo tanà raiky aminy rey, le hoy ty asan-drozy tamy Prisca: “Tena tsy nanary anao vatany Jehovah, le ta hianatsy misimisy mikasiky azy zahay.” Nanomboky nanatriky fivoria amy zay ty fito amin’olo tanà raiky aminy rey.

13. Akory ty anomezantsika voninahitsy an’i Jehovah amy fandaisam-batantsika? (Salamo 96:9)

¹³ Vakio Salamo 96:9. Manome voninahitsy an’i Jehovah tsika lafa soa fandaisam-bata. Tsy maintsy nanao malio ty mpisoro lafa nanompo tamy tempolin’i Jehovah tao. (Eks. 40:30-32) Marina fa ilà ty malio ara-bata, fe mbo vatan-draha mandilatsy ani-zay ty fandaisam-bata malio. (Sal. 24:3, 4; 1 Pet. 1:15, 16) Mila miezaky mafy tsika mba hiala amy ty ‘toetsintsika taloha,’ zany hoe miala amy fomba noho fahazaran-draty nananantsika, bakeo misiky ty “toetsy vaovao,” zany hoe mieritseritsy noho manao raha soa mifanaraky amy toetsin’i Jehovah. (Kol. 3:9, 10) Ndre olo nanao raha farani-ze raty rey aza, le afaky miova noho misiky toetsy vaovao lafa ampean’i Jehovah.

14. Ino ty ianaranao baka amy ty raha niainan’i Jack? (Henteo koa sary io.)

¹⁴ Diniho moa ty tantaran’i Jack. Tena nisatà ie sady nahasaky namono olo, ka nikaihy mihintsy hoe Devoly. Vokatsini-zay, le voaheloky ho maty ie. Fa niamby ty fotoa hamonoa azy avao Jack tamy zay. Fe lafa nanasa azy hianatsy Baiboly ty rahalahy raiky anisan’ny nitsidiky an’ny prizon nigadràny iny, le naneky ie. Marina fa nanao raha tena raty Jack, fe nahavita niova avao ie ka natao batisa. Tena niova tanteraky Jack, ka nitàny mihintsy ty sisany amy mpiamby an’ny prizon iny lafa nanao veloma azy tamy fotoa hamonoa azy iny. Zao ty nivolanin’i serzan raiky niasa tamy prizon iny tao: “Jack ty gadra farani-ze nampatahotsy tato. Fe henanizao lasa ie koa ro farani-ze mana toetsy soa.” Herinandro tafaran’ny namonoa an’i Jack iny, le nimpoly nitariky fivoria tam-prizon any rahalahy rey. Nahita gadra raiky vo sambany nanatriky fivoria rozy tamy zay. Nanino gadra io ro nanatriky fivoria? Satria nidosiky ty fony ty fiovà nataon’i Jack sady teany ho hay hoe ino ty tokony hataony mba hanompoany an’i Jehovah. Hitantsika baka amy zay, fa manome voninahitsy an’i Jehovah ty fandaisam-batantsika!​—1 Pet. 2:12.

AKORY TY HANOMEZAN’I JEHOVAH VONINAHITSY TY ANARANY AMY HO AVY?

15. Akory ty hanomezan’i Jehovah voninahitsy tanteraky ty anarany amy ho avy? (Salamo 96:10-13)

¹⁵ Vakio Salamo 96:10-13. Resahin’ny andininy faramparany amy Salamo faha-​96 reo, fa Mpanjaka noho Mpitsara manao ty rariny Jehovah. Akory ty hanomezan’i Jehovah voninahitsy ty anarany amy ho avy? Amy alalan’ny didim-pitsaràny. Tsy ho ela, le haripakiny Babylona Bevata satria nanafa-baraka ty anarany masy. (Apok. 17:5, 16; 19:1, 2) Lafa hitan’olo sisany hoe rava Babylona Bevata le mety hiaraky amintsika hanompo an’i Jehovah rozy. Amy farany, zany hoe amy Aramagedona, le horavàn’i Jehovah tanteraky tontolon’i Satana toy, ka haripakiny ze manohitsy azy noho manivativa ty anarany. Fe havotany ze olo tea azy noho manoriky ty safàny, sady manome voninahitsy azy. (Marka 8:38; 2 Tes. 1:6-10) Lafa vita amy zay ty fitsapà farany amy faran’ny Fanjakà Arivo Taon’i Kristy, le zay vo vita tanteraky ty fanamasìna ty anaran’i Jehovah. (Apok. 20:7-10) Amy fotoa zay, le “ho feno fahaiza ty voninahitsin’i Jehovah ty tany, manahaky ty anaronan’ny rano ty ambany riaky any.”​—Hab. 2:14.

16. Tapa-kevitsy hanao ino iha? (Henteo koa sary io.)

¹⁶ Ho falifaly biby tsika lafa hanome voninahitsy an’i Jehovah ty olo iaby satria tena maeva ani-zay ty anarany! Fe zisiky hiavian’ny fotoa zay, le tokony hanao ze azontsika atao tsika mba hanomeza voninahitsy a-Ndranahary. Tean’ny Filan-kevi-pitantana tsika laha mifantoky amy raha tena bevata io. Zay nahavy an-drozy nifily ty Salamo 96:8 ho an’ny andinin-teny ho an’ny tao 2025 io. Zao ty resahiny ao: “Ameo voninahitsy Jehovah fa maeva ani-zay ty anarany.”